Матфейдиҥ сӱӱнчилӱ јары
17 Алты кӱнниҥ бажынаҥ Иисус Пётрды, Иаковты ла оныҥ карындажын Иоаннды кожо алала, бийик кырга чыкты. Олорло кожо база кем де болбогон. 2 Анда ол ӱренчиктери алдына кубулды: оныҥ јӱзи кӱн чилеп јаркындала берген, а кийими дезе јарыктый ап-ак боло берген. 3 Оноҥ кенетийин Моисей ле Илья кӧрӱнип келеле, Иисусла куучындажып баштаган. 4 Ол тушта Пётр Иисуска айтты: «Кайракан, биске мында андый јакшы! Кайда, мен ӱч чадыр тудуп берейин: бирӱзи сеге, бирӱзи Моисейге, база бирӱзи Ильяга». 5 Пётр мыны айдып јадарда, олорды јаркындалып турган булут бӱркеп ийди. Булуттаҥ ӱн угулды: «Бу мениҥ сӱӱген Уулым, ол мени сӱӱндирип јат. Ого сӧсуккур болугар». 6 Ӱренчиктер мыны угала, коркышту тыҥ коркыйла, кӧҥкӧрӧ јада тӱштилер. 7 Иисус базып келеле, олорго тийип, айтты: «Ӧрӧ турыгар, коркыбагар». 8 Олор айландыра кӧрзӧ, Иисустаҥ ӧскӧ кем де јок болгон. 9 Оноҥ олор кырдаҥ тӱжӱп келедерде, Иисус олорго јакарды: «Кижи Уулы тирилбегенче, нени кӧргӧнӧӧрди кемге де куучындабагар».
10 Ӱренчиктер Иисустаҥ сурадылар: «Нениҥ учун јасактыҥ ӱредӱчилери озо Илья келер учурлу деп айдыжат?» 11 Иисус айтты: «Чын, Илья келип, ӱзе немени јаҥыдаҥ тудар учурлу. 12 Је айдадым слерге: Илья једип келген, је олор оны таныбаган. Олор оны ӧлтӱрип салган. Анайып ла мени де ӧлтӱргилеп салар». 13 Ол тушта ӱренчиктер Иисус Иоанн* керегинде айтканын оҥдоп ийгилеген.
14 Олор албатыга кайра једип келерде, бир кижи Иисуска базып келеле, оныҥ алдына тизеленип, айтты: 15 «Кайракан, уулымды килезеҥ , ол талгак оорунаҥ улам тыҥ шыралап турган. Ол кезикте отко, кезикте сууга тӱжӱп калат. 16 Оны сениҥ ӱренчиктериҥе экелеримде, олор јазып болбоды». 17 Ол тушта Иисус айтты: «Ӱрелип калган бӱтпес ӱйе, канчазын слерле кожо јӱрейин? Канчазын слерди чыдажайын? Оны бейин экелигер». 18 Иисус кӧрмӧсти уулчактаҥ чыксын деп јакарып ийерде, кӧрмӧс чыга берди. Бу ла тушта уулчак јазыла берген. 19 Иисус јаҥыскан артып каларда, ӱренчиктери ого базып келеле, сурадылар: «Нениҥ учун бис кӧрмӧсти сӱрӱп болбогоныс?» 20 Иисус олорго айтты: «Бӱдӱмјигер ас учун. Чынын айдадым слерге: слердиҥ бӱдӱмјигер горчицаныҥ ӱрени де кире болзо, эдип болбос немегер јок болор. Ол тушта бу кырга: „Ары јыл дезеер“, ол јыла берер». 21 ——
22 Иисус ӱренчиктериле кожо Галилеяда болордо, олорго мынайда айтты: «Кижи Уулын садып ийеле, улустыҥ колына берип ийгилеер. 23 Олор оны ӧлтӱрип салгылаар, је ол ӱчинчи кӱнде тирилип келер». Ӱренчиктери мыны угала, коркышту тыҥ санааркай берди.
24 Олор Капернаумга једип келерде, ӧргӧӧниҥ каланын* јууп турган улус Пётрга базып келеле, сурадылар: «А слердиҥ ӱредӱчигер ӧргӧӧгӧ калан тӧлӧп турган ба?» 25 Ол айтты: «Тӧлӧп турган». Је Пётр турага кирип келерде, Иисус сурады: «Си́мон, канай сананып јадыҥ, каандар каланды кемнеҥ јууп турган: бойыныҥ уулдарынаҥ ба эмезе туш улустаҥ ба?» 26 Пётр каруу берди: «Туш улустаҥ». Ол тушта Иисус ого айтты: «Айдарда, уулдары калан тӧлӧбӧй јат. 27 Је бисти јаман кӧрӧтӧн шылтак бербеске, талайга барып, кармак ташта. Баштапкы ла тудулган балыктыҥ оозынаҥ мӧҥӱн акча таап аларыҥ. Оны мен учун ла бойыҥ учун берип ий».