Матфейдиҥ сӱӱнчилӱ јары
25 Ол ӧйдӧ теҥеридеги Башкару он кыска тӱҥей болор. Олор јарыткыштарын алганча, кижи алар уулды уткыырга чыктылар. 2 Олордыҥ бежӱзи сагышту болгон, база бежӱзи сагыш јок болгон. 3 Сагыш јок кыстар јарыткыштарын алала, уратан ӱзин албаган. 4 Сагышту кыстар дезе јарыткыштарын да, уратан ӱзин де кожо алган. 5 Байагы уул удап турарда, кыстар уйкузырап, уйуктап калдылар. 6 Тӱн ортозында: „Уул келип јат! Оны уткыырга чыгыгар!“ — деген кыйгы угулды. 7 Ончо кыстар туруп келеле, јарыткыштарын белетеп алдылар. 8 Сагыш јок кыстар сагышту кыстардаҥ: „Јарыткыштарыс ӧчӱп барат, бир эмеш ӱс уруп берзеер“ — деп сурадылар. 9 Сагышту кыстар дезе олорго: „Бистиҥ ончобыска ӱс јетпестеҥ айабас. Оныҥ учун барып, садып алыгар“ — деп айттылар. 10 Олор ӱс садып аларга, јӱре берерде, уул једип келди. Белен болгон кыстар оныла кожо той болотон јерге кире берерде, эжик јабылып калды. 11 Арткан кыстар једип келеле: „Кайракан! Кайракан! Эжикти ачсаҥ“ — деп айдыжарда, 12 ол: „Чынын айдадым слерге: мен слерди билбезим“ — деди.
13 Айдарда, ойгу болугар, нениҥ учун дезе кӱнди де, саатты да билбезигер.
14 Анайда ок Кудайдыҥ Башкарузы ӧскӧ ороонго јӱрӱп јадала, кулдарын алдыртып, олорго бойыныҥ акча-манадын артырып салган кижиге тӱҥей. 15 Бу кижи кулдарыныҥ кажызыныҥ ла аргазын кӧрӱп, бирӱзине беш талант акча, база бирӱзине эки талант, ӱчинчизине бир талант акча берип койоло, ӧскӧ ороонго јӱре берген. 16 Беш талант алганы тӱрген ле ижин баштап, база беш талант иштеп алган. 17 Анайып ла эки талант алганы база да эки талант иштеп алган. 18 Је бир талант алган кул ээзиниҥ берген акчазын алала, јерге кӧмӱп, јажырып салган.
19 Узак ӧйдиҥ бажынаҥ айылдыҥ ээзи јанып келеле, кулдарын јууп, акчала нени эткенин сурады. 20 Беш талант алганы база бежӱзин экелип: „Бийим, меге беш талант берген эдиҥ, мен база да беш талант иштеп алдым“ — деди. 21 Ээзи ого айтты: „Сен јакшы, иштеҥкей кул! Сен ас та немеде бӱдӱмјилӱ болдыҥ, оныҥ учун сеге оноҥ до кӧпти берерим. Бийиҥле кожо сӱӱн“. 22 Оноҥ эки талант алганы келип: „Бийим, меге эки талант берген эдиҥ, мен база да эки талант иштеп алдым“ — деди. 23 Бийи ого айткан: „Сен јакшы, иштеҥкей кул! Сен ас та немеде бӱдӱмјилӱ болдыҥ, оныҥ учун сеге оноҥ до кӧпти берерим. Бийиҥле кожо сӱӱн“.
24 Учында дезе бир талант алганы келип, айтты: „Бийим, сени кату кижи деп билгем. Сен ӱрен отургыспай јадыҥ, је тӱжӱмди јууп аладыҥ. Аш сокпой јадыҥ, је ашты јуунадып аладыҥ. 25 Оныҥ учун мен коркыйла, берген талант акчаҥды јерге кӧмӱп салгам. Оны кайра берип јадым“. 26 Бийи ого айтты: „Сен јаман, јалку кул! Ӱрендебеген јердеҥ јууп турганымды ла аш сокпогон јердеҥ јуунадып турганымды билген турбайыҥ? 27 Андый болзо, акчам кӧптӧп јатсын деп, улуска берип ийер керек болгон. Келеле, акчамды кожулганыла катай алар эдим“.
28 Оноҥ ол айтты: „Бу кулдыҥ талантын алала, он талантту кулга берип ийигер. 29 Кемде бар, ого оноҥ кӧп берилер, ондо артыгынча болор. Је кемде јок, бары да айрылар. 30 Бу јаман кулды караҥуйга таштап ийигер. Анда ый-сыгыт ла тиш кыјырты болор“.
31 Кижи Уулы Адазыныҥ берген јаҥын алып, ончо ангелдериле кожо келеле, бойыныҥ улу ширеезине отурып алар. 32 Оныҥ алдына ончо калыктар турар. Ол олорды койлорды эчкилердеҥ айрыган койчыдый эки јара бӧлӱп ийер. 33 Койлорды оҥ јанына, эчкилерди дезе сол јанына тургузар.
34 Ол тушта каан оҥ јанында тургандарга айдар: „Келигер, Адамныҥ алкаган улузы, телекей јайалганынаҥ бери слерге белетелип калган Башкаруныҥ алкыштарын алыгар*. 35 Нениҥ учун дезе аштап јӱреримде, меге курсак бергенеер, суузап јӱреримде, меге суу бергенеер, конотон јерим јок болордо, мени кондырганаар, 36 кийим јок јӱреримде, кийиндиргенеер, ооруп турарымда, кичееп кӧргӧнӧӧр, тӱрмеде отурарымда, келип јӱргенеер“. 37 Ол тушта акту улус кааннаҥ сураар: „Кайракан, аштап јӱрериҥде, качан сени азыраганыс? Суузап јӱрериҥде, качан сеге суу бергенис? 38 Конор јериҥ јок болордо, качан сени кондырганыс? Кийим јок јӱрериҥде, качан сени кийиндиргенис? 39 Ооруп турарыҥда эмезе тӱрмеде отурарыҥда, качан сеге келип јӱргенис?“ 40 Каан олорго айдар: „Чынын айдып турум слерге: мыны карындаштарымныҥ эҥ кичинегине эткен болороордо, меге де эткен болодоор“.
41 Оныҥ кийнинде каан сол јанында тургандарга айдар: „Кудай слерди јаргылап салган. Менеҥ кеде туругар! Дьяволго ло оныҥ ангелдерине белетелген ӧчпӧс отко баргыла. 42 Нениҥ учун дезе мен аштап јӱреримде, слер курсак бербегенеер, суузап јӱреримде, суу бербегенеер, 43 конор јерим јок болордо, кондырбаганаар, кийим јок јӱреримде, кийим бербегенеер, ооруп турарымда ла тӱрмеде отурарымда, мени кичеебегенеер“. 44 Ол тушта олор сураар: „Кайракан, сен аштап-суузап јӱрериҥде, эмезе конор јериҥ јок болордо, эмезе кийимиҥ јок болордо, эмезе ооруп турарыҥда, эмезе тӱрмеде отурарыҥда, качан бис сеге болушпаганыс?“ 45 Каан олорго каруу берер: „Чынын айдадым слерге: мыны карындаштарымныҥ эҥ кичинегине этпеген болороордо, меге де этпеген болодоор“. 46 Оныҥ учун олор јоголтылып калар, акту улус дезе јажын-чакка јӱрер».