Матфейдиҥ сӱӱнчилӱ јары
11 Иисус 12 ӱренчигин ӱредип божодоло, ӧскӧ калалар сайын јарлаарга ла улусты ӱредерге барган.
2 Тӱрмеде отурган Иоанн Христостыҥ кайкамчылу керектерин угала, бойыныҥ ӱренчиктерин ийип јат. 3 Олор Иисустаҥ мынайып сураган: «Келетен кижи сен бе? Эмезе биске ӧскӧ кижи сакыйтан ба?» 4 Иисус олорго айтты: «Кӧргӧн-укканаарды Иоаннга јетирип барыгар. 5 Кӧзи кӧрбӧй турган улус — кӧрӱп баштайт, аксак улус — базып баштайт, југуш балулу* улус — јазылып јат, кулагы укпас улус — угуп баштайт, божогон улус тирилет, јокту-јойу улуска сӱӱнчилӱ јар јарлалат. 6 Меге алаҥзыбай бӱдӱп турган кижи ырысту».
7 Иоанныҥ ӱренчиктери јӱре берерде, Иисус албатыга Иоанн керегинде мынайып айдып баштады: «Слер чӧл јердеҥ нени кӧрӧргӧ барып јӱрдеер? Салкынга јайканып турган ӧлӧҥди кӧрӧргӧ бӧ? 8 Је, нени кӧрӧргӧ бардаар? Баалу-чуулу кийимдӱ кижини кӧрӧргӧ бӧ? Андый кийимдӱ улус каанныҥ туразында јадып турган эмес пе? 9 Айса ары не барып јӱрдеер? Судурчыны кӧрӧргӧ бӧ? Эйе, айдып турум слерге, ол судурчы, је тегин судурчы эмес. 10 Ол керегинде мынайып бичилген: „Сениҥ алдыҥа јарчымды ийерим. Ол сеге јол белетеп салар“. 11 Чынын айдадым слерге: ончо улус ортодо Иоанндый улу кижи качан да болбогон. Је теҥеридеги Башкаруда эҥ кичинеги оноҥ јаан. 12 Иоанныҥ кӱндеринеҥ бери улус теҥеридеги Башкаруга кирерге албаданат. Бастыра кӱчинеҥ албадангандар амадузына јединет. 13 Не дезе ончо судурчылар ла јасак Иоаннаҥ озо судурлаган. 14 Бӱдетен бедеер, бӱтпейтен бедеер, је Иоанн — ол келетен Илья. 15 Кулакту кижи уксын.
16 Бу ӱйени кемге тӱҥейлейин? Олор кӧп улусту јерлерде отурган балдарга тӱҥей. Бу балдар ӧскӧ балдарга мынайып айдат: 17 „Бис слерге кӱӱ ойнодыс, је слер бијелебедигер, бис ый-сыгытта болгоныс, је слер кунукпадыгар“. 18 Иоанн келип, курсак јибей, аракы ичпей турарда, улус: „Оныҥ ичине кӧрмӧс кирип калган“ — деп айдышты. 19 Кижи Уулы келип, јип, ичип турарда, улус оны: „Тойбос, аракычы неме, кинчектӱлердиҥ ле калан* јууп тургандардыҥ нӧкӧри“ — деп айдышты. Је кижиниҥ ойгор болгоны эткен керектеринеҥ кӧрӱнет».
20 Мыныҥ кийнинде Иисус оныҥ эҥ кӧп кайкалдарын кӧргӧн, је кинчегин алынбаган калаларга 21 мыныйып айткан: «Ачу-корон сеге, Хорази́н! Ачу-корон сеге, Вифсаи́да! Слерде эдилген кайкалдар Тир ле Сидондо эдилген болзо, анда јаткан улус туку ла качан кеден бӧстӧҥ эдилген кийимин кийеле, кӱлге отурып, кинчегин алынар эди. 22 Слерге айдадым: Јаргыныҥ кӱнинде Тир ле Сидонго слерге кӧрӧ јеҥил болор. 23 Сен де, Капернау́м, тенериге чыгарга туруҥ ба? Јок, сен ӧлгӧндӧрдиҥ јерине барарыҥ! Сенде эдилген кайкалдар Содомдо эдилген болзо, ол эмдиге ле јетире турар эди. 24 Айдып турум сеге: Јаргыныҥ кӱнинде Содомго сеге кӧрӧ јеҥил болор».
25 Оноҥ Иисус айткан: «Ада, теҥериниҥ ле јердиҥ Кайраканы! Сени бастыразыныҥ алдына мактап турум. Нениҥ учун дезе сен мыны ойгор ло сагышту улустаҥ јажырып, кичинек балдарга ачтыҥ! 26 Эйе, Ада, сениҥ кӱӱниҥ андый болгон. 27 Адам меге ӱзе немени берип салган. Уулын Адазынаҥ јакшы кем де билбес. Адазын Уулынаҥ јакшы кем де билбес. Уулы Адазы керегинде чындыкты кемдерге ачарга турган, ол до улус Аданы јакшы билер. 28 Уур иш эдип турган ла уур јӱк апарып турган ончо улус меге келигер. Мен слерге ийде-кӱч берерим. 29 Мен јалакай ла јобош, оныҥ учун келип, менле кожо иштенигер*, менеҥ ӱренигер. Ол тушта ийде-кӱчтӱ болороор. 30 Мениле кожо иштенерге кӱч эмес*. Мениҥ јӱгим јеҥил».