Кӱйӱнишле тартыжып, амырга јӱткӱгер!

1. Иосифтиҥ билезинде кӱйӱништеҥ улам не болгон?

ИАКОВ бойыныҥ ончо уулдарын сӱӱген, је анчада ла 17 јашту Иосифти тыҥ сӱӱген. Мынаҥ улам Иосифтиҥ акалары ого кӱнӱркеп, оны кӧрӧр кӱӱндери јок боло берген. Је Иосиф мындый айалгага экелгедий јаман нени де этпеген. Андый да болзо, акалары оны кулданышка садып ийеле, адазына сӱӱген уулын, Иосифти, казыр аҥ јара тартып салган деп айткан. Мындый кӱйӱништеҥ улам олордыҥ билезиниҥ амыры јылыйган ла Иаковтыҥ јӱрегине ачу сыс тӱшкен (Баш. 37:3, 4, 27—34).

2. Галаттарга 5:19—21-ле болзо, кӱйӱниш неге экелет?

² Агару Бичикте кӱйӱнишb «эт-канныҥ керектерине» кирет деп айдылат. Мындый каршулу керектер эдип турган кижи Кудайдыҥ Каандыгына кирбес. (Галаттарга 5:19—21 кычырыгар.) Кӱйӱништеҥ улам јамандаш, ӧӧн-бӧкӧн лӧ атыйланыш болуп јат.

3. Бу јӧрмӧлдӧ нени шӱӱжерис?

³ Иосифтиҥ акаларыныҥ темин кӧрзӧ, кӱйӱништеҥ улам улус ортодо јакшы колбулар ӱрелип јат ла биледеги амыр јылыйып јат. Бис качан да Иосифтиҥ акалары чылап этпес те болзоос, је толо кемдӱ эмезистеҥ улам тӧгӱнчи јӱрегиске тӧгӱндедип јадыс (Иер. 17:9). Оныҥ учун кезикте улуска кӱйӱнип турганыска кайкабай јадыс. Эмди Агару Бичиктиҥ кезик темдерин кӧрӱп ийектер. Бу темдер, кижиниҥ јӱрегинде недеҥ улам кӱйӱниш тазылданып турганын билип аларга болужар. Мыныҥ кийнинде, улусла амыр јӱрерге, кӱйӱнишле канайып тартыжарын билип аларыс.

КИЖИ НЕДЕҤ УЛАМ КӰЙӰНЕТ?

4. Филистимляндар Исаакка нениҥ учун кӱйӱнген?

⁴ Улустыҥ јакшы јадын-јӱрӱми. Исаак бай кижи болгон, оныҥ учун филистимляндар оныҥ јакшы јадын-јӱрӱмине кӱйӱнген (Баш. 26:12—14). Керек дезе олор, Исаактыҥ мал-ажын сугарып турган колодецти кӧмӱп салган (Баш. 26:15, 16, 27). Бӱгӱнги кӱнде кезик улус бу филистимляндар чылап, бойлорына кӧрӧ акча-јӧӧжӧзи кӧп улуска кӱйӱнип јат. Андый улус ӧскӧ улустыҥ немезин јӱк ле кӱӱнзеп турган эмес, је улусты бар не-немезин јылыйтып салзын деп кӱӱнзейт.

5. Кудай јаҥныҥ башчылары Иисуска нениҥ учун кӱйӱнген?

⁵ Кемге-кемге ајару эдилип турза. Иудейлердиҥ кудай јаҥыныҥ башчылары Иисус Христоско кӱйӱнген, нениҥ учун дезе оны тегин албаты сӱӱп туратан (Матф. 7:28, 29). Иисус Кудайдыҥ чыгартылу кижизи болуп, улусты чындыкка ӱреткен. Је кудай јаҥныҥ башчылары ол керегинде јескинчилӱ тӧгӱн јайып, оныҥ јакшы адын јамандаган (Марк 15:10; Иоанн 11:47, 48; 12:12, 13, 19). Бу бисти неге ӱредет? Бистер јуунда јакшы кылык-јаҥы учун бааладып турган ака-эјелерге кӱйӱнбес учурлу. Мыныҥ ордына биске бойыска јакшы кылык-јаҥдарга ӱренер керек. Ол тушта ака-эјелер бисти де сӱӱр (1 Кор. 11:1; 3 Иоанн 11).

6. Диотрефтиҥ кӱйӱнгени недеҥ кӧрӱнген?

⁶ Ака-эјелерге молјулар берилзе. Баштапкы чакта јаткан Диотреф, христиан јуунда башкарар јаҥды алган улуска кӱйӱнип баштаган. Ол христиандардыҥ ортозында «баштапкы болорго сӱӱйтен», оныҥ учун апостол Иоаннды ла молјулу ӧскӧ дӧ акаларды јамандап туратан (3 Иоанн 9, 10). Бис Диотреф чилеп улусты качан да јамандабас болорыс, је бистиҥ аларга сананган молјулар ӧскӧ ака-эјелерге берилип турза, анчада ла бу молјуларды бис те јакшы бӱдӱрип ийерис деп сананып турзаас, кӱйӱнип баштаардаҥ айабазыс.

7. Кӱйӱниш биске кандый салтарын јетирердеҥ айабас?

⁷ Кӱйӱниш баргаага тӱҥей. Бу јаман кылык јӱрегисте тазылдана берзе, оноҥ айрыларга коркышту кӱч болор. Мындый кылык-јаҥды кӱнӱркеш, бийиркениш ле јӱк бойын сӱӱри там тыҥыдып јат. Кӱйӱниш јакшы кылык-јаҥдарды: сӱӱшти, килемјини ле јалакай болорын туй базып ийер. Оныҥ учун кӱйӱниш слерди баргаа чылап туй базып ийбезин деп, баргааныҥ ӧзӱп келеткени кӧрӱне ле берзе, оны кодоро тартып салыгар. Мыны канайып эдер керек?

ЈОБОШ БОЛУГАР ЛА НЕ БАРЫЛА БОЛОРЗЫНЫП ЈӰРИГЕР

8. Кӱйӱнериле тартыжарга кандый кылык-јаҥдар болужар?

⁸ Кӱйӱнериле тартыжарга, јобош болоры ла не барыла болорзынып јӱрери болужар. Јӱрегис мындый кылык-јаҥдарла толо болзо, бис кемге де, неге де кӱйӱнбезис. Јобош кижи бийиркенбей јат ла улустаҥ аҥылу ајару сакыбай јат (Гал. 6:3, 4). Не барыла болорзынып јӱрген кижи бар немезин баалап јат, анайда ок бойын улусла тӱҥдештирбей јат (1 Тим. 6:7, 8). Не барыла болорзынып турган јобош кижи улустыҥ јакшы јадын-јӱрӱмине ле једимдерине сӱӱнип јат.

9. Галаттарга 5:16-да ла Филиппыдагыларга 2:3, 4-тӧ бичилгениле болзо, агару тын биске канайып болужат?

⁹ Кӱйӱнбеске, не барыла болорзынып јӱрерге ле јобош болорго, агару тынныҥ болужы керек. (Галаттарга 5:16; Филиппыдагыларга 2:3, 4 кычырыгар.) Иегованыҥ агару тыны биске јажытту сезимдеристи ле кӱӱнисти шиҥдеп кӧрӧргӧ болужат. Бис Кудайдыҥ болужыла јаман санааларды ла сезимдерди јакшы кылык-јаҥга солыыр аргалу (Сар. 26:2; 51:10). Эмди, кӱйӱништиҥ тузагына тӱшпеген Моисей ле Павелдиҥ темдерин эске алып ийектер.

10. Моисейдиҥ јобожы кандый айалгада ченелген болор? (Кадарындагы јурукты кӧрӱгер.)

¹⁰ Моисейге Кудайдыҥ албатызын башкарар јаҥ берилген де болзо, бу јаҥ ӧскӧ улуска берилбезин деп, ол албан кӱчиле албаданбаган. Темдектезе, бир катап Иегова Моисейге берген агару тыннаҥ алып, агару байканныҥ јанында јуулган Израильдиҥ кезик аксагалдарына берген. Је јаан удабай ла Моисей агару байканныҥ јанына келбеген эки аксагалга база агару тын берилгенин ле олордыҥ судурлап турганын билип ийген. Мынаҥ улам Иисус Навин олорды токтотсын деп сураарда, Моисей нени этти? Иегова олорго до мындый ајару эткенине Моисей кӱйӱнбеген. Карын, олордыҥ судурлап баштаганына сӱӱнген (Тоол. 11:24—29). Бис Моисейдиҥ теминеҥ неге ӱренедис?

11. Аксагалдар Моисейдеҥ кандый тем алар аргалу?

¹¹ Слер аксагал болзогор, слерде сӱӱген кандый бир молју бар болор. Је слерди бу молјуны јуундагы ӧскӧ ака бӱдӱрзин деп ӱредип саларына качан бирде сураган ба? Темдектезе, слер кажы ла неделе «Каруулчы шибеени» шӱӱжерин ӧткӱрип турганаар. Бу молју слерге тыҥ јарап јат. Је слер Моисей чилеп јобош болзогор, слерди ӧскӧ аканы ӱретсин деп сураза, акалар слерди баалабай турган деп сананбазыгар. Карын, акага сӱӱнип болужараар.

12. Кӧп христиандар јобош болгонын ла не барыла болорзынып турганын канайып кӧргӱзет?

¹² Эмди, јажы јаанаган акалардыҥ айалгазын кӧрӱп ийектер. Олордыҥ кезиги кӧп јылдардыҥ туркунына аксагалдардыҥ јӧбиниҥ координаторлоры болуп иштеген. Је 80 јашка једе берзе, олор бойыныҥ молјуларын ӧскӧ акаларга берип ийет. Анайда ок 70 јашка јеткен аймак кӧрӧӧчилер бойыныҥ молјуларын јиит акаларга табыштырып, Иегованыҥ организациязында ӧскӧ јакарулар бӱдӱредилер. Бого коштой калганчы јылдарда, Бет-Элде иштеген кӧп ака-эјелер јуундарга болушсын деп аткарылган. Бу чындык ака-эјелер эм тура олордыҥ молјуларын бӱдӱрип турган ака-эјелерге ачынбай јат.

13. Павел неге кӱйӱнер аргалу болгон?

¹³ Апостол Павел — јобош болорыныҥ ла не барыла болорзынып јӱрериниҥ база бир јакшы теми. Павел бойыныҥ јӱрегинде кӱйӱништи бир де ӧскӱрбеген. Ол јарлаар иште кӧп иштеген де болзо, јобош артып: «Мен ончо апостолдордыҥ јабызы инем, апостол деп адаларга турбазым» — деп айткан (1 Кор. 15:9, 10). Павел, Иисусла кожо иштеп јӱрген 12 апостолго кӧрӧ, Христостыҥ божогоныныҥ ла тирилгениниҥ кийнинеҥ христиан болуп баштаган. Је, кийнинде оны «ӧскӧ калыктарга» апостол эдип кӧстӧгӧн дӧ болзо, ол 12 апостолдыҥ тоозына качан да кирбеген (Рим. 11:13; Ап. ижи 1:21—26). Павел олорго до, олордыҥ Иисусла јуук најылар болгонына да бир де кӱйӱнбеген. Ол не барыла болорзынып јӱрген.

14. Јобош болуп, не барыла болорзынып турзаас, бис нени эдерис?

¹⁴ Бис Павел чилеп јобош болуп, не барыла болорзынып турзаас, Иегованаҥ башкаратан јаҥ алган улусты тооп турарыс (Ап. ижи 21:20—26). Кудайдыҥ табыла болзо, христиан јуунды кӧстӧлгӧн эр улус башкарып јат. Олор толо кемдӱ эмес те болзо, Иегова «олорды сый эдип берилген улус» (ЈТ) деп кӧрӧт (Еф. 4:8, 11). Бис олорды тооп, олордыҥ башкартузын јобош бӱдӱрип турзаас, Иеговала јуук колбуларлу болорыс, анайда ок ака-эјелерисле амыр јӱрерис.

АМЫРГА ЈӰТКӰЙЛИ

15. Биске нени эдер керек?

¹⁵ Бис кӱйӱнишке, баргаага чылап, туй бастыртып турзаас, ортобыста амыр јылыйып јат. Оныҥ учун кӱйӱништи јӱрегистеҥ тазыл-тамырыла кодоро тартып, улустыҥ да јӱрегине кӱйӱништиҥ ӱренин чачпас керек. Бис бу јакылталарды, Иегованыҥ: «Амырды экелип, бой-бойыбысты тыҥыдып турганга јӱткӱйли» — деп јакарузын бӱдӱрерге, ундыбас учурлу (Рим. 14:19). Је улуска кӱйӱнишле тартыжарга ла бой-бойы ортодо амыр-энчӱ јӱрерге канайып болужарыс?

16. Кӱйӱнериле тартыжарга, улуска канайып болужарга јараар?

¹⁶ Бистиҥ керектерис ле кӱӱн-санаабыс улуска јакшызын эмезе јаманын јетирердеҥ айабас. Бу телекей бисти «јадын-јӱрӱмисле» мактанып турзын деп кӱӱнзедет (1 Иоанн 2:16). Је мактаныш кӱйӱнишке экелет. Улусты кӱйӱндирбеске турган болзоос, бар немегисти эмезе садып аларга турган немегисти јаантайын ла куучындабазыс. Анайда ок јуунда кандый бир молјуларысла мактанбазыс. Мактанып турзаас, кӱйӱнишле тартыжып турган кижиге кӱч болор. Је ака-эјелерле акту јӱрегистеҥ јилбиркеп, олорды мактап турзаас, олорго не барыла болорзынып турарга, анайда ок јуунныҥ амырына ла бирлигине јӧмӧжип јадыс.

17. Иосифтиҥ акалары солынган ба? Бу олордыҥ билезине кандый туза экелген?

¹⁷ Бис кӱйӱништи јӱрегистеҥ јоголтып салар аргалу! Иосифтиҥ акаларыныҥ темин ойто катап кӧрӱп ийектер. Олордыҥ Иосифти кулданышка садып ийгенинеҥ бери кӧп јылдар ӧдӱп калган. Је эмди олор Иосифке Египетте туштап јат. Иосиф дезе, бойын акаларына тургуза ла ачпай, олордыҥ кылыгы солынган ба деп кӧрӧргӧ сананган. Оныҥ учун олорды кожо ажанарына кычырган ӧйдӧ, ол јаан ајаруны акаларына эмес, је эҥ кичинек карындажына, Вениаминге, эткен (Баш. 43:33, 34). Је бу тушта акалары Вениаминге кӱйӱнбеген. Карын, олор кичинек карындажы ла адазы учун чыннаҥ ла санааркай берген (Баш. 44:30—34). Айдарда, Иосифтиҥ акалары кӱйӱнбей барарда, олордыҥ билезине амыр келген (Баш. 45:4, 15). Анайып ла бис бир ле кичинек кӱйӱништи тазылыла катай кодорып турган болзоос, билегистиҥ де, јууныстыҥ да амырына јӧмӧжӧдис.

18. Иаков 3:17, 18-ле болзо, улусла амыр-энчӱ јӱрерге албаданып турзаас, бис неге ӱренерис?

¹⁸ Иегова бисти кӱйӱнишле тартыжып, амырга јӱткӱзин деп кӱӱнзейт. Биске бу экӱни бастыра кӱчисле бӱдӱрерге албаданар керек. Кинчектӱ болгоныстаҥ улам бистиҥ кажыбыс ла кӱйӱнердеҥ айабас (Иак. 4:5). Анайда ок бис бу коронду кылык-јаҥга кӱӱнзедип турган улустыҥ ортозында јададыс. Је бис јобош болзоос, не барыла болорзынып турзаас, анайда ок быйанду болзоос, неге де, кемге де кӱйӱнбезис. Анайып, улусла амыр-энчӱ јӱрерге албаданып турзаас, јакшы кылык-јаҥдарга ӱренерис. (Иаков 3:17, 18 кычырыгар.)