Матфейдиҥ сӱӱнчилӱ јары
16 Ондо Иисуска фарисейлер ле саддукейлер базып келеле, оны ченеерге болуп, теҥеридеҥ кайкал кӧргӱзип ийзин деп сурадылар. 2 Иисус олорго айткан: «Эҥир кире берзе, слер мынайда айдып јадаар: „Теҥери кызыл, оныҥ учун эртен айас кӱн болор эмтир“, 3 а эртен тура: „Теҥери кызыл, је бӱркӱк, оныҥ учун бӱгӱн соок, јаҥмырлу кӱн болотон эмтир“ — деп айдыжып јадаар. Теҥерини кӧрӧлӧ, кӱн-айдыҥ кандый болорын билип јадаар, је бу болуп турган немениҥ учурын оҥдобой јадаар. 4 Кудайга чындык эмес, јаман ӱйе јаантайын ла кайкал сурап јат, је ого Ио́наныҥ кайкалынаҥ ӧскӧ кандый да кайкал кӧргӱзилбес». Оноҥ Иисус олорды артыргызып, јӱре берди.
5 Оныҥ ӱренчиктери талайдыҥ ары јанына кечип барган, је калаш аларга ундып салгандар. 6 Иисус олорго айтты: «Ајарыҥкай болугар, фарисейлердиҥ ле саддукейлердиҥ ачыткызынаҥ чеберленигер». 7 Олор бой-бойына айдыштылар: «Байла, бис калаш албаганыс учун мынайып айдып турган ошкош». 8 Олордыҥ куучынын угуп ийеле, Иисус айтты: «Слерде калаш јок деп, нениҥ учун айдып јадыгар? Слердиҥ бӱдӱмјигер кайда? 9 Эмдиге ле јетире оҥдобой турганаар ба? Беш болчок калашла 5 000 кижини азыраарымда, канча корзина калаш јууп алганаарды ундып салдаар ба? 10 Эмезе јети болчок калашла 4 000 кижини азыраарымда, канча корзина калаш јууп алган эдеер? 11 Канайып оҥдобой тураар, мен слерге калаш керегинде айтпадым. Слерге фарисейлердиҥ ле саддукейлердиҥ ачыткызынаҥ чеберленер керек». 12 Ол тушта ӱренчиктер Иисус калаштыҥ ачыткызы керегинде эмес, је фарисейлердиҥ ле саддукейлердиҥ ӱредӱлеринеҥ коруланары керегинде айткан деп оҥдоп ийдилер.
13 Иисус Филиппыдагы Кеса́рияныҥ јерлерине једип барала, ӱренчиктеринеҥ сурады: «Кижи Уулы керегинде улус нени айдыжат? Оны кем деп бодогылайт?» 14 Олор айтты: «Кезик улус оны — Крестеечи Иоанн дежет, кезиги — Илья, је кезиги дезе, Иереми́я эмезе судурчылардыҥ бирӱзи дежет». 15 Ол тушта Иисус сурады: «А слер мени кем деп бодоп јадаар?» 16 Си́мон Пётр: «Сен — Христос, тирӱ Кудайдыҥ Уулы» — деди. 17 Иисус ого айтты: «Си́мон, Ио́наныҥ уулы, сен ырысту кижи, нениҥ учун дезе мыны сеге улус эмес, је мениҥ теҥеридеги Адам ачты. 18 Айдып турум сеге: сен эмди Пётр. Бу кайа таштыҥ ӱстине јуунымды тӧзӧӧрим. Оны сӧӧк салар јердиҥ эжиги јеҥип болбос. 19 Сеге теҥеридеги Башкаруныҥ ключин берерим. Јерде нени буулаарыҥ, теҥериде де буулалар. Јерде нени чечериҥ, теҥериде де чечилер». 20 Мыныҥ кийнинде Иисус ӱренчиктерин улуска оны Христос деп куучындабазын деди.
21 Бу ӧйдӧҥ ала Иисус ӱренчиктерине Иерусалим барар болгонын, аксагалдарга, абыстардыҥ јаандарына ла јасактыҥ ӱредӱчилерине кыйнадып ӧлтӱртерин, анайда ок ӱчинчи кӱнде тирилерин јартап баштаган. 22 Пётрга бу јарабады, оныҥ учун ол Иисусты туура апарып, айтты: «Кайракан, сен анайып айтпа*! Сениле андый неме качан да болбозын!» 23 Је Иисус Пётрдаҥ туура кӧрӧлӧ, айтты: «Менеҥ кеде тур, Сатана! Сен меге бӱдӱрилетен таш болуп јадыҥ, нениҥ учун дезе сен Кудайдыйын эмес, кижинийин сананып тургаҥ».
24 Оныҥ кийнинде Иисус ӱренчиктерине айтты: «Кем мениҥ кийнимнеҥ барарга турган бойыныҥ кӱӱн-санаазын туура эдип, кыйналатан тӧҥӧжин алала, кийнимнеҥ барзын. 25 Кем јӱрӱмин корулап аларга турган онызын јылыйтар, је кем јӱрӱмин мен учун јылыйтар, оны ойто алар. 26 Чын ла, бӱдӱн телекейдиҥ бар-јок немелерин алып, је јӱрӱмин јылыйткан кижи кандый туза алатан? Эмезе кижи бойыныҥ јӱрӱмин неге толыйтан? 27 Нениҥ учун дезе кижи Уулы Адазыныҥ берген јаҥын* алып, ангелдериле кожо келзе, кажы ла кижиге эткен керектери аайынча јаргы чыгарар. 28 Чынын айдадым слерге: мында тургандардыҥ кезиги кижи Уулыныҥ башкарып баштаганын* кӧрбӧгӧнчӧ ӧлбӧс».