Кычыраачылардыҥ сурактары

Јебрен Израильде Мессияныҥ ада-ӧбӧкӧзи болотон арга јӱк ле тун туулган уулда болгон бо?

Бис озо андый деп сананганыс. Андый шӱӱлте Еврейлерге 12:16-да бичилген сӧстӧргӧ тӧзӧлӧнгӧн деп билдирген. Бу ӱлгерде Исав агару немени баалабаган ла «бир айак курсакка бойыныҥ тун уул деп адалганын садып ийген» деп айдылат. Бу сӧстӧр Иаковко тун уул деп адалар арга кӧчӧ бергенинеҥ улам, ол Мессияныҥ ада-ӧбӧкӧзи болуп калганын кӧргӱзет деп бодогоныс (Матф. 1:2, 16; Лука 3:23, 34).

Је Агару Бичикле болзо, Мессияныҥ ада-ӧбӧкӧлӧриниҥ ончозы тун туулгандар болбогондор. Кезик темдерди кӧрӱп ийеектер.

Иаковтыҥ, ол эмезе Израильдиҥ, тун туулганы Лияныҥ уулы Рувим болгон. Соондо, Иаковтыҥ сӱӱген ӱйинеҥ, Рахильдеҥ, Иосиф деп уул чыккан. Рувим јаан кинчек эдерде, оныҥ тун уул деп адалар аргазы Иосифке кӧчӧ берген (Баш. 29:31—35; 30:22—25; 35:22—26; 49:22—26; 1 Лет. 5:1, 2). Је Рувим де, Иосиф те Мессияныҥ ада-ӧбӧкӧзине кирбеген. Мессия, Иаков ла Лияныҥ тӧртинчи уулынаҥ, Иуданаҥ, чыккан (Баш. 49:10).

Лука 3:32-де Мессияныҥ ада-ӧбӧкӧлӧри болгон база беш кижи айдылат. Олордыҥ ончозы тун туулгандар болгон болор. Воозтоҥ Овид туулган, Овидтеҥ Иессей туулган (Руфь 4:17, 20—22; 1 Лет. 2:10—12).

Је Давид Иессейдиҥ тун туулган уулы болбогон. Ол сегис уулдыҥ эҥ кичинеги болгон. Андый да болзо, Мессия Давидтиҥ угынаҥ барган (1 Сам. 16:10, 11; 17:12; Матф. 1:5, 6). Анайып ла ок Христостыҥ оноҥ арыгы ада-ӧбӧкӧзи болуп барган Соломон до Давидтиҥ тун туулган уулы болбогон (2 Сам. 3:2—5).

Је тӱҥей ле тун уул деп адалар арганы кереги јок деп айдып болбозыҥ. Нениҥ учун дезе тун туулган эр кижи, адазы божогон кийнинде, билениҥ бажы болотон. Анайда ок ого эки катапка кӧп энчи берилетен (Баш. 43:33; Јаҥ. т. 21:17; Иис. Н. 17:1).

Је кезикте тун уул деп адалар арга ӧскӧ кижиге берилер аргалу болгон. Темдектезе, Авраам бойыныҥ айылынаҥ Измаилди јӱргӱзип, тун уул деп адалар арганы Исаакка берген (Баш. 21:14—21; 22:2). Ӧрӧ айдылганыла болзо, тун уул деп адалар арга Рувимнеҥ де алылып, Иосифке берилген болгон.

Эмди Еврейлерге 12:16-ны такып кӧрӱп ийеектер. Ондо мынайып айдылган: «Ортогордо балыр јӱрӱмдӱ эмезе байланбас [агару немени баалабас, ЈТ] Исавтый кижи болбозын. Ол бир катап ажанарга болуп [бир айак курсакка, ЈТ] бойыныҥ тун уул деп адалганын садып ийген». Бу сӧстӧр нени темдектейт?

Элчи Павел Мессияныҥ ада-ӧбӧкӧзи керегинде айтпаган. Ол христиандарды: «Будыгардыҥ алдында јолды тӱс эдигер» — деп, кӱӱнзедип айткан. Анайда эдип, олор Кудайдыҥ јакшылыгын јылыйтпас эди, је балыр јӱрӱм јӱрӱп баштаган болзо, оны чӱрче ле јылыйтып салар эди (Евр. 12:12—16). Мынайып олор Исав чылап, агару немени баалаарга турбас немеге садып ийген болор эди.

Исав патриархтардыҥ ӧйинде јаткан. Оныҥ учун ого кезикте Кудайга тайылга эдер иш берилген болордоҥ айабас (Баш. 8:20, 21; 12:7, 8; Иов 1:4, 5). Је ол эт-канга башкарткан санаадаҥ улам тун уул деп адалганыла колбулу ончо молјуларын бир айак курсакка толуп ийген! Айса болзо, ол Авраамныҥ калдыгы керегинде судурлап айдылган базынчыктаҥ кыйарга кӱӱнзеген болор (Баш. 15:13). Бого коштой, Исавтыҥ агару немени баалабай турганы тӧгӱн кудайларга бажырган ӱй улусты алганынаҥ кӧрӱнген. Оноҥ улам оныҥ ада-энезине коркышту кӱч болгон (Баш. 26:34, 35). Је Иаковтыҥ алган ӱй кижизи чын Кудайга бажырган (Баш. 28:6, 7; 29:10—12, 18).

Айдарда, кандый тӱп-шӱӱлте эдерге јараар? Мессияныҥ ада-ӧбӧкӧзи болгон кӧп эр улус чыннаҥ ла тун туулгандар болгон, је ончозы эмес. Еврейлер мыны билер болгон ло оны кайкабаган. Олор Христосты — Иессейдиҥ эҥ кичинек уулыныҥ, Давидтиҥ, калдыгы деп бӱткен болгон (Матф. 22:42).