Матфейдиҥ сӱӱнчилӱ јары
26 Иисус мыны ӱзе куучындап божодоло, ӱренчиктерине айткан: 2 «Эки кӱннеҥ Пасха болор деп, слер билеригер. Ол кӱн кижи Уулын тӧҥӧшкӧ кадап ӧлтӱрзин деп, ӧштӱлердиҥ колына берип ийгилеер».
3 Бу ӧйдӧ абыстардыҥ јаандары ла албатыныҥ аксагалдары Каиа́фа деп улу абыстыҥ айылында јуулыштылар. 4 Олор Иисусты меке-сӱмеле тудуп, ӧлтӱрип саларга јӧптӧжип јадала: 5 «Јаҥыс байрам кӱнде эмес, оноҥ башка албаты тӱймеп чыгар» — деп, шӱӱп алдылар.
6 Иисус Вифа́нияда југуш балунаҥ* јазылып калган Си́мон эште 7 эҥирде ажанып јадарда, ого ӱй кижи базып келди. Бу ӱй кижи јыракыда* баалу-чуулу, јараш јытту ӱс тудунып алган болгон. Ол оны Иисустыҥ бажына урды. 8 Ӱренчиктер мыны кӧрӧлӧ, айдышты: «Бу баалу ӱсти мынайып не ӱреер? 9 Оны јаан баага садып ийеле, јокту улуска ӱлеп берзе, јакшы болор эди». 10 Олорго бу јарабаганын кӧрӱп ийеле, Иисус айтты: «Слер бу ӱй кижини не санааркадып јадыгар? Ол меге карын да јакшы керек этти. 11 Јокту улус слерле јаантайын болор, мен дезе слерле јаантайын болбозым. 12 Бу ӱй кижи мениҥ бажыма ӱс уруп, мени мӧҥкӱӱм кӧдӱретен кӱнге белетеп салды. 13 Чынын айдадым слерге: сӱӱнчилӱ јар јарлалган јерлерде бу ӱй кижини ле оныҥ эткенин эске алынгылаар».
14 Ол тушта 12 ӱренчиктиҥ бирӱзи, Иуда Искарио́т, абыстардыҥ јаандарына барала: 15 «Оны слерге садып ийзем, слер меге нени беререер?» — деп сурады. Олор ого 30 мӧҥӱн акча берер болды. 16 Бу ла ӧйдӧҥ ала Иуда Иисусты садып ийетен арга бедиреп баштады.
17 Ачытпаган калаш јийтен байрамныҥ баштапкы кӱнинде ӱренчиктер Иисуска базып келеле: «Бис сеге Пасханыҥ ажын кайда белетеп салайыс?» — деп сурадылар. 18 Ол айтты: «Калада мындый да кижиге барып айдыгар: „Ӱредӱчи айдат: ‚Мениҥ ӧйим јууктап келди. Мен ӱренчиктеримле кожо Пасханы сениҥ айылыҥда ӧткӱрерим‘“». 19 Ӱренчиктери Иисустыҥ јакыганыла эдип, Пасхага ӱзе белетеп салдылар.
20 Эҥир кире берерде, Иисус 12 ӱренчигиле кожо ажанарга отурды. 21 Ажанып јадала: «Чынын айдадым слерге: слердиҥ бирӱгер мени садып ийер» — деерде, 22 олор тыҥ санааркай береле, кажызы ла сурап турды: «Мен эмезим не, Кайракан?» 23 Иисус айтты: «Мениле кожо калажын бир айакка сукканы мени садып ийер. 24 Кижи Уулы судурлалганыла барып јат. Је оны садып јаткан кижиге ачу-корон! Ол кижи ак-јарыкка чыкпаган болзо, торт болор эди». 25 Оны садарга јаткан Иуда база сурады: «Мен эмезим не, Ӱредӱчи?» Иисус ого: «Анайып сен бойыҥ айттыҥ» — деди.
26 Олор ажанып јадарда, Иисус калашты алып, мӱргӱди. Оноҥ оны сындырып ийеле, ӱренчиктерине берип, айтты: «Калашты алып, јигер. Ол мениҥ эди-канымды темдектейт». 27 Оноҥ айакты алып, Кудайга быйанын јетиреле, ӱренчиктерине берип, айтты: «Бу айактаҥ ончогор ичигер. 28 Бу кызыл аракы мениҥ канымды темдектейт. Ол јӧптӧжӱниҥ каны болуп, улустыҥ кинчектери ташталзын деп тӧгӱлер. 29 Је айдып турум слерге: слерле кожо Адамныҥ башкарузында јаҥы кызыл аракы ичер кӱнге јетире аракы ичпезим». 30 Учында олор Кудайды мактап, кожоҥдоп ийеле, Маслиналарлу кырга баргылады.
31 Анда Иисус олорго айткан: «Бу тӱнде слер мени артыргызып салараар. Нениҥ учун дезе: „Койчыны ӧлтӱрип салзам, койлоры кача берер“ — деп бичилип калган. 32 Је тирилип келзем, Галилей јерине барарым. Слерди анда сакыырым». 33 Је Пётр: «Сени бастыразы да артыргызып салза, мен сени качан да артыргыспазым!» — деп айтты. 34 Иисус ого каруу берди: «Чынын сеге айдадым: бу тӱнде пӧтӱк эткелекте, сен менеҥ ӱч катап јана тӱжериҥ». 35 Је Пётр тӱҥей ле: «Сениле кожо ӧлӧтӧн дӧ болзом, мен сени качан да таштабазым!» — деп айдып турды. Ӧскӧ ӱренчиктер база анайда ла айдыжып турдылар.
36 Оноҥ Иисус ӱренчиктериле Гефсимания деп јерге келди. Анда олорго: «Мында отурар, мен барып мӱргӱп ийейин» — деп айтты. 37 Оныла кожо Пётр ла Зеведейдиҥ эки уулы барган. Ол тыҥ санааркап, токунап болбой, 38 олорго айтты: «Меге коркышту кӱч. Ӧзӧк-тынымга ӧлӱмниҥ ачузы тӱшти. Мениле кожо артып, ойгу болугар». 39 Иисус дезе эмеш ыраада базып, тизеленип ийеле, кӧҥкӧрӧ тӱжӱп, мӱргӱй берди: «Ада, бу айактаҥ* ичпейтен арга бар болзо, ичпейин. Је мениҥ кӱӱнимле эмес, сенийиле болзын».
40 Иисус кайра једип келерде, ӱренчиктери уйуктап јатты. Ол Пётрга айтты: «Слер менле кожо бир де саат ойгу отурып болбодоор бо? 41 Ченелтеге кирбеске, ойгу болугар, јаантайын мӱргӱгер. Кижи чын јӱрер кӱӱндӱ, је эт-канында* чыдал јок». 42 Иисус экинчи катап ыраада базып, мӱргӱй берди: «Ада, бу айактаҥ ичпейтен арга јок болзо, сениҥ кӱӱн-табыҥла болгой». 43 Кайра једип келерде, ӱренчиктери ойто ло уйуктап јатты. 44 Иисус олорды артыргызып, база ла ыраада јӱре береле, ӱчинчи катап ол ло керегинде мӱргӱди. 45 Оноҥ ол ӱренчиктерине келеле, айтты: «Мындый да ӧйдӧ слер амырап, уйуктап јадаар ба! Кижи Уулы кинчектӱлердиҥ колына берилип јат. 46 Турыгар, барактар. Мени садатан кижи јууктап келди». 47 Иисус јетире айткалакта, он экӱниҥ бирӱзи, Иуда, келди. Оныла кожо кылыштар ла шыйдамдар тудунып алган кӧп улус келген. Олорды абыстардыҥ јаандары ла албатыныҥ аксагалдары ийген.
48 Садып ийетен кижи олорло мынайда куучындажып алган: «Кемди мен окшоп ийерим, оны тудуп алыгар». 49 Ол Иисуска базып келеле: «Јакшы ба, Ӱредӱчи!» — дейле, оны окшоп ийди. 50 Иисус оноҥ сурады: «Сен бери не келгеҥ?» Ол тушта келген улус Иисуска базып келеле, оны тудуп алдылар. 51 Је Иисусла кожо болгондордыҥ бирӱзи кылышты чыгара тартала, улу абыстыҥ кулыныҥ кулагын кезе чабып ийген. 52 Иисус ого айтты: «Кылышты кайра сук. Кылышты алганы кылыштаҥ ок ӧлӧр. 53 Эмезе Адам меге болужарга канча муҥ* ангелдерин ийзин деп сурап болбозым деп сананып тургаҥ ба? 54 Андый болзо, Бичимелде айдылганы канайып бӱдетен?» 55 Оноҥ Иисус келген улуска айтты: «Мени тонокчыны чылап тудуп аларга, кылыштарлу ла шыйдамдарлу келдеер бе? Кӱнӱҥ сайын ӧргӧӧдӧ ӱредип отурдым, слер меге тийбедеер не? 56 Је бу ӱзе неме судурчылардыҥ айтканы бӱтсин деп болды». Ӱренчиктер дезе оны артыргызып, кача бердилер.
57 Иисусты тудуп алган улус оны Каиа́фа деп улу абыска апардылар. Анда јасактыҥ ӱредӱчилери ле аксагалдар јуулыжып калган болгон. 58 Пётр дезе араайынаҥ, Иисустыҥ кийнинеҥ улу абыстыҥ айылына јетире барды. Анда ол јалчыларла кожо отурып, оноҥ ары не болорын сакып турды.
59 Абыстардыҥ јаандары ла бӱдӱн Синедрио́н* Иисусты ӧлӱмге јаргылап саларга, ол керегинде тӧгӱн неме айдар улус бедиреген. 60 Иисусты јамандаарга кӧп улус келген де болзо, је олор ого удура нени де таппады. Оноҥ эки кижи келип, 61 айтты: «Бу кижи: „Мен Кудайдыҥ ӧргӧӧзин бузып ийеле, оны ойто ӱч кӱнге тудуп ийерим“ — деп, айдып туратан». 62 Ол тушта улу абыс туруп келеле, Иисустаҥ сурады: «Нени де айтпазыҥ ба? Угуп туруҥ ба, улус сени неде бурулайт?» 63 Је Иисус нени де унчукпады. Улу абыс ого айтты: «Тирӱ Кудайдыҥ алдына айдып бер, сен Кудайдыҥ Уулы, Христос по?» 64 Иисус ого айтты: «Каруузын сен бойыҥ бердиҥ. Айдадым слерге: бу ӧйдӧҥ ала слер кӱчтӱ Кудайдыҥ оҥ јанында кижи Уулыныҥ отурганын ла теҥериде булуттардыҥ ӱстиле келип јатканын кӧрӱп ийеригер». 65 Ол тушта улу абыс кийимин јара тартып, айтты: «Бу кижи Кудайды јамандап јат! Биске ӧскӧ керечилер не керек? Јаҥы ла оныҥ сӧстӧрин бойоор уктаар! 66 Нени айдараар?» Олор: «Ӧлтӱрер керек оны!» — деп, каруу јандырдылар. 67 Ол тушта олордыҥ кезиги Иисустыҥ јӱзине тӱкӱрип, оны токпоктоп баштагылады. Кезиги дезе оныҥ јагына тажып, 68 айдып турдылар: «Христос болуп турган бӱдӱжин мыныҥ! Судурчы болзоҥ, айт, кем сени согуп ийди?»
69 Ол ӧйдӧ Пётр тышкары отурган. Ого јалчы ӱй кижи базып келеле: «Сен база Галилей јериниҥ Иисус деп кижизиле кожо болгоҥ!» — деп айтты. 70 Је ол бастыра улустыҥ алдына: «Јок, мен эмес. Бу нени айдып туруҥ?» — деп актанып турды. 71 Оноҥ Пётр эжиктерге базып келерде, оны база ӧскӧ јалчы ӱй кижи кӧрӱп ийеле, јанында турган улуска айтты: «Бу кижи Назарет јериниҥ Иисус деп кижизиле кожо јӱрген». 72 Је Пётр ойто ло: «Мен ол кижини билбезим!» — деп актанып турды. 73 Бир эмеш ӧйдӧҥ, анда турган кезик улус Пётрга базып келеле: «Сен чын ла олордыҥ бирӱзи, куучыныҥнаҥ билдирип туру» — деп айттылар. 74 Је Пётр: «Јок, мен ол кижини билбезим!» — деп, сӧзин берип турды. Ол ло ӧйдӧ пӧтӱк этти. 75 Ол тушта ого Иисустыҥ: «Пӧтӱк эткелекте, сен менеҥ ӱч катап јана тӱжериҥ» — деген сӧстӧри санаазына кирип келерде, Пётр эжиктеҥ чыгала, ӧксӧп ыйлай берди.