Дави́д јалтанбас болгон

Сеге коркымчылу болзо, сен нени эдип јадыҥ?~ Сен, байла, адаҥдӧӧн эмезе энеҥдӧӧн јӱгӱрип јадыҥ. Је сеге болужып ийетен база та кем де бар. Ол телекейде ончозынаҥ кӱчтӱ. Ол кем андый билериҥ бе?~ Ол — Иегова Кудай. Је эмди Давид деп атту јиит уул керегинде куучындажып ийек. Ол керегинде Агару Бичикте айдылып јат. Иегова ого јаантайын болужып ийер деп ол билген, оныҥ учун ол јалтанбас болгон.

Давидти ада-энези јаштаҥ ала Иегованы сӱӱп турзын деп, ӱредип салган. Ол ого јеткерлӱ ӧйдӧ јалтанбас болорго болужып туратан. Иегова оныҥ Најызы ла Ол ого јаантайын болужарга белен деп, Давид билер болгон. Бир катап Давид кой кабырып јӱрерде, кенетийин каракула чыга конып, бир койды тудуп алды! Давид нени этти, билериҥ бе? Ондо ӱлдӱ, јыда јок то болгон болзо, ол каракулага чурап барала, оны ӧлтӱрип салды! База бир тушта койлорго айу табарган. Давид оны база ӧлтӱрди. Сен канайып сананып јадыҥ, Давидке кем болушкан?~ Иегова эмей.

Бир катап Давид јалтанбазын оноҥ тыҥ кӧргӱскен. Израиль калыгы одоштой јаткан албатыла, филистимдерле, јуулажып тургандар. Филистимдердиҥ бир јуучылы коркышту бийик сынду — чек ле алып болгон! Оныҥ ады Голиа́ф болгон. Ол израильдыҥ јуучылдарына ла Иеговага каткырып турган. Голиаф израильдыҥ јуучылдарын јуулажарына кычырып туратан, је ончозы оноҥ коркыгылап турган. Давид мыны угуп ийеле, Голиафка: «Мен сениле јуулажарым! Сени јеҥерге меге Иегова болужар!» — деп, ол айтты. Давид јалтанбас болгон бо, сен канайып сананып туруҥ?~ Эйе, сӱреен. Оноҥ ары не болгон билериҥ бе?

Давид килеҥ беш таш ла кайыштаҥ эткен јепселин тудунганча, байагы алыпка удура чыгып барды. Давидтиҥ јиит болгонын кӧрӱп ийеле, Голиаф ого каткырып баштады. Је Давид: «Сен меге удура кылышту чыктыҥ, је мен сеге удура Иегованыҥ адыла чыктым!» — деп, ого айтты. Давид Голиафка удура јӱгӱрип келеле, ташты кайышка салып, алыпка таштап ийерде, таш оныҥ чике маҥдайына тийди! Ол ӧлӱп, јерге јыгылды! Филистимдер мыны кӧрӧлӧ, коркып, качкылай берди. Јиит Давид алыпты канайып јеҥип алган?~ Ого, алыпка кӧрӧ, канча катап кӱчтӱ Иегова болушкан!

Давид керегинде куучын бисти неге ӱредип јат?~ Иегованаҥ кӱчтӱ кем де јок. Ол сениҥ Најыҥ. Оныҥ учун, сеге коркымчылу болзо, Иегова јалтанбас болорго болужып ийер деп ундыба!