Матфейдиҥ сӱӱнчилӱ јары
4 Оныҥ кийнинде тын* Иисусты чӧлгӧ апарган. Анда оны Дьявол ченеп баштады. 2 Иисус 40 тӱш, 40 тӱн курсак јибей јӱрди*, оныҥ учун тыҥ аштай берген. 3 Бу тушта Дьявол ого базып келеле: «Сен Кудайдыҥ уулы болзоҥ, бу таштарга калаш боло берзин деп јакар» — деди. 4 Је Иисус ого айтты: «Кудайдыҥ Сӧзинде айдылганыла: „Кижи јӱк ле калашла эмес, је Иегованыҥ сӧзиле тирӱ јӱрет“».
5 Ол тушта Дьявол оны агару калага апарала, ӧргӧӧниҥ эҥ бийик јерине тургузала, 6 айтты: «Сен Кудайдыҥ уулы болзоҥ, тӧмӧн калып ий. Бичилген сӧс бар эди: „Ол бойыныҥ ангелдерине јакарып ийзе“, „олор сени будыҥ ташка согулбазын деп, тудуп алгылаар“». 7 Иисус ого айтты: «Мындый да сӧстӧр бар: „Иегова Кудайыгарды ченебегер“».
8 Оныҥ кийнинде Дьявол оны коркышту бийик кырга алып, ого улустыҥ ончо башкаруларын ла олордыҥ магын кӧргӱсти. 9 Оноҥ айтты: «Тизеленип, меге бажырып ийзеҥ, мыныҥ ончозын сеге берип ийерим». 10 Је Иисус айтты: «Кеде тур, Сатана! Бичилген јок беди: „Иегова Кудайыгарга бажырыгар, јӱк ого иштегер“». 11 Дьявол Иисустаҥ јӱре берерде, ангелдер ого болужарга келди.
12 Иисус Иоаннды тӱрмеге отургызып салганын угуп ийеле, Галилей јерине јӱре берди. 13 Назаретте болгон кийнинеҥ, Иисус талайдыҥ јанындагы Капернау́м деп калада токтоды. Бу кала Завуло́н ло Неффалимниҥ јерлеринде турган. 14 Анайып, Иса́йя судурчыныҥ айтканы бӱтти: 15 «Ӧскӧ албатылардыҥ Галилей јери! Талай јаар баратан јолдо турган, Иордан сууныҥ ары јанында Завуло́н ло Неффалимниҥ јерлери! 16 Караҥуйда јӱрген улус улу јаркын кӧрӱп ийди. Ӧлӱмниҥ кӧлӧткӧзине бӱркеткен улусты јаркын јарыдып ийди». 17 Ол ӧйдӧҥ ала Иисус: «Кинчегерди алыныгар, теҥеридеги Башкару јууктап келди!» — деп айдып баштаган.
18 Иисус Галилей талайдыҥ јаныла барып јадала, Си́монды ла оныҥ карындажын Андрейди кӧрӱп ийди. Си́монныҥ база бир ады Пётр болгон. Олор балык шӱӱндеп турдылар, нениҥ учун дезе олор балыкчылар болгон. 19 Иисус олорго: «Мени ээчий барыгар, улусты канайып тударын кӧргӱзип берейин» — деди. 20 Олор шӱӱндерин тӱрген ле артыргызала, Иисусла кожо бардылар. 21 Иисус оноҥ ары барып јадала, база эки карындашты, Зеведейдиҥ Иаков ло Иоанн деп уулдарын, кӧрӱп ийди. Олор адазыла кожо кемеде шӱӱндерин јазап јатты. Иисус олорды да айдып алган. 22 Олор капшай ла адазын ла кемезин артыргызып, оныла кожо бардылар.
23 Иисус бӱдӱн Галилеяла базып, синагогаларда* улусты ӱреткен, удабас Кудай башкарып баштаар деп јарлаган, анайда ок улустыҥ кандый ла оору-јоболын јаскан. 24 Иисус керегинде табыш бастыра Сирияла јайыла берди. Ого кандый ла оорулу улусты экелип туратан: ичине кӧрмӧстӧр кирип калган улусты, талгак улусты, оорудаҥ улам кыймыктанып болбой турган улусты. Олордыҥ ончозын Иисус јазып туратан. 25 Оныҥ учун Иисустыҥ кийнинеҥ ал-камык улус јӱретен. Ол улус Галилеянаҥ, Он-Каланаҥ, Иерусалимнеҥ, Иудеянаҥ ла Иордан сууныҥ ары јанындагы јерлердеҥ болгон.