Матфейдиҥ сӱӱнчилӱ јары
10 Иисус 12 ӱренчигин алдыртып, олорго кӧрмӧстӧр сӱретен ле кандый ла оору-јоболды јазатан јаҥ берген.
2 12 апостолдыҥ ады-јолы мындый: Пётр деп адалып турган Си́мон, оныҥ карындажы Андрей; Зеведейдиҥ уулдары, Иаков ло оныҥ карындажы Иоанн; 3 Филипп ле Варфоломе́й; Фома ла калан* јууган Матфей; Алфейдиҥ Иаков деп уулы ла Фадде́й; 4 Си́мон Канани́т ле Иисусты садып ийген Иуда Искарио́т.
5 Иисус бу 12 ӱренчигин аткарып, айтты: «Еврей эмес улуска барбагар, Самар јериниҥ калаларына кирбегер, 6 је Израильдиҥ јылыйып калган койлорына барыгар. 7 Барып, олорго мынайып јарлагар: „Теҥеридеги Башкару јууктап келди!“ 8 Оору улусты эмдегер, божогон улусты тиргизеер, југуш балулу* улусты арутагар, кӧрмӧстӧрди сӱригер. Кудайдаҥ тегинге алганыгар — улуска тегинге беригер. 9 Курчанган кураарга алтын да, мӧҥӱн де, јес те салбагар, 10 кожо сумка да, артык кийим де, ӧдӱк те, тайак та албагар, нениҥ учун дезе ишчи курсак-тамак јок артпас.
11 Кандый бир калага эмезе јуртка келзеер, јарды уккадый улус бедирегер, анда јӱргенчеер ле олордо артыгар. 12 Кандый бир айылга кирип барзаар, ондогы улусла јакшылажып ийигер*. 13 Айылда улус јарды алынза, олорго алкыжаар јетсин, алынбаза, алкыжаар слерге кайра келзин. 14 Кандый бир јерде слерди уткыбаза, слерди укпаза, ол айылдаҥ эмезе каланаҥ јӱрӱп јатсагар, будыгарда тоозынды кактап салыгар. 15 Чынын айдадым слерге: јаргыныҥ Кӱнинде Содо́м ло Гомо́ррага ол калага кӧрӧ јеҥил болор.
16 Мен слерди бӧрӱлерге койлорды чылап ийип јадым, оныҥ учун јыландый ајарыҥкай болугар, кӱӱледий чӱм јок болугар. 17 Улусла ајарыҥкай болугар, нениҥ учун дезе олор слерди јаргыга берер, синагогаларда* согор. 18 Мен учун слерди башчыларга ла каандарга апарар, анайып олор ло ӧскӧ укту албатылар мен керегинде угар. 19 Слерди јаҥда отурган улуска апарза, нени канайып айдар деп санааркабагар, нениҥ учун дезе нени айдары слерге берилер. 20 Слер учун бойыгар эмес, Адагардыҥ тыны айдар. 21 Аказы карындажын ӧлӱмге берер, карындажы аказын, адазы — балазын. Балдар ада-энезине удура чыгып, олорды ӧлӱмге бергилеер. 22 Слерди мениҥ адым учун ончо улус кӧрӧр кӱӱни јок болор, је учына јетире чыдашканы аргадалар. 23 Слерди бир калада истешсе, ӧскӧзине качыгар. Чынын айдадым слерге: Израильдиҥ ончо калаларын ӧткӧлӧгӧрдӧ, кижи Уулы једип келер.
24 Ӱренчик ӱредӱчизинеҥ бийик болбой јат, кул дезе бийинеҥ бийик болбой јат. 25 Ӱредӱчизи кандый болгон, ӱренчиги де андый болор, бийи кандый болгон, кулы да андый болор. Айылдыҥ ээзин Веельзеву́л* деп адаган болордо, оныҥ улузын да анайып адабас па? 26 Олордоҥ коркыбагар. Јажырганы кӧрӱне берер, јажыттузы ачыла берер. 27 Караҥуйда айтканымды јарыкта айдыгар, шымыранып айтканымды ӱзе улуска јарлагар. 28 Эт-канды ӧлтӱрип ийер, је тынды ӧлтӱрип* болбойтон улустаҥ коркыбагар, је гее́ннада тынды да, эт-канды да ӧлтӱрип салатаннаҥ коркыгар. 29 Эки боро кучыйакты бир ле оок акчага садып јат. Андый да болзо, олордыҥ бирӱзи де јерге келип тӱшсе, Адагар оны кӧрӱп јат. 30 Слердиҥ дезе бажыгардыҥ кажы ла кылы тоололып калган. 31 Айдарда коркыбагар, слер кӧп боро кучыйактардаҥ баалу.
32 Кем мени улус алдына билерим деп айдар, мен де оны теҥеридеги Адам алдына билерим деп айдарым. 33 Је кем мени улус алдына билбезим деп айдар, мен де оны теҥеридеги Адам алдына билбезим деп айдарым. 34 Мени јерге амыр экелген деп сананбагар. Мен амырды эмес, бӧлӱниш экелгем. 35 Мен уулын адазынаҥ айрыырга, кызын энезинеҥ, келдин кайын энезинеҥ айрыырга келгем. 36 Кижиге айылдагы улузы ӧштӱлер болуп калар. 37 Кем адазын эмезе энезин менеҥ тыҥ сӱӱр, мениҥ ӱренчигим болбос; кем уулын эмезе кызын менеҥ тыҥ сӱӱр, база мениҥ ӱренчигим болбос. 38 Кем кыйналатан тӧҥӧжин алып, мениҥ кийнимнеҥ барбай турган — меге ӱренчик болбос. 39 Бойыныҥ тынын* аргадаарга турган кижи онызын јылыйтар, је меге болуп тынын јылыйткан кижи оны кайра алар.
40 Кем слерди тооп турган, мени де тооп јат, а мени тооп турганы мени ийгенди де тооп јат. 41 Судурчыны тооп турган кижи судурчы чылап кайралдалар, акту кижини тооп турган кижи акту кижи чилеп кайралдалар. 42 Кем бу јобош улустыҥ бирӱзине, мениҥ ӱренчигим болгоны учун, бир айак соок суу да берзе, чынын айдадым слерге: андый кижи кайрал јок артпас».