Матфейдиҥ сӱӱнчилӱ јары

9 Иисус кемеге отурып, талайды кечип барала, бойыныҥ калазына једип барды. 2 Анда улус ого колы-буды иштебей турган кижи экелдилер. Олордыҥ бӱдӱмјизин кӧрӱп, Иисус ого айтты: «Коркыба уулым! Сениҥ кинчегиҥ ташталып јат». 3 Је јасакка ӱредип турган кезик улус ичинде санандылар: «Ол Кудайды јамандап јат». 4 Иисус олордыҥ санаазын билип, айтты: «Кандый слер кара санаалу улус? 5 „Кинчегиҥ ташталды“ — деп айдарга јеҥил бе, эмезе: „Ӧрӧ турала бас“ — деп айдарга ба? 6 Је слерди билзин деп айдып јадым, кижи Уулына јерде улустыҥ кинчектерин таштайтан јаҥ берилген...» Оноҥ јаткан кижиге айтты: «Ӧрӧ туруп, тӧжӧгиҥди алала јан». 7 Ол туруп келеле, јана берди. 8 Мыны кӧргӧн ончо улус коркый береле, улуска мындый јаҥ берген Кудайды мактап баштадылар.

9 Иисус оноҥ ары барып јадала, калан* јуур јерде отурган Матфей деп кижини кӧрӱп ийеле, айтты: «Мениҥ кийнимнеҥ бар». Ол туруп, Иисустыҥ кийнинеҥ барды. 10 Кийнинде Иисус ла оныҥ ӱренчиктери Матфейдиҥ айылында кожо ажанып отурарда, ары кинчектӱлер ле калан јууп турган кӧп улус келди. Олордыҥ ончозы база ажанып отурдылар. 11 Је фарисейлер мыны кӧрӱп ийеле, Иисустыҥ ӱренчиктеринеҥ сурадылар: «Слердиҥ ӱредӱчигер калан јууп тургандарла, кинчектӱлерле не ажанып турган?» 12 Мыны угала, Иисус айтты: «Эмчи су-кадык улуска эмес, оору улуска керек. 13 Оныҥ учун барып, мынайып айдылганын шӱӱп сананыгар: „Мен слерди тайылга экелзин деп эмес, килеҥкей болзын деп кӱӱнзеп јадым“. Мен бойын улустаҥ артык деп сананып тургандарга эмес, је кинчектӱлерди кинчегин алынзын деп кӱӱнзедерге келгем».

14 Мыныҥ кийнинде ого Иоанныҥ ӱренчиктери базып келеле, мынайып сурадылар: «Нениҥ учун бистер ле фарисейлер курсак јибейтен чӱм-јаҥды* бӱдӱрип јадыс, а сениҥ ӱренчиктериҥ анайып этпей јат?» 15 Иисус олорго айтты: «Кижи алып јаткан уул нӧкӧрлӧриниҥ јанында болзо, нӧкӧрлӧри кунугар беди? Је удабас уулды нӧкӧрлӧринеҥ алып баратан ӧй келер. Ол тушта олор бу чӱм-јаҥды бӱдӱрер. 16 Кем де эски кийимди јаҥы бӧслӧ јамабай јат, оноҥ башка јаҥы бӧс отура берзе, јыртыгы оноҥ јаан болуп калар. 17 Анайып ла јаҥы эткен кызыл аракыны эски тажуурга урбай јат, оноҥ башка андый аракы тажуурды јырта тебер. Ол тушта кызыл аракы да тӧгӱлип калар, тажуур да ӱрелип калар. Јаҥы аракыны јаҥы тажуурга урат, ол тушта онызы да, мынызы да ӱрелбес».

18 Иисус куучындап јадарда, ого јамылу кижи базып келеле, бажырып айтты: «Кызычагым божой берген болор, је барып, колыҥла тийип ийзеҥ, ол тирилер».

19 Иисус туруп, ӱренчиктериле кожо оныҥ кийнинеҥ барды. 20 Бу ла ок ӧйдӧ, 12 јылдыҥ туркунына кан келип турганынаҥ улам шыралап јӱрген ӱй кижи Иисустыҥ кийни јанынаҥ базып келеле, эдегине тийип ийди. 21 Ол ичинде айдынып туратан: «Кийиминиҥ эдегине ле тийип ийзем, јазылып каларым». 22 Иисус кайра айланып, ӱй кижини кӧрӱп ийеле, айтты: «Коркыба, кызым! Бӱдӱп турганыҥ учун јазылып калдыҥ». Бу ла ӧйдӧ ӱй кижи јазыла берди.

23 Иисус байагы јамылу кижиниҥ айылына једип келеле, флейтала кунукчылду кӱӱ ойноп турган ла тыҥ ыйлажып турган кӧп улусты кӧрӧлӧ, 24 мынайып айтты: «Мынаҥ чыгып ийигер, кызычак божобогон, ол уйуктап јат». Улус мыны угала, каткырыжа берди. 25 Улусты чыгарып ийгениниҥ кийнинде Иисус кирип келеле, кызычактыҥ колынаҥ тудуп ийерде, ол туруп келди. 26 Бу керегинде табыш айландыра турган јерлерге јайыла берди.

27 Иисус оноҥ ары барып јадарда, оныҥ кийнинеҥ кӧзи кӧрбӧй турган эки кижи барды. Олор: «Давидтиҥ Уулы, бисти килезеҥ!» — деп кыйгырыжып турдылар. 28 Иисус айылга кирип келерде, бу эки кижи ого базып келдилер. Иисус олорго: «Мен слерди јазып ийерим деп бӱдӱп туругар ба?» — деерде, олор: «Эйе, Кайракан» — дедилер. 29 Ол тушта Иисус олордыҥ кӧзине тийип, айтты: «Бӱдӱмјигер кайралдалзын». 30 Бу ла ӧйдӧ олордыҥ кӧстӧри ачыла берди. Иисус олорго мыны кемге де куучындабазын деп јакарып салган. 31 Је байагы эки кижи айландыра турган јерлерге ол керегинде ӱзе куучындап салды.

32 Олор јӱрӱп јадарда, Иисуска ичинде кӧрмӧстӱ, тил јок кижи экелдилер. 33 Иисус оныҥ ичинеҥ кӧрмӧсти чыгара сӱрӱп ийерде, кижи куучындана берген. Албаты мыны кӧрӧлӧ: «Израильде мындый неме качан да болбогон» — деп кайкажып турды. 34 Је фарисейлер: «Ого кӧрмӧстӧрди сӱрерге, кӧрмӧстӧрдиҥ башчызы болужып турган» — деп айдыжып турдылар.

35 Иисус ончо калалар, јурттар сайын барып, синагогаларда* улусты ӱредип, Кудайдыҥ башкарузы керегинде сӱӱнчилӱ јар јарлап, улусты кандый ла оорудаҥ јазып јӱрди. 36 Ал-камык улусты кӧрзӧ, Иисустыҥ јӱреги сыстай беретен, нениҥ учун дезе олор койчызына таштаткан, шыркаладып койгон койлордый јӱрген. 37 Ол ӱренчиктерине айткан: «Јууйтан аш кӧп, је иштенетен улус ас. 38 Оныҥ учун аш јуунадатан иштиҥ Башкараачызынаҥ ишчилер ийзин деп сурагар».