Кычыраачылардыҥ сурактары

Иудеядагы ӧргӧӧниҥ каруулчыктары — олор кемдер? Олор кандый иш бӱдӱрген?

Абыстар болбогон Левийдиҥ угыныҥ кезик улузы ӧргӧӧниҥ каруулчыктары болуп иштеген. Каруулчыктар ӧргӧӧни корулаган, олорды ӧргӧӧниҥ јааны башкарган. Филон Александрийский деп иудей укту философ олордыҥ ижи керегинде мынайып айдат: «Олордыҥ [левиттердиҥ] кезиги ӧргӧӧниҥ эжиктериниҥ јанында турган. Кезиги абыстардыҥ кӱрентигине кирер јерде [ӧргӧӧниҥ ичинде] турган. Олор бу јерди ӧнӧтийин эмезе билбес аразынаҥ кирип келетен туш улустаҥ корулаган. Кезиги бой-бойын солыжып, тӱни-тӱжи ӧргӧӧни айландыра базып кӧрӧтӧн».

Бу каруулчыктар кезикте Синедрионныҥ јакаруларын бӱдӱрип туратан. Римниҥ башкарузы мылтык-јепсел тузаланар јарадуны бӱдӱн Иудей ичинде јӱк ле ӧргӧӧниҥ каруулчыктарына берген.

Иоахим Иеремиас деп библеисттиҥ санаазыла болзо, «Иисусты тударга шак ла ӧргӧӧниҥ каруулчыктары келген болордо, ол кӱнӱҥ сайын Ӧргӧӧдӧ улусты ӱредип турарда, оны нениҥ учун тудуп албаган деп, Иисустыҥ сурагы јартала берет (Матф. 26:55)». Анайда ок ол мынаҥ озо Иисусты тударга барган улус база ӧргӧӧниҥ каруулчыктарынаҥ болгон деп сананган (Иоанн 7:32, 45, 46). Кийнинде бу каруулчыктарга ла ӧргӧӧниҥ јаанына Синедрионго Иисустыҥ ӱренчиктерин экелзин деп јакарылган. Анайда ок Павелди ӧргӧӧдӧ тудуп алгандардыҥ ортозында ӧргӧӧниҥ каруулчыктары база болгон болор (Ап. ижи 4:1—3; 5:17—27; 21:27—30).