55 УРОК
Слер бойоордыҥ јууныгарга нени эдер аргалу?
Бастыра јердиҥ ӱстинде миллиондор тоолу Иегованыҥ Керечилери канча муҥ јуундарда сӱӱнчилӱ иштегилейт. Олор бу јуундарда алып турган ӱредӱни ле ӧйи-ӧйинде берилип турган башкартуларды сӱреен тыҥ баалап јат. Оныҥ учун олор бойыныҥ јуунына та нени де эдерге јаантайын белен болот. А слер јууныгарга болужарга кӱӱнзейдеер бе?
1. Слер бойоордыҥ јууныгарга ӧйӧӧрди ле ийде-кӱчеерди канайып берер аргалу?
Бистиҥ кажыбыс ла бойыстыҥ јууныска та нени де эдер аргалу. Слердиҥ јуунаарда јажы јаанап калган ла оору улус бар болзо, сананып кӧрӱгер: слер олорго јуунныҥ туштажуларына барарга эмезе јадын-јӱрӱмниҥ сурактарында болужып болороор бо, темдектезе, магазин барып келерге эмезе айылында та нени де эдип берерге? (Иаков 1:27 кычырыгар.) Анайда ок бис Каандыктыҥ Туразын арутаарында ла јазаарында болужар аргалу. Бу ишти этсин деп, бисти кем де албадабай јат. Бис болужарга белен, нениҥ учун дезе бис Кудайды ла ака-эјелеристи сӱӱп јадыс (Сарын 110:3).
Чӧҥӱрилип калган Керечилерде јуунга болужатан оноҥ до кӧп аргалар бар. Агару Бичиктиҥ некелтелерине келижип турган акалар јуунда болушчы ишчилер ле кийнинде аксагалдар болуп иштеер аргалу. Акаларда да, эјелерде де пионер болуп иштейтен, ӧскӧртӧ айтса кӧптӧдӧ јарлайтан, арга бар. Кезик Керечилер Каандыктыҥ Тураларын тударында болужар аргалу, ол эмезе болуш керексинип турган јуундарга кӧчӧр аргалу.
2. Јуунга акча-манат јанынаҥ канайып болужар?
Бис бойыста бар баалу не-немелерди Иеговага берер аргалу (Укаа сӧстӧр 3:9). Бис бойыстыҥ јууныска ла телекейлик јарлаар ишке акту кӱӱнистеҥ сый эдип акча эмезе ӧскӧ дӧ не-немелер бередис. (2 Коринфтегилерге 9:7 кычырыгар.) Анайда ок мынайып эткен сыйларыс ар-бӱткенниҥ тӱбегинеҥ шыралаган улуска аткарылат. Бистиҥ кӧп ака-эјелер сый эдерге, кажы ла ай бир кичинектеҥ акча туура салат. (1 Коринфтегилерге 16:2 кычырыгар.) Бис сый эдип берип јаткан акчаны Каандыктыҥ Тураларында аҥылу кайырчактарга салар аргалу эмезе donate.jw.org сайт ажыра эдер аргалу. Мындый сыйлар Иегованы сӱӱп турганысты кӧргӱзип турган эп-аргалардыҥ бирӱзи болот.
ТЕРЕҤЖИДЕ КӦРӰГЕР
Слер бойоордыҥ јууныгарга канайып болужар аргалу деп билип алыгар.
3. Бис акча-манатла болужар аргалу
Иегова ла Иисус ӧскӧ улуска болужарга белен улусты сӱӱп јат. Иисус бистерге тем эдип, јокту тул ӱй кижини кӧргӱскен. Ол ӱй кижиде кӧп акча болбогон до болзо, ол тӱҥей ле акту кӱӱнинеҥ Иеговага сый эдип акча салган. Лука 21:1—4 кычырып, сурактарды шӱӱжип ийигер:
Бис сый эдип јӱк ле кӧп акча салзаас, Иегова сӱӱнет пе?
Акту кӱӱнистеҥ сый эдип турзаас, Иегова ла Иисуста кандый сезимдер болот?
Бистиҥ сый эдип берген акча кайдӧӧн барып турганын билерге турган болзоор, ВИДЕОНЫ кӧрӱгер. Оноҥ суракты шӱӱжип ийигер:
Бистиҥ сый эдип берген акча бастыра јердиҥ ӱстинде ака-эјелерге канайып болужат?
4. Бис кӱӱнзеп болужар аргалу
Библиялык ӧйлӧрдӧ Иегованыҥ ишчилери олордыҥ бажыратан јери эптӱ ле јакшы болзын деп албаданып иштенетен. Олор јӱк ле акча-манат јанынаҥ эмес, је ӧскӧ дӧ эп-аргаларла болушкан. 2 Летопись 34:9—11 кычырып, суракты шӱӱжип ийигер:
Иегованыҥ ӧргӧӧзи јаантайын эптӱ ле јакшы болзын деп, кажы ла израильтян кижи канайып болушкан?
Бӱгӱнги кӱнде Иегованыҥ Керечилери анайып ла эдет. ВИДЕОНЫ кӧрӱп, сурактарды шӱӱжип ийигер:
Каандыктыҥ Туразы нениҥ учун ару ла јакшы јазалып калган болор керек?
Слер неле болужар аргалу?
5. Акалар нени эдер аргалу?
Агару Бичик ака-карындаштарды јуунныҥ керектерине кӧптӧдӧ турушсын деп кӱӱнзедет. Бир тем кӧрӱп ийектер. ВИДЕОНЫ кӧрӱп, суракты шӱӱжип ийигер.
Бу карындаш јуунга кӧптӧдӧ болужарга нени эткен?
Агару Бичикте јуунныҥ болушчы ишчилери эмезе аксагалдар болорго кӱӱнзеп турган ака-карындаштарга некелтелер берилип калган. 1 Тимофейге 3:1—13 кычырып, сурактарды шӱӱжип ийигер:
Јуунныҥ болушчы ишчилери ле аксагалдар болорго кӱӱнзеп турган ака-карындаштарга кандый некелтелер бар?
Олордыҥ билезиндеги улузы кандый болор керек? (4 лӧ 11 ӱлгерлерди кӧрӱгер.)
Ака-карындаштар библиялык некелтелерле јӱрерге албаданып турза, бу ончо јуунга кандый тузазын јетирет?
КЕЗИК УЛУС СУРААР БОЛОР: «Иегованыҥ Керечилериниҥ ижи кандый акча-манатла эдилет?»
Слер кандый каруу берер эдеер?
ТӦС ШӰӰЛТЕЗИ
Јуунга берип турган ӧйисти, ийде-кӱчисти ле акча-манадысты Иегова сӱреен тыҥ баалап јат.
Нени билип алдыгар?
Јуунга болужарга бойыстыҥ ӧйисти ле ийде-кӱчисти канайып тузаланарыс?
Бис јуунга акча-манатла канайып болужарыс?
Слер јууныгарга нени эдерге кӱӱнзейдеер?
ШИҤДЕЙТЕН МАТЕРИАЛ
Кудай бойыныҥ ишчилеринеҥ нениҥ учун онынчы ӱлӱни (десятина) тӧлӧзин деп, база некебей турганын билип алыгар.
«Агару Бичикте онынчы ӱлӱ керегинде не айдылат?» (веб-статья)
Агару Бичикле болзо, чӧҥӱрилген эр кижиге молјулар берилген. Је бу молјуларды чӧҥӱрилген ӱй кижиге бӱдӱрерге келишсе, канайдар?
«Баш болотон принцип јуунда канайып тузаланылар учурлу?» («Каруулчы шибее», 2021 јыл, кочкор ай)
Кӱч айалгаларда бойлорын килебей, ака-эјелерге бичиктер јетирип турган јалтанбас Керечилерле таныжып алыгар.
Бистиҥ организацияныҥ ижи ӧскӧ кудай јаҥдарга кӧрӧ, канайып акча-манатла јеткилделип турганын билип алыгар.
«Иегованыҥ Керечилериниҥ ижи кандый акча-манатла эдилет?» (веб-статья)