Эш-нӧкӧрлӧр, Иеговага иштеерин баштапкы јерге тургузыгар

1, 2. а) Јаҥы биле тӧзӧгӧндӧргӧ нениҥ учун Иеговага иженер керек? (Сарын 37:3, 4). б) Бу јӧрмӧлдӧ бис нени шӱӱжерис?

СЛЕР бу јуукта биле тӧзӧгӧнӧӧр эмезе той эдерге турган болзоор, сӱӱген кижигерле бастыра јӱрӱмигерге кожо болорго кӱӱнзейдеер. Је андый да болзо, билелик јӱрӱмде бойыныҥ кӱчтери бар. Оныҥ учун эш-нӧкӧрлӧргӧ ойгор јӧптӧр чыгарар керек. Мынаҥ билелик јӱрӱмигердиҥ ырызы камаанду. Слер Иеговага ижензеер, ойгор јӧптӧр чыгарып турараар, билегер бек ле ырысту болор. Је Кудайдыҥ јӧптӧрин укпазаар, эш-нӧкӧригерле колбулараар уйадап, билегерде кӱчтер башталар. (Сарын 37:3, 4 кычырыгар.)

² Бу јӧрмӧл озо ло баштап, јаҥы биле тӧзӧгӧндӧргӧ учурлалган да болзо, анда кажы ла биледе болуп турган уур-кӱчтер шӱӱжилер. Бис Агару Бичиктеги Кудайга чындык эр ле ӱй улустыҥ темдеринеҥ неге ӱренер аргалу деп шӱӱжерис. Мындагы шӱӱжилетен јӧптӧр јӱк ле билеге эмес, је јӱрӱмниҥ ӧскӧ дӧ јанына тузалу болор. Анайда ок эмдиги ӧйдиҥ билелериниҥ темдерин кӧрӧрис.

БИЛЕ ТӦЗӦГӦНДӦ КАНДЫЙ КӰЧТЕР БАШТАЛАТ?

3, 4. Јаҥы биле тӧзӧгӧндӧрдӧ кандый кӱчтер болордоҥ айабас?

³ Јаҥы биле тӧзӧгӧндӧрди ада-энези балдарлу болзын деп кӱӱнзедет. Эмезе тӧрӧӧндӧри ле најылары јакшы сананып, олордо эптӱ, јакшы тура болзын деп айдыжат.

⁴ Јаҥы биле тӧзӧгӧндӧр сананбай јадып јӧп чыгарза, тӧлӱге тӱжер эмезе кредиттерге кирип калар. Тӧлӱнеҥ чыгарга ӧбӧӧнине де, ӱйине де кӧп иштеерге келижер. Иш араайынаҥ олордыҥ Агару Бичикти шиҥдеп ӱренетенин, билелик бажырыш ӧткӱретенин ле јарлаар ишке туружатан ӧйин айрып баштаар. Иштеп турган јерин јылыйтпаска ла кӧп акча иштеп аларга болуп, олор кӧп иштеп, јуунныҥ туштажуларын да божодып баштаар. Учы-тӱбинде олор Иеговага иштееринеҥ алып турган сӱӱнчизин јылыйтар.

5. Клаус ла Марисаныҥ теминеҥ слер неге ӱрендеер?

⁵ Улустыҥ јӱрӱмин кӧрзӧ, јӱк акча јууган улус ырысту болбой јат. Бого Клаус ла Марисаb бӱдӱмјиленген. Тойдыҥ кийнинде јурӱминде ончо неме јеткилинче болзын деп, олор экӱлези бӱдӱн кӱнге иштегилеген. Је олор чындаптаҥ ырысту болбогон. Клаус куучындаган: «Јӧӧжӧ бисте артыгынча да болгон болзо, је кӧгӱс јанынаҥ бис уйадап калганыс. Чынынча айтса, јӱрӱмисти бис бойыс ла уурладып, стресске киргенис». Канча да кире кӧп јӧӧжӧдӧҥ кижи сӱӱнчи албай турган деп, слер бойоор до ајарган болороор. Слердиҥ јӱрӱмигер Клаустыҥ куучындаганына тӱҥей болзо, санааркабагар. Бу јӧрмӧлдӧ јӱрӱмигерде керектӱ солынталар эдетен јӧптӧр бар. Озо баштап Иосафат каанныҥ теминеҥ билениҥ бажы болуп турган улус неге ӱренер аргалу деп кӧрӱп ийектер.

ИЕГОВАГА ИОСАФАТ КААН ЧЫЛАП ИЖЕНИГЕР

6. Иосафат кӱч айалгада Укаа сӧстӧрдиҥ 3:5, 6-дагы ойгор јӧпти канайып тузаланган?

⁶ Билениҥ бажы болуп турган эр улус, слерге бойоордыҥ молјуугарды бӱдӱрерге кӱч болот по? Эйе болзо, слерге Иосафат каанныҥ теми болужар. Ол бӱдӱн албатыныҥ амыр јӱрӱми учун каруулу болгон. Ого бу мындый јаан јӱкти апарарга не болушкан? Ол Иудеяныҥ калаларын тыҥыдып, 1160000-наҥ ажыра јуучылдаҥ турган јаан ийде-кӱчтӱ черӱ јууган (2 Лет. 17:12—19). Кийнинде Иосафат, оныҥ билези ле албатызы јеткерлӱ айалгада боло берген: олорго удура аммонитяндардыҥ, моавитяндардыҥ ла Сеир кырдыҥ улузы туруп чыккан (2 Лет. 20:1, 2). Бу айалгада Иосафат каан нени эткен? Ол Иеговага мӱргӱп, болуш сураган. Шак ла мынай эдерге, Укаа сӧстӧрдиҥ 3:5, 6-дагы (кычырыгар) ойгор јӧби кӱӱнзедет. 2 Летопись 20:5—12-де Иосафаттыҥ мӱргӱӱли бичилген. Оныҥ акту јӱрегинеҥ айткан сӧстӧринеҥ теҥеридеги Адазына бӱткӱлинче иженгени кӧрӱнет. Иегова Иосафаттыҥ мӱргӱӱлине кандый каруу берген?

7. Иегова Иосафаттыҥ мӱргӱӱлине кандый каруу берген?

⁷ Иегова Иосафатка Яхазиил деп атту левит ажыра айткан: «Бек туруп, Иегова слерди канайып аргадаарын кӧрӱгер» (2 Лет. 20:13—17). Јуулажып турган ӧйдӧ бу саҥ башка јакару деп билдирген болор. Је бу јакару кижинеҥ эмес, Иегованаҥ болгон. Иосафат бойыныҥ Кудайына бӱткӱлинче бӱдӱп, черӱниҥ алдына ченемелдӱ јуучылдарды эмес, је јуулажатан јепсел јок Иегованы мактап турган кожоҥчыларды тургускан. Иегова берген сӧзин бӱдӱрген. Ол ӧштӱниҥ черӱзин јоголтып салган (2 Лет. 20:18—23).

8. Билениҥ бажы болуп турган эр улус Иосафаттыҥ теминеҥ неге ӱренер аргалу?

⁸ Билениҥ бажы болуп турган эр улус, слер Иосафаттыҥ теминеҥ кӧп немеге ӱренип алар аргалу. Слер јуук улузыгар учун каруулу болуп јадыгар. Олорды кичеерге ле олорго болужарга слер албаданып иштейдеер. Уур-кӱчтер болуп турза, оныҥ аайы-бажына бойоордыҥ ла ийде-кӱчигерле чыга берер деп сананар болороор. Је јӱк ле бойыгарга иженбегер, оныҥ ордына бойыгар Иеговага мӱргӱгер, ӱйигерле кожо мӱргӱп туругар. Агару Бичикти ле Иегованыҥ организациязыныҥ чыгарып турган бичиктерин шиҥдеп, оныҥ башкартузын бедирегер. Оноҥ, Кудайдыҥ јӧптӧри аайынча јӱригер. Слердиҥ чыгарып турган јӧптӧрӧӧрди та кем де јаратпас болор. Кезик улуска бу саҥ-башка деп билдирердеҥ айабас. Олор айдыжар болор: биледе ӱзе неме јеткил болзын деп, билениҥ бажына, эр кижиге, кӧп акча иштеер керек деп. Је Иосафаттыҥ темин ундыбагар. Ол Иеговага бӱткӱлинче иженген. Бу оныҥ керектеринеҥ кӧрӱнген. Иегова бойыныҥ чындык ишчизин артыргыспаган. Ол слерди де артыргыспас! (Сар. 37:28; Евр. 13:5). Билелик јӱрӱм ырысту болзын деп, эш-нӧкӧрлӧр нени эдер аргалу?

ИСАЙЯ ЛА ОНЫҤ ӰЙИ ЧИЛЕП, ИЕГОВАНЫ БАШТАПКЫ ЈЕРГЕ ТУРГУЗЫГАР

9. Исайя ла оныҥ ӱйи керегинде бис нени билерис?

⁹ Исайя ла оныҥ ӱйи Иеговага иштеерин баштапкы јерге тургускан. Мыны бис кайдаҥ билерис? Исайя судурчы болуп иштеген. Агару Бичикте оныҥ ӱйи судурчы деп адалат. Айдарда, Иегова ого до бу ишле колбулу јакылталар берген болор (Иса. 8:1—4). Мынаҥ кӧрзӧ, бу эш-нӧкӧрлӧрдиҥ јӱрӱми Иеговага иштеериле колбулу болгон. Бӱгӱнги кӱнниҥ билелерине бу сӱреен јакшы тем болуп јат!

10. Библиялык судурларды шиҥдегени Иеговага кӧптӧдӧ иштеерге эш-нӧкӧрлӧрдиҥ кӱӱнин канайып тыҥыдар аргалу?

¹⁰ Бӱгӱнги кӱнниҥ эш-нӧкӧрлӧри Исайяныҥ билезинеҥ тем алып, Иеговага иштеерге канча кире аргалары бар, ончоны эдер аргалу. Олор библиялык судурларды кожо шиҥдеп, судурлардыҥ јаантайын бӱдӱп турганында бӱдӱмјиленип алза, олордыҥ Иеговага ижемјизи тыҥыыр (Тит. 1:2)c. Анайда ок эш-нӧкӧрлӧрдиҥ кажызы ла библиялык кезик судурлардыҥ бӱдӱп турганына канайып туружарын шӱӱп сананза тузалу болор. Темдектезе, олор бу калју телекейдиҥ учы келгелекте, «Каандык керегинде Сӱӱнчилӱ Јар јер-ӱстине јарлалар» деген Иисустыҥ сӧстӧрин шӱӱп сананар аргалу (Матф. 24:14). Эш-нӧкӧрлӧр библиялык судурлардыҥ сӧстӧри чике бӱдӱп турганын јарт кӧрӱп турза, Иеговага иштеер кӱӱни там тыҥыыр.

ПРИСКИЛЛА ЛА АКИЛА ЧЫЛАП, КААНДЫКТЫҤ ИЖИН БАШТАПКЫ ЈЕРГЕ ТУРГУЗЫГАР

11. Прискилла ла Акила кандый иште турушкан, нениҥ учун?

¹¹ Јаҥы биле тӧзӧгӧндӧргӧ Римде јаткан эш-нӧкӧрлӧр, Прискилла ла Акила, сӱреен јакшы тем болуп јат. Олор еврей укту болгон. Је Иисус керегинде сӱӱнчилӱ јарды угуп, христиандар болуп калган. Олордыҥ јӱрӱминде ӱзе јакшы болгон. Је качан император Клавдий ончо еврейлерди Римнеҥ јӱрзин деп јакару чыгарарда, олордыҥ айалгазы кенетийин солына берген. Олорго айылын, байкандар белетеер ижин артыргызып, ӧскӧ калага кӧчӱп, ончо немени јаҥыдаҥ баштаарга келишкен. Мындый јаҥы кӱчтердеҥ улам, Каандыктыҥ керектери экинчи јерге тура берген бе? Бу сурактыҥ каруузын слер јакшы билер болороор. Олор Коринфтеги јуунла эрчимдӱ иштеп, апостол Павелле кожо ака-эјелердиҥ бӱдӱмјизин тыҥыткан. Кийнинде олор јарчылар јетпей турган калаларга канча катап кӧчкӧн (Ап. ижи 18:18—21; Рим. 16:3—5). Олордыҥ јӱрӱми сӱӱнчилӱ ле јилбилӱ болгон!

12. Нениҥ учун эш-нӧкӧрлӧргӧ кӧгӱс амадулар тургузар керек?

¹² Бӱгӱнги кӱнде биле тӧзӧӧргӧ тургандар Прискилла ла Акиланаҥ тем алып, Каандыктыҥ ижин бойыныҥ јӱрӱминде баштапкы јерге тургузар аргалу. Мыны алыжардаҥ озо куучындажып салза, јакшы болор эди. Олордыҥ кӧгӱс амадулары јаҥыс болзо ло бу амадуларына јединерге кожо албаданып турза, агару тын олордыҥ јӱрӱмиле башкарар (Эккл. 4:9, 12). Бу чын ла андый деп, Расселл ле Элизабеттиҥ сӧстӧри кӧргӱзип јат. Расселл куучындаган: «Бис кӧгӱс амадуларысты алыжардаҥ озо шӱӱжип салганыс». Элизабет айдат: «Бу кийнинде билелик јӱрӱмиске болушкан. Тургузып алган амадуларыска јединерге, не де чаптыгын јетирбезин деп албаданып туратаныс». Кийнинде Расселл ле Элизабет Микронезиядӧӧн, јарчылар јетпей турган јердӧӧн, кӧчӧ берген.

13. Сарын 28:7-ле болзо, Иеговага иженип турган эш-нӧкӧрлӧр кандый туза алат?

¹³ Бӱгӱнги кӱнде эш-нӧкӧрлӧр Расселл ле Элизабет чылап, база јӱрӱмин јеҥилтип јадылар. Анайып, олордо Иеговага иштеер кӧп арга болуп јат. Андый эш-нӧкӧрлӧрдиҥ ижи качан да калас болбос. Нениҥ учун дезе олор Кудайдыҥ болужын кӧрӱп турза, Иеговага оноҥ тыҥ иженет, анайда ок чыннаҥ ла ырысту болот. (Сарын 28:7 кычырыгар.)

ИЕГОВАНЫҤ СӦЗИНЕ АПОСТОЛ ПЁТР ЛА ОНЫҤ ӰЙИ ЧИЛЕП БӰДИГЕР

14. Апостол Пётр ла оныҥ ӱйиниҥ Матфей 6:25, 31—34-тӧги сӧстӧргӧ бӱткени недеҥ кӧрӱнет?

¹⁴ Эш–нӧкӧрлӧр апостол Пётрдаҥ ла оныҥ ӱйинеҥ де тем алар аргалу. Пётр Иисусла танышканынаҥ ала бир бе, бӱдӱн јарым ба јыл ӧдӧ берерде, Иисус оны ӱренчиги болзын деп кычырып јат. Пётр билелӱ болгон. Оныҥ учун ол Иисустыҥ ӱренчиги болотон бо, јок по деп шӱӱп сананып јат. Ол билезин јеткилдеерге балыктап туратан (Лука 5:1—11). Ӱзе јанынаҥ шӱӱп кӧрӧлӧ, Пётр Иисустыҥ кычырузына јӧпсинип јат. Мынайып ол чын талдаш эткен. Мынаҥ Пётрдыҥ ӱйи ӧбӧӧниниҥ талдаганыла јӧп болгоны кӧрӱнет. Ол Иисустыҥ тирилген кийнинеҥ канча да ӧйгӧ бойыныҥ ӧбӧӧниле кожо јарлап, јорыктап туратан (1 Кор. 9:5). Пётр ӱйиниҥ мындый кылык-јаҥду болгонынаҥ ла Кудайга чындык болгонынаҥ улам јуундагы эш-нӧкӧрлӧргӧ јӧп берип турар аргалу болгон (1 Пётр 3:1—7). Айдарда Пётр да, оныҥ ӱйи де Каандыктыҥ керектерин баштапкы јерге тургусканынаҥ, олор Иегованыҥ болужар деп айткан сӧзине бӱткен деп кӧрӱп јадыс. (Матфей 6:25, 31—34 кычырыгар.)

15. Бис Тьягу ла Эстердиҥ теминеҥ неге ӱренедис?

¹⁵ Эш-нӧкӧрлӱ болгоноор удап калган болзо, Иеговага кӧптӧдӧ иштеерге слерге не болужар? Эш-нӧкӧрлӱ ака-эјелердиҥ темдери болужар. Андый эш-нӧкӧрлӧрдиҥ темдери «Они с готовностью предоставили себя для служения» деген рубриканыҥ јӧрмӧлдӧринде барd. Бразилияда јадып турган Тьягу ла Эстер эш-нӧкӧрлӧр, бу јӧрмӧлдӧрди кычырып турала, јарчылар јетпей турган јердӧӧн кӧчӧр кӱӱндери келген. Тьягу ака куучындайт: «Бис бу јӧрмӧлдӧрдӧҥ Иегова бӱгӱнги кӱнниҥ ишчилерине канайып болужып турганын кӧргӧнис. Анайып, бистиҥ де Иегованыҥ башкартузын ла болужын алар кӱӱнис келген». Кийнинде олор Парагвайдӧӧн кӧчӧрӧлӧ, 2014 јылдаҥ ала португальский тилге јарлап баштап јат. А Эстер мынайып куучындаган: «Бис экӱге Ефестегилерге 3:20-деги сӧстӧр сӱреен јарап јат. Бу сӧстӧрдиҥ бӱдӱп турганын бойыстыҥ јӱрӱмисте јаантайын кӧрӱп јадыс». Апостол Павел бу ӱлгерде мындый сӧстӧр айткан: «Кудай дезе... нени сураганыстаҥ... чик-јок кӧпти эдер аргалу». Бу сӧстӧрдиҥ бӱдӱп турганын бойыстыҥ кӧзисле кӧрӧдис.

16. Кӧгӱс амадуларын сананып турган јаҥы билелерге кемниҥ јӧптӧри болужар?

¹⁶ Јаҥы алышкан улус билелӱ ӧскӧ улустыҥ ченемелинеҥ ӱренер аргалу. Нениҥ учун дезе олордыҥ кезиги Иеговага кӧп јылдардыҥ туркунына ӧйин берип иштегилейт. Слер кандый кӧгӱс амадулар тургузарын сананып турган болзоор, андый ака-эјелердеҥ не јӧп сурап кӧрбӧзӧӧр? Бу дезе Иеговага иженип турганаарды кӧргӱзетен база бир арга болуп јат (Укаа 22:17, 19). Анайда ок кӧгӱс амадулараар керегинде ле олорго једерге нени эдер керек деп билерге, аксагалдарла куучындажып ийерге јараар.

17. Клаус ла Мариса эш-нӧкӧрлӧрдӧ кандый учурал болгон? Бис бу учуралдаҥ неге ӱренедис?

¹⁷ Је кезикте Иеговага кӧптӧдӧ иштеерге турган кӱӱнис амадаганыс аайынча болбой јат. Мындый учурал бу јӧрмӧлдиҥ бажында айдылган Клаус ла Мариса эш-нӧкӧрлӧрдӧ болгон. Олордыҥ биле тӧзӧгӧни ӱч јыл боло берерде, олор јаткан туразын артыргызып, Финляндияныҥ Бет-Элин тударга болушкан. Је ондо олор јӱк ле алты ай иштеер деп билип ийген. Озо баштап олор санааркай берген. Је јаан удабай олорды араб тилдиҥ курстарына кычырган. Эмди олор ӧскӧ ороондо араб тилге куучындап турган улуска сӱӱнчилӱ јарлап јадылар. Мариса эје мынайып куучындаган: «Меге ӱренижип калган јӱрӱмимди солып, Иеговага бӱткӱлинче беринерге коркымчылу болгон. Је Иегова биске јаантайын сакыбас јанынаҥ болужатан. Је бу учуралдаҥ мен Иеговага оноҥ тыҥ иженерге ӱренип алгам». Бу эш-нӧкӧрлӧрдиҥ учуралынаҥ Иегова ого бӱткӱлинче иженип турган улусты кыйалта јогынаҥ кайралдаар деп кӧрӱнет.

18. Јаҥы биле тӧзӧгӧн улуска Иеговага јаантайын иженерге не болужар?

¹⁸ Биле — Иегованыҥ сыйы (Матф. 19:5, 6). Иегова бу сый эш-нӧкӧрлӧргӧ сӱӱнчи экелзин деп кӱӱнзеп јат (Укаа 5:18). Слер бу јуукта биле тӧзӧгӧн болзоор, мындый сурактарды сананып кӧргӧн болзоор: «Бис билелик јӱрӱмисти неге бередис? Иеговага оныҥ берип турган сыйлары учун быйанысты канайып кӧргӱзерис?» Иеговага мӱргӱгер, оныҥ Сӧзинеҥ слердиҥ айалгага келишкедий принциптер табып алыгар. Оноҥ Иегованыҥ берген јӧптӧрин тузаланыгар. Бир де алаҥзыбагар, Иеговага иштеерин баштапкы јерге тургузып турзаар, ырысту болорыгар ла кӧп алкыштар алараар.