Матфейдиҥ сӱӱнчилӱ јары
7 Улусты јаргылабагар, улус та слерди јаргылабас. 2 Нениҥ учун дезе слер улусты канайып јаргылаараар, Кудай да слерди анайда јаргылаар, улуска канайып баштанарыгар, олор до слерге анайып ла баштанар. 3 Бойыҥныҥ кӧзиҥдеги тоормошты кӧрбӧй јадып, карындажыҥныҥ кӧзиндеги тегенекти не кӧрӧдиҥ? 4 Бойыҥныҥ кӧзиҥде тоормош болордо, карындажыҥа: «Кажы, кӧзиҥнеҥ тегенекти чыгарып ийейин» — деп, канайып айдадыҥ? 5 Уйады јок кижи! Озо баштап бойыҥныҥ кӧзиҥнеҥ тоормошты чыгарып ал, ол тушта карындажыҥныҥ кӧзинеҥ тегенекти канайып чыгарарын кӧрӱп ийериҥ.
6 Агару немени ийттерге бербегер, алтын-мӧҥӱнди чочколорго таштабагар, оноҥ башка олор баалу-чуулу немелерди тепсеп, удура келип, слерди јара тартып салар.
7 Кудайдаҥ сурап туругар — ол слерге берер, бедиреп туругар — табып алараар, токулдадып туругар — ол слерге эжикти ачып берер. 8 Нениҥ учун дезе сураган кижи алып јат, бедиреген кижи таап алат, токулдаткан кижиге — ачылат. 9 Балагар слердеҥ курсак сураза, слер ого таш бербей јадыгар дезеер, 10 эмезе балык сураза, јылан бербей јадыгар не? 11 Айдарда, слер де, ада-энелер, кинчектӱ де болзоор, балдараарга јакшы сыйлар эдип турараарда, теҥеридеги Адагар да слерге керектӱ немени бербес пе?
12 Улусты слерге канайып баштанзын деп турганаар, бойыгар да олорго анайып ла баштаныгар. Бу дезе Јасактыҥ ла судурчылардыҥ* тӧс ӱредӱзи.
13 Чичке эжиктеҥ киригер, нениҥ учун дезе јаан эжик ле јалбак јол ӧлӱмге апарат. Кӧп улус бу эжиктеҥ кирет. 14 Је чичке эжик ле чичке јол јӱрӱмге апарат. Бу јолды ас улус табат.
15 Тӧгӱнчи улустаҥ чеберленигер. Олор слерге кой терезин кийип алган келет, је чынынча болзо, олор — казыр бӧрӱлер. 16 Слер олорды керектеринеҥ танып ийереер. Тегенектӱ јыраада виноград эмезе тату јиилек бӱдер бе? 17 Јакшы агаштаҥ јакшы јиилек бӱдет, чирип калган агаштаҥ јаман јиилек бӱдет. 18 Јакшы агаштаҥ јаман јиилек бӱтпей јат, чирип калган агаштаҥ јакшы јиилек бӱтпей јат. 19 Јакшы јиилек экелбей турган агашты кезе чабала, отко таштап ийет. 20 Айдарда, слер андый улусты эдип турган керектеринеҥ танып ийереер.
21 Меге «Кайракан, Кайракан» — деп айдып турган кандый ла кижи Кудайдыҥ теҥеридеги Башкарузына кирбес. Је јӱк теҥеридеги Адамга сӧсуккур улус кирер. 22 Ол кӱнде меге кӧп улус мынайып айдар: «Кайракан, Кайракан, сен керегинде улуска куучындаганысты, сениҥ адыҥды адап, кӧрмӧстӧрди чыгара сӱргенисти, анайда ок сениҥ ийде-кӱчиҥле кӧп кайкамчылу немелер эткенисти ундыбаган болбойыҥ?» 23 Ол тушта олорго мынайып айдарым: «Мен слерди билбезим! Менеҥ кеде турыгар, јаман керектер эдип турган улус!»
24 Анайдарда, бу сӧстӧрди угала, бӱдӱрип турган кижи туразын кайа-ташка туткан ойгор кижиге тӱҥей. 25 Јаҥмыр јаап, суу кӧдӱрилип, тыҥ салкын болордо, ол тура бузылбаган, нениҥ учун дезе ол кайа таштыҥ ӱстинде тудулган. 26 Је бу сӧстӧрди угала, бӱдӱрбей турган кижи туразын кумактыҥ ӱстине туткан тенек кижиге тӱҥей. 27 Јаҥмыр јаап, суу кӧдӱрилип, тыҥ салкын болордо, ол тура јемирилип калган.
28 Улус Иисустыҥ куучын-эрмегин угуп, сӱреен кайкажып турдылар, 29 нениҥ учун дезе ол Јасактыҥ ӱредӱчилери чилеп эмес, је Кудайдаҥ ийилген кижи чилеп ӱреткен.