Ака-эјелерле најылажарга кандый јакшы!

1, 2. Иегова улуска канайып баштанат ла бистеҥ нени сакыйт?

БИС улусла канайып куучындажып турганыс Иеговага јаан учурлу болот. Иисус та јуугысты бойысты чылап сӱӱп јӱрзин деп ӱреткен (Матф. 22:37—39). Оныҥ учун бис Иегова Кудайга иштеп те турган, иштебей де турган ончо улуска јакшы баштанып јадыс. Анайып, «Кудай кӱнди јакшы да, јаман да улуска берген; јаҥмырды јаман да, јакшы да улуска ийет» деген сӧстӧрлӧ јӧпсинип, бис теҥеридеги Адабыстаҥ тем аладыс (Матф. 5:45).

² Иегова ончо улусты сӱӱп јат, је анчада ла ого сӧсуккур болгон улусты баалап јат (Иоанн 14:21). Оныҥ учун оныҥ ишчилери бистиҥ јӱрегисте аҥылу јерде болзын деп кӱӱнзейт. Айдарда, ол бистерди «бой-бойыгарды тыҥ сӱӱп јӱригер» ле «бой-бойыгарга эрке карузыгар» деп кӱӱнзедип јат (1 Пётр 4:8; Рим. 12:10). Андый сезимдер анчада ла бистиҥ јуук улузыска ла најыларыска болот.

3. Бу абзацтаҥ сӱӱш керегинде нени билип алдыс?

³ Сӱӱшти дезе тураныҥ ичинде ӧзӱп турган чечектерле тӱҥейлештирерге јараар. Ол чечектерди јаантайын кичеер керек. Апостол Павел христиандарга: «Бой-бойыгарды карындаштарды чылап сӱӱгер» — деп бичиген (Евр. 13:1). Оныҥ учун Иегова бисти ака-карындаштарга јӱрегисте сӱӱжисти тыҥытсын деп кӱӱнзейт. Бу јӧрмӧлдӧ ака-эјелерле најылашканы нениҥ учун јакшы ла бу најылыкты тыҥыдарга не болужар деп шӱӱжип ийерис.

БИСКЕ АКА-ЭЈЕЛЕРЛЕ НЕНИҤ УЧУН НАЈЫЛАЖАР КЕРЕК

4. Бистиҥ бирлигисти баалап турарга не болужар? (Сарын 133:1). (Јурукты база кӧрӱгер.)

⁴ Сарын 133:1 кычырыгар. Сарнаачы Иеговага иштеп турган улусла кожо најылажары сӱреен «јакшы» ла «эптӱ» деп бичиген. Бу сӧстӧрлӧ бис јӧпсинип јадыс. Мындый тем керегинде сананып ийектер: слер кажы ла кӱн јаан, јараш агаштыҥ јаныла ӧдӱп јадыгар, је оны качан да ајыктап, соныркап кӧрбӧгӧнӧӧр. Анайып ла бис Кудайдыҥ албатызындагы сӱреен кайкамчылу бирликти ајарбай калардаҥ айабазыс. Нениҥ учун дезе бис ака-эјелерди јаантайын кӧрӧдис, керек дезе неделеде канча катап кӧрӱп јадыс. Мынаҥ улам, андый ла болор учурлу деп сананала, олорды керекке албай барардаҥ айабазыс. Мындый неме болбозын деп, нени эдер керек? Бистиҥ сӱӱжис ака-эјелериске сообозын деп, олордыҥ кажызы ла јуунга ла биске сӱреен керектӱ деп, јаантайын шӱӱп сананып турар керек.

5. Улус бистиҥ сӱӱжисти кӧрӱп, нени оҥдоп ийет?

⁵ Улус бистиҥ туштажуларга баштапкы ла катап келзе, ортобыстагы сӱӱжисти кӧрӱп кайкайт. Кезик улус мыны ла кӧрӧлӧ, бу чындык деп аайлап ийет. Иисус: «Ортогордо сӱӱш болзо, слерди мениҥ ӱренчиктерим деп, ончолоры танып ийер» — деп айткан (Иоанн 13:35). Студент болуп турган Ча́йтра деп кыстыҥ учуралын кӧрӱп ийектер. Ол Иегованыҥ Керечилериле Агару Бичик ӱренип баштайла, регионныҥ курултайына барып јӱрген. Ол айдат: «Куралтайдыҥ баштапкы ла кӱнинде ака-эјелер мени 52 катап кучактагылаган! Мен мыны тыҥ кайкагам, не дезе адам ла энем мени јӱрӱмимде бир де кучактабаган. Ол тушта, Иегова мени тыҥ сӱӱп турган деп кӧрӱп ийеле, оныҥ албатызына кожуларга кӱӱнзей бергем». Чайтра оноҥ ары Агару Бичикти ӱренип, 2024 јылда сууга чӧҥӱрилген. Айдарда, улус бистиҥ јакшы керектеристи ле сӱӱжисти кӧрӱп, Иегованыҥ ишчизи болорго кӱӱнзей берет (Матф. 5:16).

6. Ака-эјелерле најылашканы бисти недеҥ корулайт?

⁶ Ака-эјелерле најылашканы биске јакшы кору болот. Апостол Павел христиандарды: «Кажы ла кӱн бой-бойыгардыҥ кӱӱнигерди кӧдӱригер. Калак, кинчекке тӧгӱндедип, кемигер де катуланбазын» — деп кӱӱнзеткен (Евр. 3:13). Кезикте бис чӧкӧп эмезе кунугып турала, чындыктыҥ јолынаҥ тууралай берердеҥ айабазыс. Је Иегова биске кандый бир ака эмезе эје ажыра болужып ийер аргалу (Сар. 73:2, 17, 23). Оныҥ учун бисте андый најылар бары кандый јакшы!

7. Сӱӱш бирлик болорго канайып болужат? (Колоссыдагыларга 3:13, 14).

⁷ Бастыра јердиҥ ӱстинде јадып турган ака-эјелер бой-бойына сӱӱжин кӧргӱзерге албаданат (1 Иоанн 4:11). Темдектезе, сӱӱш биске бой-бойыстыҥ јаманысты ла једикпестеристи ӧткӱрижерге болужат. Оныҥ учун бис бирлик јӱредис (Колоссыдагыларга 3:13, 14 кычырыгар; Эф. 4:2—6). Јердиҥ ӱстинде мындый јакшы кӧгӱс биле јӱк ле бистиҥ јуундарда бар.

АКА-ЭЈЕЛЕРДИ ТООП ТУРУГАР

8. Иегова биске бирлик болуп артарга канайып болужат?

⁸ Бистиҥ телекейлик бирлигис сӱреен кайкамчылу неме. Андый бирлик јӱк ле Иегованыҥ болужыла болот. Ол бисти, толо кеминде эмес улусты, бир биле эдип бириктирип салган (1 Кор. 12:25). Агару Бичикте айдылганыла, Кудай бисти бой-бойысты сӱӱп јӱрзин деп ӱредет (1 Фес. 4:9). Иегова мыны канайып эдет? Оныҥ Сӧзинде ака-эјелерле најылажарга болужатан јӧптӧр бар. Бис оны шиҥдеп, тузаланып турзаас, Кудайга бисти ӱредетен арга бередис (Евр. 4:12; Иак. 1:25). Анайып бастыра јердиҥ ӱстиндеги Иегованыҥ Керечилери эдет.

9. Римдегилерге 12:9—13-ле болзо, бис улуска тоомјыбысты канайып кӧргӱзерис?

⁹ Кудайдыҥ Сӧзи ака-эјелерге јакшы најы болорго канайып болужат? Бу керегинде Павелдиҥ Римдегилерге бичиген самаразынаҥ кӧрӱп ийектер. Анда ол «улуска тоомјыгарды озо бойоор кӧргӱзигер» деп айткан. (Римдегилерге 12:9—13 кычырыгар.) Бу сӧстӧр нени темдектейт? Бу дезе ака-эјелерге болужатан арга бедиреп турары дегени. Темдектезе, бистиҥ ака-эјелерге карузып, јаманын таштаарга белен болуп, не барысла ӱлежерге, кӱндӱлеп турарга кӱӱнзедип јат (Эф. 4:32). Мындый немелерди ака-эјелеристеҥ сакып отурбай, озо бойыс баштаар учурлу. Ол тушта Иисустыҥ «алып турганы эмес, берип турганы оноҥ артык ырысту» деген сӧстӧрин оҥдоп ийерис (Ап. ижи 20:35).

10. Бис ака-эјелерге тоомјыбысты кӧргӱзерге, нени эдер аргалу? (Јурукты база кӧрӱгер.)

¹⁰ Ајарып ийектер, Павел «улуска тоомјыгарды озо бойоор кӧргӱзигер» деп сӧстӧрдиҥ кийнинеҥ ле «иштеҥкей болугар, јалкуурбагар» деп айткан. Иштеҥкей кижи ижин акту јӱрегинеҥ јазап эдет. Берилген јакылтаны чала-была этпей јат. Укаа сӧстӧр 3:27, 28-те: «Болуш керексип турган улуска, аргаҥ бар болзо, болужып тур» — деп айдылат. Оныҥ учун кандый бир акага эмезе эјеге болуш керек болзо, ого кем-кем болужып ийер деп иженип калган отурбай, капшай ла бойыс барып болужадыс (1 Иоанн 3:17, 18).

11. Биске ака-эјелерисле најылажарга не болужар?

¹¹ Ака-эјелерге тоомјыбысты кӧргӱзетен база бир арга — бисти ачындырган ака-эјелердиҥ јаманын таштаары. Эфестегилерге 4:26-да мынайда айдылган: «Кӱн ашкалакта, чугулыгар ӧчӱп калгай». Бу јӧпти канайып тузаланаар? 27-чи ӱлгерде айдылганыла болзо, анайып бис Дьяволго кирижетен арга бербей јадыс. Иегова бойыныҥ Сӧзи ажыра бисти бой-бойыбыстыҥ јаманысты јаантайын таштап турзын деп ӱредип јат. Колоссыдагыларга 3:13-те «бой-бойыгардыҥ јаманыгарды таштагар» деп айдылат. Ака-эјелерисле бирлик болорго, биске олордыҥ јастыраларын кӧрбӧӧчи болор керек. Олордыҥ јаманын таштап турзаас, эптӱ-јӧптӱ ле бирлик јӱрерис (Эф. 4:3).

12. Иегова биске бой-бойыстыҥ јаманысты таштаарга канайып болужат?

¹² Бисти ачындырган кижиниҥ јаманын таштаарга јеҥил эмес эмей. Мында агару тынныҥ болужы керек. «Бой-бойыгарга карузыгар» ла «иштеҥкей болугар» деп сӧстӧрдиҥ кийнинеҥ Агару Бичикте: «Агару тын слерди эрчимдӱ иштенерге кӱӱнзетсин» — деп бичилген. Айдарда, агару тын биске Кудайдыҥ айтканын бӱдӱрерге болужатан кӱӱн берер аргалу. Оныҥ учун Иеговага мӱргӱп, агару тын сурап турактар (Лука 11:13).

«ОРТОГОРДО БӦЛИНИШ БОЛБОЗЫН»

13. Бистиҥ ортобыста недеҥ улам бӧлӱништер болордоҥ айабас?

¹³ Бистиҥ јуундарда башка-башка улус бар (1 Тим. 2:3, 4). Ајарыҥкай болбозоос, бойыстыҥ кӧрӱмисти тыш-бӱдӱмис јанынаҥ, кийген кийимис јанынаҥ, амырайтаны јанынаҥ, анайда ок су-кадыкты канайып кичеейтени јанынаҥ улуска албадай берердеҥ айабазыс (Рим. 14:4; 1 Кор. 1:10). Оныҥ учун јӱк ле бистиҥ кӧрӱмис чын деп сананбас керек. Анайып Иегова бисти бой-бойыбысты сӱӱп турзын деп ӱредип турганын кӧргӱзип јадыс (Флп. 2:3).

14. Биске нени јаантайын эдер керек, нениҥ учун?

¹⁴ Анайда ок бистиҥ јуундарыста бӧлӱништер боло бербезин деп, бис бой-бойыстыҥ кӱӱнисти јаантайын кӧдӱрип, бӱдӱмјибисти тыҥыдар аргалу (1 Фес. 5:11). Калганчы ӧйлӧрдӧ јууннаҥ туураладылган кӧп улус кайра јанып турганына бис тыҥ сӱӱнип јадыс! (2 Кор. 2:8). Темдектезе, 10 јылдыҥ туркунына јуундарга јӱрбей барган бир эје куучындаган: «Ака-эјелер мени колымнаҥ тудуп, коркышту јылу уткыгылаган» (Ап. ижи 3:19). Бу эједе кандый сезимдер болгон? Ол куучындайт: «Иегова мени јединеле, ырысту болотон јерге кайра экелип салган деп билдирген». Айдарда, бис улустыҥ кӱӱнин кӧдӱрип турзаас, Иисус бис ажыра «уур иш эдип турган ла уур јӱк апарып турган» улусты токунадып салар аргалу (Матф. 11:28, 29).

15. Бис ака-эјелерисле бирлик болорго, база нени эдер аргалу? (Јурукты база кӧрӱгер.)

¹⁵ Бис ака-эјелерисле бирлик болорго база нени эдер аргалу? Нени айдарга турганысты сананып турар керек. Иов 12:11-де: «Канайып тил курсактыҥ амтамын оҥдоп јат, анайып ла кулак сӧстӧрдиҥ учурын оҥдоп јат» — деп, чын айдылган. Јакшы казанчы кижи курсакты улуска берердеҥ озо, бойы амзап јат. Анайып ла улуска нени-нени айдардаҥ озо, сананып ийер керек (Сар. 141:3). Не дезе бистиҥ айткан сӧстӧрис јаантайын ака-эјелердиҥ кӱӱнин кӧдӱрзин деп ле олорго тузалу болзын деп кӱӱнзеп јадыс (Эф. 4:29).

16. Кандый сӧстӧр айдып турганын, анчада ла кемдер сананып турар учурлу?

¹⁶ Анчада ла билениҥ бажы ла ада-энелер айткан сӧстӧри јымжак болзын деп албаданып турар учурлу (Кол. 3:19, 21; Титке 2:4). Аксагалдарга да анайып эдер керек. Нениҥ учун дезе олорго Иегованыҥ койлорыныҥ кӱӱнин кӧдӱретен ле олорды токунадатан јакылта берилген (Иса. 32:1, 2; Гал. 6:1). Агару Бичикте: «Ӧйинде айдылган сӧс кандый јакшы!» — деп, тегин јерге айдылбаган (Укаа 15:23).

«СӦСЛӦ, ТИЛЛЕ ЭМЕС, ЈЕ КЕРЕКЛЕ, ЧЫНЛА СӰӰЙЛИ»

17. Ака-эјелерди акту јӱректеҥ сӱӱрге биске не болужар?

¹⁷ Апостол Иоанн «бистиҥ сӱӱжис сӧстӧристеҥ эмес, карын керектеристеҥ кӧрӱнип турар учурлу» деп айткан (1 Иоанн 3:18). Бис ака-эјелерди акту јӱректеҥ сӱӱрге кӱӱнзейдис. Мынайып сӱӱрге канайып ӱренип аларыс? Ака-эјелерле кожо канча ла кире кӧп болзоос, ончо ло кире јуук болуп каларыс. Мынаҥ улам сӱӱжис тыҥып калар. Оныҥ учун ака-эјелерле јуунда куучындажып туругар, кожо јарлап туругар, анайда ок олорды айылыгарга кычырып туругар, бойоор до олор дӧӧн айылдап туругар. Анайып Иегова бисти бой-бойысты сӱӱп турарына ӱредип салганы кӧрӱнер (1 Фес. 4:9). Ол тушта бис јаантайын «ака-эјелерле бирлик јӱргени кандый јакшы, кандый эптӱ» деп сезип турарыс (Сар. 133:1).