Матфейдиҥ сӱӱнчилӱ јары
19 Мыныҥ ончозын айдала, Иисус Галилей јеринеҥ чыгып, Иорданныҥ ары јанына, Иудеяныҥ јанындагы јерге једип барган. 2 Оны ээчий барган сӱреен кӧп улусты Иисус јазып турды.
3 Иисуска фарисейлер базып келеле, оны ченеерге сурадылар: «Эр кижи бойыныҥ ӱйинеҥ кандый ла шылтактаҥ улам айрылар аргалу ба?» 4 Иисус айтты: «Кычырбаган бедеер, Јайаачы эр ле ӱй кижини јайап, 5 айткан: „Оныҥ учун эр кижи бойыныҥ ада-энезин артыргызып, ӱйиле јаантайын кожо јӱрер*, бир эт кан болор“? 6 Айдарда, олор эмди эки эмес, је бир эт-кан. Оныҥ учун Кудайдыҥ бириктиргенин* кижи айрыбас учурлу». 7 Фарисейлер Иисустаҥ сурадылар: «Андый болзо, нениҥ учун Моисей эр кижиге ӱйине айрылыжатан бичик берип, оныла айрылыжарга јарадып салган?» 8 Иисус олорго айткан: «Јӱректереер катуланып калган учун Моисей слерге ӱйлереерле айрылыжарга јараткан, је озо баштап андый болбогон. 9 Айдып турум слерге: эр кижи, ӱйи ӧскӧ кижиле конбогон до болзо, оныла айрылып, ӧскӧ ӱй кижи алза, кейтиген болот».
10 Ӱренчиктери ого айтты: «Андый болотон болзо, ары ла кижи албаза торт». 11 Иисус олорго айтты: «Анайып кезик улус јӱрӱп болбос, јӱк андый сый алган улус јӱрет. 12 Нениҥ учун дезе кезик улус энедеҥ чыгарда кижи алар аргазы јок болуп чыккан. Кезигин улус анай эдип салган. Је кезиги теҥеридеги Башкаруга болуп кижи албай јат. Кем јаҥыскан јӱрер аргалу, анайып ла јӱрзин».
13 Оноҥ улус Иисуска кичинек балдарды экелип турарда, Иисус олорды алкап*, олор учун мӱргӱп турды. Је ӱренчиктерине бу јарабаган. 14 Ол тушта Иисус айтты: «Балдар меге келзин, олорды токтотпогор. Нениҥ учун дезе теҥеридеги Башкаруга олордый улус кирер». 15 Иисус балдарды алкап* ийеле, анаҥ јӱре берди.
16 Оныҥ кийнинде Иисуска јиит уул базып келеле, сурады: «Ӱредӱчи, меге јажын-чакка јӱрерге, јакшы кандый керектер эдер керек?» 17 Иисус айтты: «Мыны менеҥ не сурайдыҥ? Нези јакшы деп, јӱк Кудай билер. Је јажын-чакка јӱрерге турган болзоҥ, јасактарды бӱдӱрип јӱр». 18 Ол: «Кандый јасактарды?» — деп сураарда, Иисус каруу јандырды: «Кижи ӧлтӱрбе, эш-нӧкӧриҥ эмес кижиле конбо, уурданба, тӧгӱн неме айтпа, 19 ада-энеҥди тооп јӱр, анайда ок јуугыҥды бойыҥды чылап сӱӱп јӱр». 20 Ол уул: «Мыны ӱзе мен бӱдӱрип јадым. База нени эдейин?» — деерде, 21 Иисус ого айтты: «Бир де јек јок кижи болорго турган болзоҥ, барып јӧӧжӧҥди садып ийеле, акчазын јокту улуска ӱлеп бер. Ол тушта сениҥ јӧӧжӧҥ теҥериде болор. Оноҥ келип, мени ээчий бар». 22 Уул бу сӧстӧрди угуп, кунуга береле, јӱре берген, нениҥ учун дезе ол коркышту бай болгон. 23 Иисус дезе ӱренчиктерине айтты: «Чынын айдадым слерге: бай кижиге теҥеридеги Башкаруга кирерге јеҥил эмес болор. 24 База айдадым слерге: бай кижиге Кудайдыҥ Башкарузына кирерине кӧрӧ, тӧӧгӧ ийне ӱйдинеҥ ӧдӧргӧ јеҥил болор».
25 Ӱренчиктер мыны угала, алаҥ кайкажып сурадылар: «Андый болзо, кем аргадалатан?» 26 Иисус олорго кӧрӧлӧ, айтты: «Улус мыны эдип болбос, је Кудайдыҥ эдип болбозы јок».
27 Ол тушта Пётр айтты: «Бис ончо бар немегисти артыргызып, сени ээчий бардыс. Бу учун бис нени аларыс?» 28 Иисус дезе олорго айтты: «Чынын айдадым слерге: ӱзе неме јаҥыртылып јаткан тушта кижи Уулы јаркындалган ширеезине отурып алза, слер, мениле кожо јӱргендер, 12 ширееге отурып, Израильдиҥ 12 угын јаргылаараар. 29 Кем мениҥ адыма болуп, айыл-јуртын артыргызар, эмезе ака-карындаштарын, эмезе эје-сыйындарын, эмезе адазын, эмезе энезин, эмезе бала-барказын, эмезе јерлерин артыргызып салза, јӱс катапка кӧп алар ла ӱргӱлјиге јӱрер.
30 Је баштапкы болгондордыҥ кӧп сабазы калганчы болор, калганчы болгондоры баштапкы болор.