Матфейдиҥ сӱӱнчилӱ јары
3 Ол ӧйлӧрдӧ Иудеяныҥ чӧл јеринде Иоанн* јарлап баштаган. 2 Ол айдатан: «Кинчегерди алыныгар, теҥеридеги Башкару јууктап келди!» 3 Иоанн керегинде судурчы Иса́йя мынайып айткан: «Чӧл јерде тыҥ ӱн угулат: „Иеговага јол белетегер! Оны тӱзедигер!“». 4 Иоанн тӧӧниҥ тӱгинеҥ эткен кийим кийген, кайыш кур курчанган, а јиген курсагы дезе черткиш ле јердиҥ адарузыныҥ мӧди болгон. 5 Ого Иерусалимнеҥ, бастыра Иудей јериниҥ ле Иордан сууныҥ јанындагы јерлердиҥ улузы келип туратан. 6 Олор Иоаннга келип, кинчектерин ачыгынча айдып, Иорданда чӧҥӱрилип* туратан.
7 Иоанн сууга чӧҥӱрилер јерге кӧп фарисейлер* ле саддукейлер* келип јатканын кӧрӱп ийеле, олорго айткан: «Коронду јыланныҥ балдары, Кудай јаманды јоголтып келзе, слерди кату каруузына тургуспас деп сананып турганаар ба? 8 Кинчегерди алынып турганаарды керектереерле кӧргӱзигер. 9 Слерде: „Бистиҥ Адабыс — Авраам“ — деп айдар јаҥаар јок. Айдып турум слерге, Кудай Авраамга бу ла таштардаҥ балдар јайап берер аргалу. 10 Агаштыҥ тӧзинде малта јадыры. Јакшы тӱжӱм экелбей турган кажы ла агаш кезе чабылып, отко ташталар. 11 Мен слерди кинчегерди алынып турганыгар учун сууга чӧҥӱрип* јадым, је кийнимнеҥ келип јатканы менеҥ кӱчтӱ. Мен оныҥ ӧдӱгин де уштыырга турбазым. Ол слерди агару тынла, отло чӧҥӱрер. 12 Ол колындагы кӱрекле ашты саазынаҥ айрып, аш согор јерди арутайла, буудайды амбарларга салып койор. Саазын дезе ӧчпӧйтӧн отко ӧртӧӧр».
13 Ол ӧйдӧ Иисус Галилей јеринеҥ чыгала, Иордан сууга чӧҥӱрилерге, Иоаннга келген. 14 Је Иоанн оны токтодып, айтты: «Сен не меге келдиҥ? Карын сен мени чӧҥӱрер учурлу!» 15 Је Иисус ого: «Мени токтотпо, бис анайып Кудайдыҥ айтканын бӱдӱрип саларыс» — деерде, Иоанн јӧпсине берген. 16 Иисус сууга чӧҥӱрилеле, чыгып ла келерде, теҥери ачыла берген. Иоанн Кудайдыҥ тыны кӱӱле чилеп Иисуска тӱжӱп келеткенин кӧрӱп ийди. 17 Теҥеридеҥ ӱн угулды: «Бу мениҥ сӱӱген уулым. Ол мени сӱӱндирип јат».