Матфейдиҥ сӱӱнчилӱ јары
27 Эртен тура абыстардыҥ јаандары ла албатыныҥ аксагалдары јуулыжала, Иисусты канайып ӧлтӱрерин куучындаштылар. 2 Олор оныҥ колын кӱлийле, Пилат деп башкараачыга табыштырып бердилер.
3 Иисустыҥ ӧлӱмге јаргыладып салганын Иуда угуп ийеле, бойын јинип баштаган. Ол оны садып ийгени учун алган 30 мӧҥӱн акчаны абыстардыҥ јаандарына ла аксагалдарга ойто кайра экелип берген. 4 Иуда олорго айтты: «Акту кижини садып, кинчек эттим». Је олор ого: «Биске мыны не айдып туруҥ. Бойыҥ кӧр» — дедилер. 5 Иуда мӧҥӱн акчаны јерге таштап ийеле, ӧргӧӧнӧҥ чыгала, барып, буунып койды. 6 Абыстардыҥ јаандары дезе бу акчаны јууйла: «Бу акча кан учун тӧлӧлгӧн баа, оны ӧргӧӧниҥ акча салатан агару јерине саларга јарабас» — дештилер. 7 Оныҥ учун јӧптӧжӧлӧ, оныла туш улустыҥ сӧӧгин јууп турарга, той балкашла узанып турган кижиниҥ јерин садып алдылар. 8 Оныҥ учун бу јер эмдиге јетире Кан-Јалаҥ деп адалат. 9 Анайып судурчы Иереми́я ажыра айдылганы бӱтти: «Олор израильтяндардыҥ бу кижи учун тӧлӧӧр эдип тургускан баазын, 30 мӧҥӱн акчаны, алала, 10 Иегованыҥ айтканыла, той балкашла узанып турган кижиниҥ јерин садып алган».
11 Иисусты Пилатка экелдилер. Пилат: «Сен иудейлердиҥ кааны ба?» — деп сураарда, Иисус: «Каруузын сен бойыҥ бердиҥ» — деди. 12 Је качан оны абыстардыҥ јаандары ла аксагалдар бурулап турарда, ол унчукпай турды. 13 Ол тушта Пилат: «Угуп туруҥ ба, кандый кӧп немеде сени бурулап јат?» — деп айдарда, 14 Иисус оноҥ ло ары унчукпай турды. Башчы мыны кӧрӧлӧ, сӱреен кайкады.
15 Башчыда Пасханыҥ байрамы тужында албатыныҥ талдаган кижизин тӱрменеҥ јайымдап ийетен јаҥжыгу болгон. 16 Бу ӧйдӧ тӱрмеде јаман керектериле јарлу Вара́вва деп кижи отурган. 17 Оныҥ учун Пилат јуулган албатынаҥ сурады: «Кемди слерге јайымдап берейин: Вара́вваны ба эмезе Христос деп адалып турган Иисусты ба?» 18 Олор Иисусты, кӱйӱнип турганы учун экелген деп, Пилат билер болгон. 19 Анайда ок Пилат јаргы чыгарар јеринде отурганча, ого ӱйиниҥ мындый сӧстӧрин јетирдилер: «Бу акту кижиге тийбе, ол учун тӱш јеримде тыҥ кыйналдым». 20 Је абыстардыҥ јаандары ла аксагалдар улусты тӱрменеҥ Вара́вваны јайымдап, Иисусты дезе ӧлтӱрип салзын деп сураарына тектерип ийдилер. 21 Пилат ойто ло сурады: «Бу экӱниҥ кемизин слерге јайымдап берейин?» Олор: «Вара́вваны!» — дештилер. 22 Пилат сурады: «Андый болзо, Христос деп адалып турган Иисусты канайдайын?» Олор: «Тӧҥӧшкӧ када оны!» — деп кыйгырыштылар. 23 Пилат: «Нениҥ учун? Кандый јаман керек эткен ол?» — деп сураарда, олор: «Тӧҥӧшкӧ када оны!» — деп, оноҥ тыҥ кыйгырыжа бердилер.
24 Пилат улустыҥ там ла там тӱймеп турганын кӧрӧлӧ, олордыҥ алдына колын суула јунуп ийеле: «Бу кижиниҥ ӧлӱминде мениҥ буруум јок. Каруузына бойоор турараар» — деди. 25 Је ончо улус: «Оныҥ ӧлӱминде бистер де, бистиҥ бала-баркабыс та бурулу болгойыс» — дешти. 26 Оныҥ учун Пилат Вара́вваны јайымдап, Иисусты дезе камчылайла, тӧҥӧшкӧ кадап, ӧлтӱрзин деп јакарды.
27 Јуучылдар Иисусты башчыныҥ байзыҥына апарала, оны айландыра ончо јуучылдарды јууп ийдилер. 28 Оноҥ Иисустыҥ кийимин уштыйла, кызыл ӧҥдӱ бӧсти јардына салып бердилер. 29 Бажына дезе тегенектӱ ӧрӱмел кийдирип, оҥ колына тайак тудундырып береле, оныҥ алдына тизеленип: «Уткып јадыс, иудейлердиҥ кааны!» — деп каткырыжып турдылар. 30 Олор ого тӱкӱрип, бажына тайакла согуп турды. 31 Иисусты канай ла базынган кийнинеҥ, олор кызыл бӧсти ушта тартала, ого бойыныҥ кийимин кийдирип, тӧҥӧшкӧ кадаарга апардылар.
32 Олор каланаҥ чыгып јадала, Кире́наныҥ Си́мон деп кижизине туштаган. Бу кижини олор Иисусты кадап ӧлтӱретен тӧҥӧшти апарзын дедилер. 33 Олор Голго́фа эмезе «Куу-Баш» деп адалып турган јерге келеле, 34 Иисуска ачу неме* кожуп салган кызыл аракы берерде, ол амзап кӧрӧлӧ, ичпеди. 35 Олор оны тӧҥӧшкӧ јаба кадайла, шеребей таштап, тыш кийимин ӱлешкен кийнинеҥ, 36 оны каруулдаарга отурып алдылар. 37 Бажыныҥ ӱсти орто оныҥ неде бурулатканын кӧргӱзип турган бичик тагып салдылар. Анда «Иудейлердиҥ кааны, Иисус» деп бичилген болгон.
38 Иисустыҥ јанына эки каршучыл кижини кадап салгандар: бирӱзин оҥ јанына, экинчизин сол јанына. 39 Олордыҥ јаныла ӧдӱп јаткан улус Иисусты јамандагылап, баштарын јайкап, 40 айдыжып турдылар: «Эй, ӧргӧӧни бузала, ӱч ле кӱнге тудуп салар болдыҥ не! Эмди бойыҥды аргада! Кудайдыҥ уулы болзоҥ, тӧҥӧштӧҥ тӱш!» 41 Абыстыҥ јаандары ла јасактыҥ ӱредӱчилери, анайда ок аксагалдар Иисусты база шоодып турдылар: 42 «Улусты аргадаган, је бойын аргадап болбой јат! Ол Израильдиҥ кааны эмес беди? Андый болзо, тӧҥӧштӧҥ тӱшсин! Ол тушта ого бӱде берерис. 43 Ол Кудайга иженген эди. Кудайга керектӱ болзо, оны аргадазын. Ол бойын Кудайдыҥ Уулы деди не». 44 Јанында кадаткан улус оны база анайып ла шоодып турдылар.
45 Тал тӱш киредеҥ* ала ол јердиҥ ӱстине* караҥуй тӱжӱп, ӱч саатка јетире* турды. 46 Ӱч саат кирезинде дезе Иисус: «Эли́, Эли́, лама́ савахфани́?» — деп, тыҥ кыйгырып ийди. Мынызы «Кудайым, Кудайым, мени не артыргызып салдыҥ?» дегени. 47 Анда тургандардыҥ кезиги мыны угала: «Ол Ильяны кыйгырып туру» — дештилер. 48 Олордыҥ бирӱзи јӱгӱрип барала, јымжак неме* алала, ачып калган кызыл аракыга шиҥдиреле, агашка илип, Иисуска ичерге берди. 49 Је кезиктери айдыштылар: «Кайдарга туруҥ оны! Илья оны аргадаарга келер бе деп кӧрӱп ийектер». 50 Иисус дезе база катап тыҥ кыйгырып ийеле, божой берди.
51 Бу ла ӧйдӧ агару јердиҥ кӧжӧгӧзи ӱстинеҥ ала јерге јетире эки јара јыртыла берди. Јер силкинип, кайа таштар силкинди. 52 Сӧӧк салган јерлер ачылып, агару улустыҥ сӧӧктӧри чыгара ташталды. 53 Мыны кӧп улус кӧргӧн. (Сӧӧк салган јердиҥ јанында болгон улус Иисустыҥ тирилген кийнинеҥ агару калага келген.) 54 Јӱс јуучылдыҥ башчызы ла оныла кожо Иисусты каруулдаган улус јер силкингенин ле анда болгон немениҥ ончозын кӧрӧлӧ, тыҥ коркыйла: «Ол чыннаҥ ла Кудайдыҥ Уулы болгон» — деп айдышты.
55 Мыныҥ ончозын Иисусла кожо Галилей јеринеҥ бери јӱрӱп, ого болушкан кӧп ӱй улус ыраагынаҥ кӧрӱп турды. 56 Олордыҥ ортозында Мария Магдалина, Иаков ло Иосифтиҥ энези, Мария, анайда ок Зеведейдиҥ уулдарыныҥ энези болды.
57 Эҥиргери Аримафейдеҥ Иосиф деп бай кижи келген. Ол база Иисустыҥ ӱренчиги болгон. 58 Ол дезе Пилатка барала, Иисустыҥ сӧӧгин сураарда, Пилат оны берип ийзин деп јакару берди. 59 Иосиф Иисустыҥ сӧӧгин алала, оны кӱделинеҥ* эдилген јука ару бӧслӧ ороп, 60 кайада ойгон, јаҥы эткен сӧӧк салар јерине салып койды. Киретен јерин дезе јаан ташла бӧктӧйлӧ, јӱре берди. 61 Мария Магдалина ла база бир Мария дезе сӧӧк салган јердиҥ јанында артып калдылар.
62 Эртезинде, суббот кӱнге белетенетен кӱн ӧдӧ берерде, абыстардыҥ јаандары ла фарисейлер Пилатта јуулыштылар. 63 Олор ого айтты: «Ол тӧгӱнчи неме тирӱ тужында: „Ӱч кӱннеҥ тирилерим“ — деп айдып туратан. 64 Оныҥ учун сӧӧк салган јерди ӱч кӱн каруулдазын деп јакару бер. Оноҥ башка ӱренчиктери оныҥ сӧӧгин уурдап апарала, албатыга: „Ол тирилип калды!“ — деп айдыжар. Ол тушта бу тӧгӱн баштапкы тӧгӱннеҥ канча катапка јаман болор». 65 Пилат олорго айтты: «Каруулчыктарды берейин. Каруулдайтан болзоор, каруулдагар». 66 Олор барала, сӧӧк салган јердиҥ оозындагы ташты быжулап бӧктӧйлӧ, каруулчыктар тургузып салдылар.