Матфейдиҥ сӱӱнчилӱ јары

5 Иисус ал-камык улусты кӧрӧлӧ, кырга чыкты. Анда отурып аларда, ого ӱренчиктери базып келдилер. 2 Иисус улусты ӱредип баштады:

3 — Кудайды билерге кӱӱнзеген улус ырысту, нениҥ учун дезе олорго теҥеридеги Башкару берилер.

4 Ачу-коронго бастырткан улус ырысту, нениҥ учун дезе олор токунал алар.

5 Јобош улус ырысту, нениҥ учун дезе олор јерди энчиленер.

6 Ӱзе немени Кудайдыҥ айтканыла болзын деп кӱӱнзеп тургандар ырысту, нениҥ учун дезе олордыҥ кӱӱни бӱдӱп калар.

7 Килемкей улус ырысту, нениҥ учун дезе олорды Кудай килеер.

8 Ак санаалу улус ырысту, нениҥ учун дезе олор Кудайды кӧрӧр*.

9 Улус ортодо амыр јайап турган улус ырысту, нениҥ учун дезе олор Кудайдыҥ балдары деп адалар.

10 Јакшы керектери учун истедип турган улус ырысту, нениҥ учун дезе олорго Кудайдыҥ Башкарузы берилер.

11 Мен учун айткыладып, истедип, јамандадып турзагар, слер ырысту. 12 Сӱӱнигер, нениҥ учун дезе Кудай слерге сӱреен јаан алкыш берер! Анайып ла озогы ӧйдӧ Кудайдыҥ сӧзин айдып јӱрген улусты истегендер.

13 Слер — јердиҥ тузы. Је тустыҥ амтамы јылыйып калза, оны ойто канайып тусту эдер? Андый тус эш кереги јок болуп калат. Оны тышкары таштап ийер керек, ол анда тепселип калар.

14 Слер бу караҥуй телекейге јаркын экеледигер. Кырдыҥ ӱстине турган кала бастыра улуска кӧрӱнет. 15 Лампаны кӱйдӱрип ийеле, оны бӧктӧп салбай јат, карын бастыра улуска јарык болзын деп, оны столдыҥ ӱстине тургузып койот. 16 Анайып слердиҥ де јаркыныгар јарыдып турзын. Ол тушта улус слердиҥ јакшы керектереерди кӧрӱп, теҥеридеги Адагарды мактаар.

17 Мени Јасакты ла судурчылардыҥ айтканын* токтодорго келген деп сананбагар. Мен оны токтодорго эмес, бӱдӱрерге келгем. 18 Слерге чынын айдадым: јер ле теҥери јоголып калар, је Јасактыҥ бир де кичинек буквазы да, чийӱзи де јоголбос. Бичилген сӧстӧр бӱдӱп калар. 19 Оныҥ учун бир де кичинек јасакты бузып, улусты да анайып ӱреткен кижи теҥеридеги Башкаруга кирбес. Је Јасакты бӱдӱрген ле улусты ого ӱреткен кижи теҥеридеги Башкаруга кирер. 20 Слерге айдадым: бӱдӱмјигер Јасактыҥ ӱредӱчилериниҥ ле фарисейлердиҥ бӱдӱмјизинеҥ ас болзо, теҥеридеги Башкаруга кирбезигер.

21 Озогы ӧйлӧрдӧ: «Ӧлтӱрбегер. Кижи ӧлтӱрген кижи јаргыныҥ алдына турар» — деп айдылган сӧстӧрди слер укканыгар. 22 Је мен слерге айдадым: карындажына ачынып турган кижи јаргыныҥ алдына турар. Карындажына кату сӧстӧр айткан кижи Ӱстӱги јаргыныҥ алдына турар. Је карындажын: «Сен аамай!» — деп айдып турган кижи отту гее́ннага* ташталар.

23 Кудайга тайылга экелеле*, карындажыҥныҥ сеге ачынганы санааҥга кирзе, 24 тайылгаҥды тагылдыҥ јанында артыргызала, барып, карындажыҥла јаражып ал. Оноҥ кайра келеле, тайылгаҥды Кудайга бер.

25 Ачынышкан кижиҥ сени јаргыга бергелекте, оныла тӱргедеп јаражып ал. Оноҥ башка бу керек јаргычыга једер, јаргычы дезе сени тӱрмеге сугуп койотон кижиге берип ийер. 26 Мен сеге айдадым: тӧлӱӱҥди ӱзе тӧлӧбӧгӧнчӧҥ, анаҥ чыкпазыҥ.

27 Слер мынайда айдылганын укканыгар: «Эш-нӧкӧриҥ эмес кижиле конбо». 28 Је мен слерге айдып турум: ӱй кижиге кӱӱнзеп кӧргӧн кижи оныла санаазында конып койгон болот. 29 Кӧзиҥ сени кинчекке тартып турза, оны кодороло, таштап ий. Бастыра бойыҥ гее́ннага ташталганчаҥ, кӧс јок артсаҥ торт болор. 30 Колыҥ сени кинчекке тартып турза, оны кезип, таштап ий. Бастыра бойыҥ гее́ннага ташталганчаҥ, кол јок артсаҥ торт болор.

31 Мынайда база бичилген: «Ӱйинеҥ айрылган кижи ӱйине айрылганы керегинде кере бичик берер учурлу». 32 Је мен слерге айдадым: эр кижи ӱйиле айрылышпас учурлу. Је айрылышса, ӱйин ӧскӧ кижиле койдоныжарына ийде салат. Бу ӱй кижини алган эр кижи кинчек эдет. Эр кижи бойыныҥ ӱйинеҥ, ӱйи јӱк ле ӧскӧ кижиле койдонышкан* болзо, айрылар аргалу.

33 Ада-ӧбӧкӧлӧрӧӧргӧ мынайда айдылганын база укканыгар: «Айткан сӧзигерди буспагар. Слер Иеговага берген сӧзигерди бӱдӱрер учурлу». 34 Је мен слерге айдадым: сӧзигерди бодоп ло бербегер. Теҥериле де чертенбегер, нениҥ учун дезе теҥери — Кудайдыҥ башкараачы болуп отурган јери. 35 Јерле де чертенбегер, нениҥ учун дезе анда Кудайдыҥ буды турат. Иерусалимле де чертенбегер, нениҥ учун дезе ол Кудайдыҥ калазы. 36 Бойоордыҥ бажыгарла* да чертенбегер, нениҥ учун дезе бажыгардыҥ бир де кылын агартып эмезе карартып болбозоор. 37 Эдер болгоноорды эдигер, этпес болгоноорды этпегер*. Оноҥ башка слер Дьяволго тӱҥей болороор.

38 Слер укканыгар: «Кем-кем кижиниҥ кӧзин сайып ийген болзо, оныҥ бойыныҥ да кӧзин сайар керек; ол эмезе кижиниҥ тижин ооткон болзо, оныҥ бойыныҥ да тижин оодып салар керек». 39 Је мен слерге айдадым: јаман кижиге удурлашпа. Кем-кем оҥ јаагыҥа тажып ийзе, сол до јаагыҥды тургузып бер. 40 Кем-кем сениле јаргылажып, чамчаҥды аларга турган болзо, ого тоныҥды да берип ий. 41 Ол эмезе јамылу кижи сеге јакылта берген болзо, сен оныҥ сураганынаҥ да кӧп эдип сал. 42 Сураган кижиге — бер, тӧлӱге* сураган кижиге «јок» — деп айтпа.

43 Мынайып та айдылганын укканыгар: «Јуук улузыгарды сӱӱгер, је ӧштӱлереерди јаман кӧрӱгер». 44 А мен слерге айдып турум: ӧштӱлеригерди сӱӱгер, слерди истежип тургандар учун мӱргӱгер. 45 Анайып слер теҥеридеги Адагардаҥ тем алып турганаарды кӧргӱзереер, нениҥ учун дезе Кудай кӱнди јакшы да, јаман да улуска берген; јаҥмырды јаман да, јакшы да улуска ийет. 46 Јӱк ле слерди сӱӱп турган улусты сӱӱп турган болзоор, Кудайдаҥ алкыш албазаар. Анайып, калан* јууп турган улус эдип турган эмес пе? 47 Слер јӱк бойоордыҥ најылараарды уткып турган болзогор, јакшы эдип турганаар деп бодойдоор бо? Анайда ӧскӧ дӧ албатылар эдип јат. 48 Айдарда, улусты чын сӱӱшле сӱӱгер. Теҥеридеги Адагар да слерди анайып сӱӱп јат*.