Јарлаар иш сеге сӱӱнчи экелип турзын

Сеге јарлаарга јеҥил бе? Кӧп сабазыска јеҥил эмес. Нениҥ учун јеҥил эмес? Улус сӱӱнчилӱ јарды керексибей турган эмезе бистерди јаман кӧрӱп турган болор. Кемигис те таныш эмес улусла куучындажарга эби-јоксынып турган болор. Мындый шылтактардаҥ улам, кижиниҥ кӱӱни ӧчӧ берердеҥ айабас. Је бис сӱӱнчилӱ Кудайга бажырып јадыс. Ол бисти сӱӱнчилӱ јарлазын деп кӱӱнзейт (Ср 100:2; 1Тм 1:11, ЈТ). Јарлаар иштеҥ сӱӱнчи аларга, бисте ас ла болзо ӱч шылтак бар. Кандый шылтактар?

Баштапкызында, бистиҥ јар ижемји берет. Бӱгӱнги кӱнде кӧп улуста ижемји јок, је бис олорго келер ӧй керегинде сӱӱнчилӱ јарды куучындаар аргалу (Ис 52:7). Кудайдыҥ Каандыгы керегинде сӱӱнчилӱ јар бистерге бойыска да сӱӱнчи экелет. Јарлаар ишке јазанып јадала, Кудайдыҥ Каандыгы башкарза, јердиҥ ӱстинде јӱрӱм кандый јакшы болор деп сананып тур.

Экинчизинде, библиялык јар улустыҥ јӱрӱмин јакшы јанындӧӧн солыыр аргалу. Агару Бичиктиҥ билгирлери јаман кылык-јаҥнаҥ айрыларга ла ӱргӱлји јӱрӱмге ижемјилӱ болорго болужып јат (Ис 48:17, 18; Рм 1:16). Бойыҥды улустыҥ јӱрӱмин аргадайтан ишке туружып тургаҥ деп сананып тур. Кезик улус аргаданарга кӱӱнзебес болор, је сен аргаданарга турган улусты бедире (Мф 10:11—14).

Ӱчинчизинде, эҥ ле керектӱзи, јарлаар ишке туружып турганыс Иеговага мак экелет. Оныҥ Керечилери болгонысты Ол сӱрекей баалап јат (Ис 43:10; Евр 6:10). Анайда ок, Оныҥ јакарузын бӱдӱрерге, Бойыныҥ агару тынын артыгынча берет. Оныҥ учун Иегованаҥ сӱӱнчи сура, не дезе сӱӱнчи — агару тынныҥ тӱжӱми болот (Гл 5:22). Иегованыҥ болужыла сӱӱнчилӱ јарды јалтанбай јарлаарыс (Ап.и 4:31). Ол тушта, улус бисти укса да, укпаза да, јарлаар иш сӱӱнчи экелер (Иез 3:3).

«АГАРУ БИЧИКТИ ӰРЕНЕРИ ЛЕ ШӰӰП САНАНАРЫ ЈЫЛЫЙГАН СӰӰНЧИҤДИ КАЙРА ЭКЕЛЗИН» ДЕГЕН КӦРӰЛМЕНИ КӦРГӦНИНИҤ КИЙНИНДЕ МЫНДЫЙ СУРАКТАРГА КАРУУ БЕР:

• Кӧп јарлап турган болзоос, кӧгӱс курсакты јаантайын кычырбаза да кем јок деп сананары нениҥ учун јастыра?

• Иисустыҥ энезинеҥ, Мариянаҥ, сен неге ӱренер аргалу?

• Кудайдыҥ Сӧзин кандый ӧйдӧ шӱӱп сананадыҥ?

• Сен јарлаар иште эҥ ле тыҥ неге сӱӱнедиҥ?