52 УРОК
Тыш бӱдӱмиске ле кийимиске нениҥ учун јаан ајару эдер керек?
Кажы ла кижи кандый кийим кийерин, чачын канайып јазаарын ла тыш бӱдӱми кандый болорын бойы талдап јат. Кезик библиялык принциптер биске бойыска јарап турар эдип кийинерге, је бу ла ок ӧйдӧ, Иегованы сӱӱндирерге болужат. Бу принциптерди кӧрӱп ийектер.
1. Тыш бӱдӱмис кандый болор керек деп билип аларга, кандый принциптер болужар?
Биске «кемди де бӱдӱрилтпеске, керсӱ болуп, эптӱ кийинер» керек, ол тушта бистиҥ тыш бӱдӱмистеҥ бис «Кудайга чындык» улус деп кӧрӱнер (1 Тимофейге 2:9, 10, ЈТ). Бу тӧрт принципти тереҥжиде шӱӱжип ийектер: 1) Биске эптӱ кийинер керек. Слер јуунныҥ туштажуларында ака-эјелер башка-башка кийинип турганын ајарган болороор. Је олордыҥ кажызыныҥ ла эптӱ кийингенинеҥ ле тыш бӱдӱминеҥ Кудайды тооп турганы кӧрӱнет. 2) Биске кемди де бӱдӱрилтпес керек. Бу дезе бистиҥ кийимистеҥ ле тыш бӱдӱмистеҥ улам кемде де сексуальный кӱӱн боло бербезин деп кӱӱнзеп турганысты ла бойыска ӧйинеҥ ӧткӱре кӧп ајару этпеске турганысты кӧргӱзет. 3) Биске керсӱ болор керек. Бис дезе ӧйинеҥ ӧткӱре мода аайынча јӱрерге албаданбай јадыс. 4) Бистиҥ кийимистеҥ ле тыш бӱдӱмистеҥ бис Кудайга чындык улус деп, јаантайын кӧрӱнип турар керек. Улус бисти чындык Кудайдыҥ ишчилери деп танып турзын деп кӱӱнзеп јадыс (1 Коринфтегилерге 10:31).
2. Ака-эјелерди нениҥ учун сананар керек?
Кажы ла кижи канайып кийинерин бойы талдаар аргалу, је андый да болзо, ака-эјелер бистиҥ тыш бӱдӱмисти кӧрӱп, олордо кандый сезимдер болорын сананып турар керек. Бис ака-эјелердиҥ сезимдерин ајаруга алып, «кажыбыс ла јуугысты сананып, оныҥ Кудайга бӱдери ӧссин деп, ого јакшыны эдерге» албаданадыс. (Римдегилерге 15:1, 2 кычырыгар.)
3. Улус бистиҥ тыш бӱдӱмисти кӧрӱп, нениҥ учун Иегова керегинде билерге кӱӱнзеер болор?
Бис кажы ла айалгага келиштире кийинерге албаданадыс. Анчада ла јуунныҥ туштажуларына ла јарлаар ишке барарга јатсаас, тыш бӱдӱмиске јаан ајару эдедис. Нениҥ учун дезе тыш бӱдӱмистеҥ улам улус сӱӱнчилӱ јарды укпастаҥ айабас. Је бис дезе бойыстыҥ тыш бӱдӱмисле улусты сӱӱнчилӱ јарга јилбиркедерге ле Кудайыстыҥ ӱредӱзин јарандырарга кӱӱнзейдис (Титке 2:10).
ТЕРЕҤЖИДЕ КӦРӰГЕР
Улус бисти тыш бӱдӱмистеҥ ле канайып кийинип турганыстаҥ христиандар болгонысты танып турзын деп нени эдерин билип алыгар.
Бойыстыҥ тыш бӱдӱмисле бис јаҥ берилген улуска тоомјыбысты кӧргӱзер аргалу. Иегова бистиҥ јӱрегисти кӧрӱп те турган болзо, бис ого канайып кийинип турганысла база тоомјыбысты кӧргӱзер аргалу
4. Бойыстыҥ јакшы тыш бӱдӱмисле Иегованы тооп турганысты кӧргӱзип јадыс
Бойыстыҥ тыш бӱдӱмисти ајарып кӧрӱп турарга, озо ло баштап бисти не кӱӱнзедет? Сарын 47:2 кычырып, сурактарды шӱӱжип ийигер:
Бис Иегованыҥ ишчилери деп, бистиҥ тыш бӱдӱмистеҥ канайып кӧрӱнер керек?
Бис јуунныҥ туштажуларында ла јарлаар иште канайып кийинип турганыс јаан учурлу ба? Слер нениҥ учун мынайып сананып јадыгар?
5. Чын талдаш эдерге не болужар?
Бистиҥ кийимис баалу-чуулу эмес те болзо, ару ла айалгага келижип турар учурлу. 1 Коринфтегилерге 10:24 ле 1 Тимофейге 2:9, 10 кычырып, бистиҥ кийимис нениҥ учун:
шалыр ла кирлӱ болбос учурлу;
улуста јастыра санаалар ла сезимдер болбос учурлу (темдектезе, ӧткӱре ачык ла тапчы болгонынаҥ улам).
Христиандар Моисейдиҥ јасагыла јӱрбей де турган болзо, је олор бу јасактардаҥ Иегованыҥ кӧрӱмин кӧптӧдӧ билип алар аргалу. Јаҥды такыганы 22:5 кычырып, суракты шӱӱжип ийигер:
Нениҥ учун эр кижини ӱй кижиге, ӱй кижини эр кижиге тӱҥей эдип турган кийимнеҥ ле чач јазаарынаҥ кыйып турар керек?
1 Коринфтегилерге 10:32, 33 ле 1 Иоанн 2:15, 16 кычырып, сурактарды шӱӱжип ийигер:
Бистиҥ тыш бӱдӱмис бистиҥ јаткан јеристиҥ ле јуундагы улустыҥ сезимдерине тийбезин деп, нениҥ учун сананып турар керек?
Слердиҥ јадып турган јереерде кӧп саба улус канайып кийинет ле чачын јазап јат?
Канайып сананадаар, христиандарга андый кийимдердиҥ кезигин кийерге ле чачын анайып јазаарга јараар ба? Јартап беригер.
Јараш кийинерге кӧп аргалар бар, је бу ок ӧйдӧ Иегованы сӱӱндиригер
КЕЗИК УЛУС АЙДАТ: «Канайып кийинейин дезем, анайып ла кийинерим. Мен бойым билерим».
Слер бу сӧстӧрлӧ јӧп пӧ? Јартап беригер.
ТӦС ШӰӰЛТЕЗИ
Бойыстыҥ јакшы тыш бӱдӱмисле бис Иегованы ла улусты тооп турганысты кӧргӱзедис.
Нени билип алдыгар?
Тыш бӱдӱмистиҥ кандый болгоны нениҥ учун Иеговага јаан учурлу болот?
Тыш бӱдӱмис кандый болор керек деп билерге, кандый принциптер болужар?
Улус бистиҥ тыш бӱдӱмисти кӧрӱп, Иегова керегинде нени сананар?
ШИҤДЕЙТЕН МАТЕРИАЛ
Слердиҥ кийимигер слер керегинде нени айдат?
Татуировканы эдетен бе, јок по деген суракты нениҥ учун јазап сананар керек деп билип алыгар.
«Агару Бичикте татуировкалар керегинде не айдылат?» (веб-статья)
Кандый кийим кийерин ле чач јазаарын талдаарга, база кандый принциптер болужар деп билип алыгар.
«Бойоордыҥ тыш бӱдӱмеерле слер Кудайды мактайдаар ба?» («Каруулчы шибее», 2016 јыл, сыгын ай)
Бир ӱй кижиге улустыҥ канайып кийинип турганын јаргылабаска не болушканын кычырыгар.
«Олордыҥ кийими ле тыш бӱдӱми меге буудак болгон» («Ойгоныгар!», 2003 јыл, јаҥар ай 22)