Иегова мӱргӱӱлдериме каруузын берер бе?

1, 2. Биске нениҥ учун Иегова мӱргӱӱлдериске каруу бербейт деп билдирердеҥ айабас?

«ИЕГОВАГА иштееринде јаан сӱӱнчи алып јӱрзеҥ, ол сениҥ јӱрегиҥниҥ кӱӱнин бӱдӱрип салар» (Сар. 37:4). Кандый јакшы сӧстӧр! Је бу бис нени ле суразаас, тургуза ла аларыс деп кӧргӱзет пе? Мындый сурак нениҥ учун чыгардаҥ айабас? Бир канча учуралдар кӧрӱп ийектер. Кижиге барбаган сыйын Каандыктыҥ јарчыларыныҥ сургалына барарга мӱргӱп јат. Је ӧйлӧр ӧдӱп, оны анай ла сургалга кычырбаган. Карындаш јаан оорунаҥ айрылып, јуунга кӧптӧдӧ болужарга Иеговага мӱргӱп јат. Је су-кадыгы оҥдолбой јат. Ада-энелер балазын чындыкта артып калзын деп мӱргӱп јат. Је балазы Иеговага иштебей барат.

² Слер де Иегованаҥ та нени де сураганаар, је каруузын анайып ла албаган болороор. Мынаҥ улам Иегова ӧскӧ улустыҥ мӱргӱӱлдерин угуп турган, а слердийин укпай турган деп сананып баштайдаар. Ол эмезе слер та кайда да јастырып салганаар деп сананараар. Мындый сезимдер Джа́нисb деп эједе болгон. Ол ӧбӧӧниле кожо Бет-Элде иштеерге кӱӱнзеген ле бу керегинде мӱргӱп туратан. Ол куучындайт: «Јаан удабай ла бисти Бет-Элдӧӧн кычырар деп, мен алаҥзыбагам». Је канча јылдар ӧткӧн, а кычырту анайып ла келбеген. Джанис оноҥ ары айдат: «Мен санааркагам. Не болуп турганын оҥдобойтом. Мен Иегованы ачындырган болорым ба деп санангам. Бет-Элде иштеерге турганымды мӱргӱӱлдеримде чокум айдып туратам. Нениҥ учун Иегова мӱргӱӱлдериме каруузын бербеген?»

3. Бис бу јӧрмӧлдӧ нени шӱӱжерис?

³ Бис кезикте Иегова мӱргӱӱлдеристи укпай турган деп сананардаҥ айабазыс. Мындый санаалар јебрен ӧйдӧ Иегованыҥ чындык ишчилеринде де болгон (Иов 30:20; Сар. 22:2; Авв. 1:2). Је Иегова слердиҥ мӱргӱӱлеерди угуп јат (Сар. 65:2). Бого алаҥзыбаска ӱч сурак кӧрӱп ийектер: 1) Бис Иегованаҥ нени сакыыр аргалу? 2) Иегова бистеҥ нени сакыйт? 3) Канайып мӱргӱп турганысты нениҥ учун кӧрӱп турар керек?

БИС ИЕГОВАНАҤ НЕНИ САКЫЙДЫС?

4. Иеремия 29:12-ле болзо, Иегова не деп сӧзин берет?

⁴ Иегова бистиҥ мӱргӱӱлисти угар деп сӧзин берет. (Иеремия 29:12 кычырыгар.) Ол бойыныҥ чындык ишчилерин сӱӱп јат. Оныҥ учун олордыҥ сураганын јазап угат (Сар. 10:17; 37:28). Је бу бис нени ле суразаас, ол берер деп кӧргӱспей јат. Је кезик сураган немелеристи бис јӱк јаҥы јӱрӱмде алар болорыс.

5. Иегова бистиҥ мӱргӱӱлдеристи угуп тура, нени ајаруга алат? Јартап беригер.

⁵ Иегова бистиҥ сураганыс оныҥ амадузыла кандый колбулу болгонын ајаруга алат (Иса. 55:8, 9). Кудай јерди ого акту кӱӱнинеҥ багынып турган эр ле ӱй улусла толо болзын деп кӱӱнзеген. Је Сатана улус Кудай јогынаҥ ырысту болор деп айдат (Баш. 3:1—5). Дьяволдыҥ айтканы тӧгӱн деп кӧргӱзерге, Иегова олорго бойлорына башкарар арга берген. Анайып, улус башкарганынаҥ улам, бӱгӱнги кӱнде јердиҥ ӱстинде андый кӧп кӱчтер болот (Эккл. 8:9). Иегова бу кӱчтерди эм тургуза ла јоголтпос деп, бис оҥдоп јадыс. Ол анайып эдип ийзе, та кем де улустыҥ башкарганы једимдӱ ле олорго Кудайдыҥ болужы керек јок деп сананар эди.

6. Нениҥ учун Иегова бисти сӱӱп турган ла јаантайын справедливый болуп турган деп бӱдер керек?

⁶ Иегова тӱҥей сурактарга карууны башка-башка эдип берер аргалу. Темдектезе, Езекия јаан ооруп каларда, јазылып каларга Иегованаҥ болуш сураган. Иегова оныҥ сурагын бӱдӱрген (2 Каан. 20:1—6). Је качан Павел эди-канындагы «тегенектеҥ» (бу кандый да оору болгон болор), айрыларга болуш сураарда, Иегова оны јаспаган (2 Кор. 12:7—9). Анайда ок Иаков ло Пётрдыҥ учуралдарын эске алып ийектер. Ирод олордыҥ экӱлезин ле ӧлтӱрерге сананган. Бис билерис, Пётр учун јуун сӱреен тыҥ мӱргӱген деп. Ака-эјелер Иаков то учун тыҥ мӱргӱген болор. Пётрды ангел корулап алган. Је Иаковты ӧлтӱргилеп салгандар (Ап. ижи 12:1—11). Бисте мындый сурак чыгардаҥ айабас: «Нениҥ учун Кудай Пётрды аргадап алган, а Иаковты корулабаган?» Агару Бичик бого каруузын бербей јатc. Је Иегова «кемди де талдабай јат» деп бис билерис (Јаҥ. т. 32:4). Кудай бу эки апостолдыҥ экӱлезин сӱӱген (Ачыл. 21:14). Иегова бистиҥ мӱргӱӱлистиҥ каруузын јаантайын сураганыс аайынча бербей јат. Је ол бисти сӱӱп јат ла јаантайын справедливый болот деп бӱдӱп јадыс. Оныҥ учун сураганыска каруузын башка эдип берген болзо, комудабай јадыс (Иов 33:13).

7. Бис нени этпеске албаданадыс ла нениҥ учун?

⁷ Бис бойыстыҥ айалгабысты ӧскӧ улустыҥ айалгазыла тӱҥдештирбей јадыс. Темдектезе, бис Иегованаҥ та нени де сураганыс, је каруузын анайып ла албаганыс. Кийнинде, та кем де мындый ла неме сураарда, Иегова ого каруузын берген деп билип ийедис. Мындый айалгада Анна деп эје болгон. Оныҥ ӧбӧӧни Мэ́тью, ракла ооруп турарда, ол јазылзын деп, Иеговага мӱргӱп туратан. Бу ла ок ӧйдӧ олордыҥ јуунындагы эки јаан јашту эје мындый ла оорула ооруган. Анна ӧбӧӧни де, ол эки эје де учун мӱргӱген. Оноҥ бу эки эје јазыла берген, Аннаныҥ ӧбӧӧни божоп калган. Мынаҥ улам Аннада мындый сурактар чыгып баштаган: бу эјелерге јазыларга, Иегова болушкан ба? Андый болзо, Иегова оныҥ ӧбӧӧнине не болушпаган? Эје ол учун база мӱргӱген эмес пе? Бу эки эје нениҥ учун јазылып калганыныҥ каруузы бисте јок. Је удабас Иегова ончо кыйын-шыраны јоголтып салар деп, бис јӱс процентке бӱдӱп јадыс. Анайда ок Иегова бойыныҥ најыларын тиргизер ӧйди энчикпей сакып јат (Иов 14:15).

8. а) Исайя 43:2-ле болзо, Иегова биске канайып болужат? б) Ченелтелердиҥ ӧйинде мӱргӱӱл канайып болужар аргалу? («Мӱргӱӱл чӧкӧбӧскӧ болужат» деген видеоны кӧрӱгер.)

⁸ Иегова биске јаантайын болужар. Је бис шыралап турзаас, ого коркышту ачу болот (Иса. 63:9). Је андый да болзо, ол бистиҥ јолыста учурап турган суудый ла оттый ченелтелерди јоголтпой јат. (Исайя 43:2 кычырыгар.) Је ол бисле кожо болор ло ченелтелерди ӧдӧргӧ болужар деп сӧзин берет. Бисти кем де, не де Кудайдаҥ айрып болбос. Анайда ок ченелтелерди ӱзе ӧдӧргӧ, ол биске јаан ийделӱ агару тынын берет (Лука 11:13; Флп. 4:13). Айдарда, биске ченелтелерди ӧдӧргӧ лӧ Кудайга чындык артарга болужатан ончо неме барd.

ИЕГОВА БИСТЕҤ НЕНИ САКЫЙТ?

9. Нениҥ учун Иеговага бӱдер керек ле ол биске болужар деп алаҥзыбас керек? (Иаков 1:6, 7).

⁹ Иегова бисти ого бӱтсин деп сакып јат (Евр. 11:6). Кезикте ченелтелер биске бийик кырлардый деп билдирет. Оноҥ улам «биске Иегова да болужып болбос» деп сананадыс. Је Агару Бичикте айдылганыла болзо, бис Иегованыҥ болужыла ӱзе кӱчтерди ӧдӧ берерис (Сар. 18:29). Оныҥ учун алаҥзыырдыҥ ордына Иеговага мӱргӱп, ол каруузын берер деп, бӱдӱп јӱригер. (Иаков 1:6, 7 кычырыгар.)

10. Мӱргӱӱлдерис аайынча эдери ол не дегени? Тем куучындап беригер.

¹⁰ Иегова бисти мӱргӱӱлдерис аайынча эдерис деп сакып јат. Темдектезе, ака регионныҥ курултайына барарга иштеҥ суранып аларга, Иегованаҥ болуш сурайт. Иегова бойыныҥ ишчизине канайып каруу берер? Ол ого барып суранарга, јалтанбас болорго болужар. Је акага начальникле бойына куучындажар керек. Оны баштапкы ла катап суранган кийнинде божотпостоҥ айабас. Оныҥ учун ого база да канча катап куучындажарга келижер болор. Акага кожо иштеп турган кижиле иштеп турган кӱндерин солыжарга эмезе тӧлӧлбӧй турган отпуск та аларга келижер болор.

11. Нениҥ учун биске мӱргӱӱлдеристе турумкай болор керек?

¹¹ Иегова бисти мӱргӱӱлдеристе турумкай болзын деп сакыйт (1 Фес. 5:17). Иисустыҥ сӧстӧринеҥ бис мӱргӱӱлдеристиҥ ончозына карууны капшай ла албазыс деп кӧрӱнет (Лука 11:9). Оныҥ учун колоорды бош салбагар! Такып-такып мӱргӱгер (Лука 18:1—7). Анайып, Иеговага слердиҥ сурап турганаар слерге чын ла керектӱ деп кӧргӱзедеер. Анайда ок Иегова, слерге болужар деп бӱдӱп турганаарды, кӧрӱп ийер.

КЕЗИКТЕ КАНАЙЫП МӰРГӰП ТУРГАНЫСТЫ НЕНИҤ УЧУН КӦРӰП ТУРАР КЕРЕК?

12. а) Бойыска кандый сурак берерге јараар ла нениҥ учун? б) Иегованы тооп турганы́с мӱргӱӱлдеристеҥ канайып кӧрӱнет? («Мӱргӱӱлдеримнеҥ Иегованы тооп турганым кӧрӱнет пе?» деген рамканы кӧрӱгер.)

¹² Бис мӱргӱӱлдериске каруулар албай турган болзоос, бойыска мындый ӱч сурак берерге јараар. Баштапкызы: «Меге керектӱ немени мен чын этире сурап тургам ба?» Кӧп сабада биске не јакшы болорын билерис деп сананадыс. Је чынынча болзо, биске эҥ ле јакшы не болорын Иегова билер. А кезикте бистиҥ сураганыс Иегованыҥ табынаҥ чек башка болот (1 Иоанн 5:14). Темдектезе, баштапкы абзацта айдылган ада-энени эске алып ийектер. Олор Иегованы балазы чындыкта артып калзын деп сурагылап јат. Бир јанынаҥ кӧрзӧ, мынайып сураганында јастыра неме јок ошкош. Је Иегова кемди де ого иштезин деп албадабай јат. Ол бистиҥ ончобысты, ол тоодо балдарды, ого бажырарын бойы талдазын деп кӱӱнзейт (Јаҥ. т. 10:12, 13; 30:19, 20). Оныҥ учун ада-энелерге Иегованаҥ балазыныҥ јӱрегин томултарга болушсын деп сураар керек. Анайып, олор бойыныҥ кызына эмезе уулына Иегованы сӱӱрге ле оныҥ најызы болуп каларга болужып берер (Укаа 22:6; Эф. 6:4).

13. Еврейлерге 4:16-ла болзо, Иегова биске кандый ӧйдӧ болужат? Јартап беригер.

¹³ Экинчи сурак мындый: «Иеговага мениҥ сурагымды бӱдӱрерге эмди эптӱ ӧй бӧ?» Бис сураганысты капшай ла бӱдӱрзин деп кӱӱнзеп турган болорыс. Је ол бистиҥ сураганысты бӱдӱретен ӧй качан болорын бистеҥ јакшы билер. (Еврейлерге 4:16 кычырыгар.) Бис сурагыстыҥ каруузын капшай ла албазаас, Иегова биске «јок» деп айткан деп сананарыс. Је Иегова «эмди эмес» деп айдып турган болор. Темдектезе, оору јоболынаҥ јазыларга турган карындашты сананып ийектер. Иегова оныҥ оорузын кайкал ажыра јазып ийген болзо, Сатана Иегованы јамандаарга шылтак табып ийер эди. Сатана карындашты Иеговага оны јазып ийгени учун иштеп турган деп айдар эди (Иов 1:9—11; 2:4). Је Иегова ончо ооруларды јоголтотон ӧйди тургузып салган (Иса. 33:24; Ачыл. 21:3, 4). Ол ӧй келгенче биске кайкал ажыра јазылып каларыс деп сакыбас керек. Оныҥ учун карындаш колын бош салбай, оору-јоболыла тартыжып, оноҥ ары иштеерге, Иегованаҥ ийде-кӱч ле јӱрегине амыр сураар аргалу (Сар. 29:11).

14. Джанис эјениҥ теминеҥ слер неге ӱренедигер?

¹⁴ Бет-Элде иштеерге мӱргӱп турган Джанис эјениҥ учуралы санаагарга кирет пе? Иегова оныҥ мӱргӱӱлине кандый каруу бергенин ол јӱк беш јылдаҥ оҥдоп ийген. Эје куучындайт: «Иегова мени бу јылдардыҥ туркунына ӱредип, тӱзеткен эмтир. Меге Иеговага кӧптӧдӧ иженер керек болгон. Анайда ок Агару Бичикти ӱренерин тыҥыдар керек ле мениҥ сӱӱнчим айландырагы айалгалардаҥ камаанду болбозын деп ӱренип алар керек болгон». Кийнинде, Джанис эјени ӧбӧӧниле кожо аймак кӧрӧӧчиниҥ ижине кӧстӧгӧн. Эје ӧткӧн јылдарды сананып, мынайда айдат: «Иегова мениҥ мӱргӱӱлдеримге каруузын берген эмтир, каруузы мениҥ сураганымнаҥ башка да болзо. Иегова Кудайымныҥ берген каруузыныҥ јакшызын ла тузазын кӧрӧргӧ, меге ӧй керек болгон. Је эмди оныҥ јалакайы ла сӱӱжи учун мен јаан быйанду болодым».

15. Биске нениҥ учун кезикте Иегованаҥ чике нени де сурабас керек? (Јурукты база кӧрӱгер.)

¹⁵ Ӱчинчи сурак мындый болор аргалу: «Меге ӧскӧ неме керегинде мӱргӱӱр керек пе?» Мӱргӱӱлис чике болзо, јакшы. Је кезикте Иегованаҥ чике нени де сурабай, сениҥ ле кӱӱниҥле болгой деп мӱргӱзеес, јакшы болор. Анайып, Иегова биске нени кӱӱнзеп турганын кӧрӧргӧ јеҥил болор. Каандыктыҥ јарчыларыныҥ сургалына ӱренерге кӱӱнзеп турган сыйын керегинде куучындажып ийектер. Ол сургал керегинде мӱргӱӱр аргалу, је бу ла ок ӧйдӧ бойыныҥ ийде-кӱчин кайдӧӧн ууландырарын Иегова кӧргӱзип берзин деп, сураар аргалу (Ап. ижи 16:9, 10). Оноҥ сыйынга бойыныҥ мӱргӱӱли аайынча эдер керек. Темдектезе, ол аймак кӧрӧӧчинеҥ јуугындагы кандый јуунда текши пионерлер јетпей турганын сураар аргалу. Ол эмезе Бет-Элге самара бичип, кандый јерлерде јарчылар јетпей турганын сураар аргалуe.

16. Бу јӧрмӧлдӧҥ нени билип алдыс?

¹⁶ Бу јӧрмӧлдӧҥ кӧргӧнисле, Иегова бистиҥ мӱргӱӱлдериске каруу берип тура, јаантайын сӱӱшле, справедливостьло башкарынат (Сар. 4:3; Иса. 30:18). Је кезикте Иегова сураганыска каруузын башка этире берет. Андый да болзо, ол бистиҥ кажы ла мӱргӱӱлисти лаптап угуп јат. Иегова бисти сӱреен тыҥ сӱӱп јат. Ол бисти качан да артыргыспас (Сар. 9:10). Оныҥ учун «јаантайын ого иженигер» ле јӱрегерде не барын ончозын куучындап туругар (Сар. 62:8).