Матфейдиҥ сӱӱнчилӱ јары
14 Ол ӧйдӧ Галилей јериниҥ башчызы И́род* Иисус керегинде куучындарды угала, 2 бойыныҥ јалчыларына айтты: «Бу Иоанн* тирилип келген, оныҥ учун ол мындый кайкалдар эдип турган». 3 Мынаҥ озо Ирод бойыныҥ Фили́пп деп аказыныҥ Иродиа́да деп ӱйи учун Иоаннды кынјылайла, тӱрмеге таштап ийген. 4 Нениҥ учун дезе Иоанн ого айдып туратан: «Јасакла болзо, сенде Иродиа́даны ӱйиҥ эдип алатан јаҥ јок». 5 Ирод Иоаннды ӧлтӱрерге сананган, је албатынаҥ коркыйла, мыны этпеди. Нениҥ учун дезе албаты Иоаннды судурчы деп кӧргӧн. 6 И́родтыҥ чыккан кӱнинде Иродиа́даныҥ кызы улус алдына бијелеген. Оныҥ бијези Иродко сӱреен јарады. 7 Оныҥ учун кыстыҥ кандый ла кӱӱнин бӱдӱрер деп сӧзин берген. 8 Кыс энезиниҥ айтканыла, Иоанныҥ бажын табакка экелзин деп сурады. 9 Каан кунуга берди, је улус алдына сӧзин бергени учун кыстыҥ сураганын бӱдӱрип салзын деп јакарып, 10 Иоанныҥ бажын кезе чапсын деп, улузын тӱрмеге ийди. 11 Иоанныҥ бажын табакка салала, кыска экелип берерде, ол оны энезине апарып берген. 12 Мыныҥ кийнинде Иоанныҥ ӱренчиктери келип, оныҥ сӧӧгин алала, јууп салдылар. Оноҥ не болгонын ончозын Иисуска барып, куучындап бергиледи. 13 Мыны уккан кийнинеҥ Иисус јаҥыскан болуп ийерге, кемеге отурып, улус јок јерге барды. Је башка-башка калалардыҥ улузы мыны угуп ийеле, ары јойу бардылар.
14 Иисус кеменеҥ чыгып келеле, кӧп улусты кӧрӧлӧ, ичи ачыды, оныҥ учун оору-јоболдуларды јасты. 15 Эҥир кире берерде, ӱренчиктери келип, Иисуска айттылар: «Мында улус јок јер, орой до болуп калды. Улус јурттарга барып, бойлорына курсак садып алзын». 16 Је Иисус айтты: «Олорды тегин јерге аткарбагар. Слер олорго курсакты беригер». 17 Ӱренчиктери Иисуска айтты: «Бисте беш калаштаҥ ла эки балыктаҥ ӧскӧ не де јок». 18 «Оны бери экелигер» — деп, Иисус олорго айтты. 19 Оныҥ кийнинде Иисус улусты ӧлӧҥгӧ отурып алзын деп айдала, беш калашты ла эки балыкты алып, теҥериге кӧрӧлӧ, мӱргӱп ийди. Оноҥ ол калашты сындырып, ӱренчиктерине берди, олор дезе улуска ӱледи. 20 Ончо улус тойо ажанып алды. Арткан-калган калашты јууп ийерде, 12 корзина чыкты. 21 Ажанган улустыҥ тоозы, ӱй улусты ла балдарды тоого албаза, 5 000 кире эр кижи болгон. 22 Мыныҥ кийнинеҥ ле Иисус ӱренчиктерин кемеге отурып, ары јаратка барзын деп айдала, бойы дезе албатыны ӱйдежип ийерге, артып калды.
23 Иисус улусты ӱйдежип ийеле, мӱргӱӱрге, кырга чыкты. Ол анда караҥуй киргенче, јаҥыскан болгон. 24 Оныҥ ӱренчиктери дезе јараттаҥ канча јӱс метрге* ыраак јӱре берген. Бу ӧйдӧ удура салкын согуп турарда, олордыҥ кемезин толкулар ары-бери таштап турды. 25 Таҥ алдында Иисус талайла ӱренчиктерине барды. 26 Олор Иисустыҥ сууныҥ ӱстиле базып келеткенин кӧрӱп ийеле, «Кӧс кӧрӱп турус» — деп бодойло, коркып, кыйгырыжа бердилер. 27 Је Иисус олорго айтты: «Коркыбагар! Бу мен». 28 Пётр сурады: «Кайракан, бу сен болзоҥ, мени сеге удура суула бассын деп айтсаҥ». 29 Иисус: «Кел!» — деерде, Пётр кеменеҥ чыгала, сууныҥ ӱстиле Иисуска удура базып ийди. 30 Је јотконды кӧрӧлӧ, коркый береле, чӧҥӱп баштады. Оныҥ учун: «Кайракан, меге болуш!» — деп кыйгырды. 31 Бу ла ӧйдӧ Иисус оныҥ колынаҥ тудуп алала: «Бӱдӱмјиҥ кайда барды? Нениҥ учун алаҥзый бердиҥ?» — деп айтты. 32 Оноҥ олор кемеге отурып аларда, салкын токтой берген. 33 Бу ӧйдӧ кемеде отургандар ого бажырала, айдышты: «Сен чын ла Кудайдыҥ Уулы». 34 Олор талайды кечеле, Геннисаре́т деп јерге једип барган.
35 Ондо улус Иисусты танып ийди. Ол керегинде айландыра јерлерде угула берерде, ого оору улустыҥ ончозын экелдилер. 36 Олор Иисустыҥ кийиминиҥ эдегине де болзо тийип ийерге јайнадылар. Тийген улустыҥ ончозы јазылып турды.