Кычыраачылардыҥ сурактары

Агару тынныҥ тӱжӱмине јӱк ле Галаттарга 5:22, 23-те бичилген тогус кылык-јаҥ кирет пе?

Бу ӱлгерлерде айдылганыла: «Тыннаҥ туулганы: сӱӱш, сӱӱнчи, амыр, узакка чыдажыш, быйанзыш [«јалакай», ЈТ], буурзаш, бӱдӱмји, јобожыш, тудуныш». Је агару тын биске мынаҥ да ӧскӧ кылык-јаҥга ӱренип аларга болужат.

Апостол Павел мынаҥ озо турган ӱлгерлерде нени бичигенин ајарып ийзеер де: «Эт-канныҥ керектери иле: балыр јӱрӱм, быјар, токтодынбазы, чалуга бажырыш, илбизин, ӧштӧш, кериш-чугаан, кӱнӱркеш, чугул, ӧӧн-бӧкӧн, бӧлиниш, јайрадуга экелеечи тӧгӱн ӱредӱ, јаман кӧрӱш, ӧлтӱриш, аракыдаш, той-јыргал ла бого тӱҥей немелер» (Гал. 5:19—21). Айдарда, Павелдиҥ тоологон «эт-канныҥ керектерине» ӧскӧ дӧ кинчектер кирет. Темдектезе, Колоссыдагыларга 3:5-те айдылган кинчектер. Анайып ла Галаттарга 5:22, 23-те бичилген тогус кылык-јаҥнаҥ ӧскӧ база да јакшы кылык-јаҥдар бар. Айдарда, Павелде агару тынныҥ болужыла ӱренип алатан кылык-јаҥдардыҥ ончозын тоолойтон амаду болбогон.

Анайып ла Павел Тимофейди сӱрекей јакшы алты кылык-јаҥга ӱрензин деп кӱӱнзеткен: акту болорына, Кудайга беринерине, бӱдӱп јӱрерине, сӱӱшке, чыдамкай ла јобош болорына (1 Тим. 6:11). Павел олордыҥ јӱк ле ӱчӱзин (бӱдӱп јӱрерин, сӱӱшти ле јобош болорын) агару тынныҥ тӱжӱмине кийдирген. Тимофейге дезе, Павелдиҥ айткан ӧскӧ дӧ кылык-јаҥдарына ӱренип аларга, агару тынныҥ болужы керек болгон. Темдектезе, акту болорына, Кудайга беринерине ле чыдамкай болорына. (Колоссыдагыларга 3:12; 2 Петр 1:5—7 тӱҥдештиригер.)

Айдарда, Галаттарга 5:22, 23-те христиандарга керектӱ кылык-јаҥдардыҥ ончозы тоололбогон. Кудайдыҥ агару тыны биске тынныҥ тӱжӱмине кирип турган тогус кылык-јаҥга ӱренип аларга болужат. Је кӧгӱзи тереҥ христиан болорго ло «Кудайга тӱҥейлеп, чындаптаҥ акту ла агару эдип јайалган јаҥы кижини» кийип аларга, биске ӧскӧ дӧ кӧп кылык-јаҥдарга ӱренер керек (Еф. 4:24).