09 УРОК

Мӱргӱӱл Кудайга јууктаарга болужат

Кепке базылган чыгарма

Слерге кандый бир немениҥ аайына чыгарга, јӧп керек болуп турган болор. Эмезе бойыгардыҥ сурактараардыҥ карууларын билип аларга турган болороор. Ол эмезе слер токунаду аларга, та кемнеҥ де јылу сӧстӧр сакып турганаар. Эмезе Кудайга јууктаарга кӱӱнзеп турган болороор. Мындый айалгаларда мӱргӱӱл болужар. Је канайып мӱргӱӱр керек? Кудай ончо мӱргӱӱлдерди угуп турган ба? Кудай слердиҥ мӱргӱӱлдереерди уксын деп, нени эдер керек? Мыны билип алактар.

1. Кемге мӱргӱӱр керек ле не керегинде мӱргӱӱрге јараар?

Иисус јӱк ле теҥеридеги Адага мӱргӱзин деп ӱреткен. Ол бойы да јӱк ле Иеговага мӱргӱген. Ол айткан: «Мынайып мӱргигер: „Теҥеридеги Адабыс...“» (Матфей 6:9). Иеговага мӱргӱп турзаас, оныла колбуларыс тыҥып јат.

Не ле керегинде мӱргӱӱрге јараар. Је мӱргӱӱлдерис Иегованыҥ кӧрӱм-санаазына келижип турар керек, ол тушта мӱргӱӱлдеристиҥ каруузын аларыс. Агару Бичикте айдылганыла: «Оныҥ табыла нени суразабыс, Ол бисти угуп турганында» (1 Иоанн 5:14). Анайда ок Иисустыҥ сӧстӧринеҥ не керегинде мӱргӱӱрге јараарын база билип аладыс. (Матфей 6:9—13 кычырыгар.) Бис Кудайга јӱк ле та нени де аларга болуп мӱргӱбей јадыс, је быйанысты айдадыс ла улус учун мӱргӱп јадыс.

2. Канайып мӱргӱӱр керек?

Агару Бичик бисти јӱрегерде не барын Иеговага чыгара айдынзын деп кӱӱнзедет (Сарын 62:8). Айдарда, мӱргӱӱлдер акту јӱректеҥ болор керек. Бисте кандый сезимдер болуп турган ла нени сананып турганысты Иеговага куучындаарга јараар. Бойыстыҥ ичисте де, ӱнденип те мӱргӱӱрге јараар. Мӱргӱп јатсаас, отурганыс эмезе турганыс тоомјылу болор керек. Анайда ок кандый ла ӧйдӧ, кайда ла мӱргӱӱрге јараар.

3. Кудай мӱргӱӱлдерге карууны канайып берет?

Иегова мӱргӱӱлдердиҥ каруузын башка-башка эп-аргаларла берер аргалу. Темдектезе, сурактарыстыҥ каруузын Агару Бичик ажыра берет. Бу бичик ченемел јок кижини ойгор эдет. (Сарын 19:7; Иаков 1:5 кычырыгар.) Кудайдыҥ мӱргӱӱлдериске каруу берип турганыныҥ база бир эп-аргазы — кӱч ӧйлӧрдӧ јӱрегиске амыр берип, токунадып турганы. Ол анайда ок биске бойыныҥ ишчилери ажыра болужат.

ТЕРЕҤЖИДЕ КӦРӰГЕР

Кудайга кандый мӱргӱӱлдер јарап турган, анайда ок мӱргӱӱл слерге канайып болужар аргалу деп билип алыгар.

4. Кудай кандый мӱргӱӱлдерди угуп јат?

Кудай мӱргӱӱлдеристи угар ба, јок по недеҥ камаанду? ВИДЕОНЫ кӧрӱгер.

ВИДЕО: «Кудай ончо мӱргӱӱлдерди угат па?» (ӱзӱги) (2:42)

Иегова слерди ого мӱргӱзин деп кӱӱнзейт. Сарын 65:2 кычырып, суракты шӱӱжип ийигер:

Канайып сананадаар, Кудай слерди ого мӱргӱзин деп кӱӱнзейт пе? Јартап беригер.

Кудай бистиҥ мӱргӱӱлдеристи уксын деп кӱӱнзеп турган болзоос, биске оныҥ нравственный нормаларыла јӱрер керек. Михей 3:4 лӧ 1 Пётр 3:12 кычырып, бу суракты шӱӱжип ийигер:

Иегова бистиҥ мӱргӱӱлисти уксын деп, нени эдер керек?

Јуулажып турган эки черӱ кажызы ла бойына Кудайдаҥ јеҥӱ сурайт. Кудай олорго каруузын берер бе?

5. Кудайга акту јӱректеҥ мӱргӱӱр керек

Кезик улустыҥ санаазыла, мӱргӱӱлдерди ӱренип алала, ол ло сӧстӧрлӧ мӱргӱӱр керек. Је Кудайга андый мӱргӱӱлдер јарайт па? Матфей 6:7 кычырып, суракты шӱӱжип ийигер:

Јаантайын бир тӱҥей эдип мӱргӱбеске, слерге не болужар?

Кажы ла кӱн јӱрӱмеерде јакшы не барын сананып, бу учун Кудайга быйаныгарды айдыгар. Анайып бир неделениҥ туркунына этсеер, јети кӱнниҥ туркунына јети башка неме учун быйаныгарды айткан болороор.

Уулчак ада-энезиле куучындажып јат. — Јакшы ада балазы нени сананып турганын билерге кӱӱнзейт. Анайып ла Иегова бистиҥ јӱрегисте не барын угарга кӱӱнзейт

6. Мӱргӱӱл — Кудайдыҥ сыйы

Мӱргӱӱл јӱрӱмниҥ анчада ла кӱч ӧйлӧринде канайып болужат? ВИДЕОНЫ кӧрӱгер.

ВИДЕО: «Мӱргӱӱл чӧкӧбӧскӧ болужат» (1:32)

Мӱргӱӱл јӱрегиске амыр берер деп, Агару Бичикте айдылат. Филиппыдагыларга 4:6, 7 кычырып, бу сурактарды шӱӱжип ийигер:

Мӱргӱп те турзаас кӱчтерис јоголбозо, нениҥ учун тӱҥей ле мӱргӱӱр керек?
Слер не керегинде мӱргӱӱр эдеер?

Слер билереер бе?

«Аминь» деген сӧс «чын» эмезе «андый ла болзын» дегенин темдектейт. Улус библиялык ӧйлӧрдӧҥ бери «аминь» деген сӧсти мӱргӱӱлдердиҥ учында айдатан (1 Летопись 16:36).

7. Мӱргӱӱрге ӧй табып туругар

Кезикте бис божобой турала, мӱргӱӱрге де ундып саладыс. Иисус Кудайга мӱргӱӱр арганы нениҥ учун баалаган? Матфей 14:23 ле Марк 1:35 кычырып, сурактарды шӱӱжип ийигер: