51 УРОК
Куучыныгарла Иегованы сӱӱндиригер
Иегова биске кайкамчылу сый эткен. Бу — куучындажатан арга. Бис бу сыйла канайып тузаланып турганыска Иегова ајару эдет пе? Је айса! (Иаков 1:26 кычырыгар.) Айдарда, Иегованы сӱӱндирерге, куучынданатан сыйды биске канайып тузаланар керек?
1. Куучынданар сыйла канайып тузаланар?
Агару Бичик бисти: «Бой-бойыгарды кӧкӱдип, бой-бойыгарды тыҥыдыгар» — деп кӱӱнзедет (1 Фессалоникадагыларга 5:11). Оныҥ учун слердиҥ таныштараардыҥ кемизине јылу сӧстӧр керек болуп турганын сананып кӧрӱгер. Андый кижиниҥ кӱӱн-санаазын кӧдӱрерге, слер нени эдер аргалу? Слер оны тыҥ баалап турганаар деп айдар аргалу. Темдектезе, слерге оныҥ нези јарап турганын айдыгар. Анайда ок оны кандый бир библиялык ӱлгерле оморкодорго јараар. Ӱлгерлер сӱреен кӧп. Ундыбагар, јӱк ле сӧстӧр эмес, је канайып айдып турганаар сӱреен јаан учурлу болот. Оныҥ учун јаантайын јымжак ла јалакай куучынданарга албаданыгар (Укаа сӧстӧр 15:1).
2. Канайып куучынданбас керек?
Агару Бичикте: «Оозыгардаҥ бир де јаман сӧс чыкпазын» — деп айдылат. (Эфестегилерге 4:29 кычырыгар.) Оныҥ учун бис айткыланып, јаман сӧстӧр айтпай јадыс. Анайда ок кижини ачындырып ийгедий кату сӧстӧрдӧҥ кыйыжадыс. Бого коштой бис коп јайбай јадыс ла ӧскӧ улусты јаргылап, јамандабай јадыс. (Укаа сӧстӧр 16:28 кычырыгар.)
3. Сӧстӧрисле ӧскӧ улустыҥ кӱӱн-санаазын канайып кӧдӱрер?
Бистиҥ айдып турган сӧстӧристеҥ бистиҥ санааларыс ла сезимдерис кӧрӱнип јат (Лука 6:45). Оныҥ учун биске јакшы јанынаҥ сананарга ӱренер керек. Темдектезе, бойыстыҥ санаабысты ла јӱректеристи «нези чын... нези ару... нези мактаарга ла тоорго јарамыкту» немелерле толтырар керек (Филиппыдагыларга 4:8). Бу сӧстӧрди ундыбай турзаас, бис канайып амыраарында ла кандый улусла куучындажарында ајарыҥкай болорыс (Укаа сӧстӧр 13:20). Анайда ок та нени де айдардаҥ озо, бистиҥ айткан сӧстӧрис улуска каршузын јетирбес пе деп, јазап шӱӱп сананарыс. Нениҥ учун дезе Агару Бичикте айдылат: «Сананбай айдылган сӧстӧр, кылыш чылап шыркалап јат, је ойгор кижиниҥ тили эмдеп јат» (Укаа сӧстӧр 12:18).
ТЕРЕҤЖИДЕ КӦРӰГЕР
Бистиҥ сӧстӧрис Иегованы ла улусты сӱӱндирип турзын деп канайып куучындаарын билип алыгар.
4. Нени, качан ла канайып айдарын билип туругар
Бис ончобыс кезикте јастыра неме айдып, оноҥ санааркап јадыс (Иаков 3:2). Галаттарга 5:22, 23 кычырып, сурактарды шӱӱжип ийигер:
Бу кылык-јаҥдардыҥ кажызы слерге јакшы куучындажарга болужар? Олор канайып болужар аргалу? Слер кажызын мӱргӱӱлде сураар эдеер?
1 Коринфтегилерге 15:33 кычырып, суракты шӱӱжип ийигер:
Сооттоп амыраары ла најылар бистиҥ куучыныска тузазын эмезе каршузын канайып јетирер аргалу?
Улусла недеҥ улам јаман эмезе јакшы куучындажар болорыс?
Экклезиаст 3:1, 7 кычырып, суракты шӱӱжип ийигер:
Кандый айалгада унчукпаза эмезе санаагысты айдарга эптӱ ӧйди сакып алза торт болор?
5. Ӧскӧ улус керегинде јакшыны айдып туругар
Улусты сӧстӧрисле ачындырбаска ла олор керегинде јакшыны айдып турарга не болужар? ВИДЕОНЫ кӧрӱп, сурактарды шӱӱжип ийигер.
Бу карындаш улус керегинде јаман айтпаска нениҥ учун шӱӱп алган?
Ол нени эдип баштаган?
Экклезиаст 7:16 кычырып, суракты шӱӱжип ийигер:
Ӧскӧ улус керегинде јаман неме айдар ченелте боло берзе, биске нени ундыбас керек?
Экклезиаст 7:21, 22 кычырып, суракты шӱӱжип ийигер:
Слер керегинде та кем де јаман неме айдып турза, бу ӱлгерлердеги шӱӱлтелер ачынбаска канайып болужар?
6. Јуук улузаарла јалакай куучындажыгар
Иегова бисти јуук улузысла јалакай ла сӱӱштӱ куучындашсын деп кӱӱнзейт. ВИДЕОНЫ кӧрӱп, суракты шӱӱжип ийигер.
Биледеги улузаарла јалакай куучындажарга слерге не болужар?
Эфестегилерге 4:31, 32 кычырып, суракты шӱӱжип ийигер:
Бис јуук улузысты сӱӱп ле баалап турганысты сӧстӧрисле канайып кӧргӱзерис?
Иегова бойыныҥ Уулын, Иисусты, сӱӱп турганын ачыгынча айткан. Матфей 17:5 кычырып, суракты шӱӱжип ийигер:
Иегованаҥ тем алып, слер јууктараарга нени, кандый ӱнле айдараар?
Улусты мактаар аргалар бедиреп туругар
КЕЗИК УЛУС АЙДАТ: «Нени сананадым, оны ла айдадым. Јарабай турган болзо, укпазын».
Мындый кӧрӱм-санаала слер јӧп пӧ? Јартап беригер.
ТӦС ШӰӰЛТЕЗИ
Сӧстӧр јаан ийделӱ болот. Оныҥ учун бис нени, канай, качан айдып турганыска ајарыҥкай болор керек.
Нени билип алдыгар?
Сӧстӧрлӧ кижиниҥ кӱӱн-санаазын канайып кӧдӱрип саларга јараар? Темдер куучындап беригер.
Слер кандый сӧстӧр айтпаска ла канайып куучынданбаска кӱӱнзейдеер?
Јаантайын јалакай сӧстӧр айдарга ла куучынды јакшы јанындӧӧн апарарга не болужар?
ШИҤДЕЙТЕН МАТЕРИАЛ
Куучынды јаантайын јакшы јанындӧӧн апарарга не болужар?
Јаман сӧстӧр айтпай куучынданарга слерге не болужар деп билип алыгар.
Кемле-кемле куучындажып јадала, коптожо бербеске нени эдер керек деп кӧрӱп алыгар.
Иегова бир эр кижиге јаман сӧстӧрдӧҥ айрыларга канайып болушканын билип алыгар.
«Мен јӱрӱмимниҥ учурын сананып баштагам» («Каруулчы шибее», 2013 јыл, куран ай 1)