Нени-нени билбей турзаар, јобош болугар

1. Иегова бисти кандый аргалу эдип јайаган? Нениҥ учун?

ИЕГОВА бисти шӱӱп сананар аргалу эдип, та нени де јаҥы билип алар ла билип алганысты тузаланар аргалу эдип јайаган. Нениҥ учун ол бисти мынайып јайаган? Иегова бисти ол керегинде билгирлерди таап алала, сананар аргабысты тузаланып, ого иштезин деп кӱӱнзейт (Укаа 2:1—5; Рим. 12:1).

2. а) Биске нени оҥдоп турар керек? (Иов 37:23, 24). (Јурукты база кӧрӱгер.) б) Бис кӧп неме билбезис деп оҥдоп турганыс кандый туза экелет?

² Иегова бисти ӱренетен аргалу эдип јайаган да болзо, је бис кӧп немени билбезис. (Иов 37:23, 24 кычырыгар.) Иов керегинде сананып ийектер. Иегова ого бир канча сурактар берерде, ол кӧп немени билбес деп оҥдоп ийген. Мынайып Кудайла куучындашканы ого јобожыдынарга ла кӧрӱм-санаазын солыырга болушкан (Иов 42:3—6). Бис база јобош болуп, ӱзе ле немени билер аргабыс јок деп оҥдоп турзаас, бу биске бойыска туза экелер. Мындый кӱӱн-санаа Иеговага иженерге болужар. Иегова биске чын ла билер керек немени ӱзе ачып берер деп бис бӱдедис (Укаа 2:6).

3. Бу јӧрмӧлдӧ бис нени шӱӱжерис?

³ Бу јӧрмӧлдӧ бис нени билбезисти, мынаҥ улам кандый кӱчтер болордоҥ айабас деп шӱӱжип ийерис. Анайда ок нениҥ учун та нени де билбей јӱрери карын јакшы деп кӧрӱп ийерис. Мынайып шӱӱшкенис Иегова, «ончоны билер Кудай», керектӱ немени биске ачып берер деп алаҥзыбаска болужар (Иов 37:16).

УЧЫ КАЧАН КЕЛЕРИН БИЛБЕЗИС

4. Марк 13:32-ле болзо, бис нени билбезис?

⁴ Марк 13:32 кычырыгар. Бис бу телекейдиҥ учы качан келерин билбезис. Иисус та јерде јӱреле, оныҥ «кӱнин де, саадын да» билбегенa. Кийнинде Иисус апостолдорына не болорыныҥ «ӧйин ле кӱндерин» јӱк Иегова бойы тургузар јаҥду деп айткан (Ап. ижи 1:6, 7, сноска). Айдарда, Иегова Сатананыҥ телекейиниҥ јоголор ӧйин тургузып салган. Је ол ӧй качан келерин бистиҥ билер аргабыс јок.

5. Телекейдиҥ учы качан келерин билбей турганыстаҥ улам не болордоҥ айабас?

⁵ База канча кире сакыыр керек деп бис билбезис. Мынаҥ улам бис кунуга берердеҥ айабазыс, анчада ла качан Иегованыҥ кӱнин канча јылдарга сакып турган болзоос. А та кемге де тӧрӧӧндӧриниҥ ле ӧскӧ улустыҥ шоодып, каткырганын ӧдӧргӧ кӱч болуп јат (2 Пётр 3:3, 4). Оныҥ учун бис мынайып сананар болорыс: «Ӧйин ле кӱнин билген болзом, меге кӱчтерди ӧдӧргӧ канча киреге јеҥил болор эди».

6. Телекейдиҥ учы качан келер деп билбей турганыс нениҥ учун јакшы болот?

⁶ Иегова биске бу телекейдиҥ учы качан келериниҥ ӧйин ачпаганы карын да јакшы. Анайып бис Иеговага иженип, оны чыннаҥ ла сӱӱп турганысты кӧргӱзер аргалу болодыс. Бис Иеговага јӱк ле бу телекейдиҥ учына јетире иштеерге турган эмезис не. Карын бис ого јажын-чакка иштеерге кӱӱнзейдис. Оныҥ учун «Иегованыҥ кӱни» качан келер деп, ӧйинеҥ ӧткӱре кӧп сананбай, оныҥ ордына ол ӧй кандый алкыштар экелер деп сананып јӱректер. Бу биске Кудайла најылыгысты тыҥыдып, оны сӱӱндирерге бастыра кӱчистеҥ албаданарга болужар (2 Пётр 3:11, 12).

7. Бис нени билерис?

⁷ Нени билер болгонысты сананып турактар. Агару Бичиктеги судурларла болзо, 1914 јылдаҥ ала калганчы кӱндер башталган. Агару Бичикте бу ӧйдӧҥ ала телекейде айалга кандый болор деп, оок-теек јандарынаҥ бери ӱзе судурлалып калган. Оныҥ учун бис «Иегованыҥ улу кӱни... јууктап» келген деп алаҥзыбайдыс (Соф. 1:14). Анайда ок Иегова бойыныҥ албатызына јаан иш бӱдӱрзин деп јакыган. Биске «Кудайдыҥ Башкарузы керегинде сӱӱнчилӱ јарды» канча ла кире кӧп улуска куучындаар керек (Матф. 24:14). Бу јар 240 кире ороондордо ло јерлерде 1000-наҥ кӧп тилдерге јарлалып јат. Бу јаан учурлу ишке туружарга, «кӱнди ле саатты» билери андый ла тыҥ керектӱ эмес.

ИЕГОВА КАНАЙЫП БОЛУЖАРЫН БИЛБЕЗИС

8. Экклезиаст 11:5-те «чындык Кудайдыҥ керектери» дегени нени темдектейт?

⁸ Бис «чындык Кудайдыҥ керектерин» кезикте билбей јадыс. (Экклезиаст 11:5 кычырыгар.) Кандый керектерин? Иегова амадузына јединерге, бойы та нени де эдип јат эмезе та не де болорго јатса, ол мыны токтотпой јат. Нениҥ учун токтотпой турганыныҥ шылтагын бис јетире билбезис. Анайда ок ол биске канайып болужар деп база билбезис (Сар. 37:5). Темдектезе, бис энезиниҥ ичинде баланыҥ канайып ӧскӧнин оҥдобой јадыс, мыны учёныйлар да јетире аайлап болбой јат. Анайып ла бис Кудайдыҥ керектерин јетире оҥдоп болбозыс.

9. Иегова канайып болужар деп билбей турганыс неге экелер болор?

⁹ Иегова биске канайып болужар деп билбей турганыстаҥ улам бис кандый бир алтам эдерге коркыыр болорыс. Темдектезе, биске јӱрӱмисти јеҥилтип, јарчылар керектӱ јерлерге кӧчӧргӧ кӱч болот. Анайда ок Иегова биске канайып болужар деп билбей турганыстаҥ улам ол бисти јаратпай турган деп санааркаар болорыс. Андый санааркаштар анчада ла тургускан амадуларыска јединип болбой турзаас болуп јат. Эмезе бис кӧп јарлап јадыс, је бистеҥ туза бар деп кӧрӱнбей јат. Ол эмезе организацияда бистиҥ туружып турган проекттиҥ ижи јылбай, туруп калза.

10. Иегова канайып болужар деп билбей турганыс кандый кылык-јаҥга ӱредет?

¹⁰ Иегова биске канайып болужарын билбей турганыстаҥ улам, бис јобош болорына ӱренедис. Кудайдыҥ санааларын ла јолдорын бистиҥ билер аргабыс јок деп јакшы оҥдоп јадыс (Иса. 55:8, 9). Анайда ок бис Иеговага оноҥ тыҥ иженерге ӱренедис, не дезе ол биске кандый ла керекте једимдӱ болорго болужат. А јарлаар иште эрчимдӱ туружып, берилген јакылталарды јакшы бӱдӱрзеес, бис теҥеридеги Адабысты мактайдыс (Сар. 127:1; 1 Кор. 3:7). Је керектерис сакыганыс аайынча болбой турза, ӱзе неме тӱҥей ле Иегованыҥ колында деп ундыбас керек (Иса. 26:12). Бис бойыстыҥ јаныстаҥ албаданып турзаас, Иегова бойыныҥ јанынаҥ биске болужар деп алаҥзыбаска јараар. Бу ла ок ӧйдӧ Иегова биске алдындагы ӧйдӧ ишчилерине чилеп кайкал эдип болужар деп сакыбай јадыс. Је чын алтам эдерге ол тӱҥей ле болужып берер (Ап. ижи 16:6—10).

11. Бис Иегова керегинде нени билерис?

¹¹ Бис Иегова керегинде нени билерис? Иегова бисти сӱӱп турган, справедливый ла ойгор Кудай. Кудай бистиҥ ого ло ака-эјелерге болуп, эткен кажы ла керегисти тыҥ баалап јат. Анайда ок ого чындык арткан улусты ол кайрал јок артыргыспай јат (Евр. 11:6).

ЭРТЕН НЕ БОЛОРЫН БИЛБЕЗИС

12. Иаков 4:13, 14-лӧ болзо, бис нени билбезис?

¹² Иаков 4:13, 14 кычырыгар. Эртен бисле не болорын билбей јадыс. Бу телекейде бистиҥ ончобыс «ӧйдӧҥ лӧ сакыбаган јанынаҥ болгон айалганаҥ камаанду» (Эккл. 9:11). Оныҥ учун тургускан амадуларыска јединерис пе, баштаган керегисти учына јетире эдерге эзен јӱрерис пе деп билбезис.

13. Бисле не болорын билбей турзаас, кандый сезимдер болордоҥ айабас?

¹³ Бисле не болорын билбей турганыс кӱчтерге экелердеҥ айабас. Нениҥ учун? Не болорына санааркап турганыстаҥ улам сӱӱнчибис астап јат. Кандый бир тӱбектеҥ улам амырыс јылыйат. А тургускан амадубыска јединип болбой турзаас, чӧкӧп, кунугып баштаардаҥ айабазыс (Укаа 13:12).

14. Недеҥ улам ырысту болодыс? (Јуруктарды база кӧрӱгер.)

¹⁴ Кӱчтерде турумкай артып, бис теҥеридеги Адабыска та нени де аларга болуп эмес, је ого сӱӱштеҥ улам иштеп турганысты кӧргӱзедис. Агару Бичикле болзо, Кудай бисти ончо кӱчтердеҥ корулабай јат. Анайда ок кажы ла кижиге салым салбай јат. Иегова бистиҥ ырызыс бис нени билеристеҥ эмезе нени билбезистеҥ камаанду болбой јат деп билер. Је Иегованаҥ јӧп сурап, сӧсуккур болзоос, ырысту болодыс (Иер. 10:23). Јӧп чыгарар тушта болуш сураганысла: «Иегованыҥ табыла эзен јӱрӱп, оны ба, мыны ба эдерис» — деп айткандый болодыс (Иак. 4:15).

15. Келер ӧй керегинде нени билерис?

¹⁵ Эртенги кӱнде не болотонын билбес те болзоос, је удабас Иегова биске ӱргӱлји јӱрӱм сыйлаар деп билерис. Та кем де теҥериде јадар, а та кем де јерде. Бис Кудай тӧгӱндебей јат деп, анайда ок ого бойыныҥ табын бӱдӱрерге, кем де буудактап болбос деп билерис (Тит. 1:2). Јӱк ле Кудай «учында не болорын бажынаҥ ла ала... бӱткелек сӧстӧрди јебрен ӧйлӧрдӧҥ бери» айдып јат. Алдындагы ӧйдӧ бӱдетен судурлар бӱдӱп калган болордо, келер ӧйдӧ бӱдетен судурлар удабас база бӱдӱп калар (Иса. 46:10). Иегованыҥ биске сӱӱжи качан да сооп калбас деп билерис (Рим. 8:35—39). Ол биске кандый ла уур-кӱчтерди ӧдӧргӧ, ойгор болорго болужар, токунадар, анайда ок ийде-кӱчин берер. Иегова биске јаантайын болужып, алкыжын јетирер деп бис алаҥзыбай јадыс (Иер. 17:7, 8).

ИЕГОВА БИСТИ КАНДЫЙ ЈАКШЫ БИЛЕРИН ЈЕТИРЕ БИЛБЕЗИС

16. Иегова кажы ла кижи керегинде нени билер? Мынаҥ улам слерде кандый сезимдер болот? (Сарын 139:1—6).

¹⁶ Сарын 139:1—6 кычырыгар. Јайаачыбыс бис керегинде ӱзе билер. Ол бажынаҥ ла ала бистиҥ физический јанысты, эмоциональный јанысты ла санааларысты кӧргӧн. Иегова бисти эмди де кӧрӱп јат. Ол бистиҥ сӧстӧристи ле нениҥ учун анайып айдып турганысты, анайда ок бистиҥ керектеристи ле нениҥ учун анайып эдип турганысты ӱзе билер. Давид каанныҥ бичигениле, Иегова бисти кичееп јат, ајару эдет, болужарга јаантайын јаныста болот. Сананып ийзеер де, Эҥ Бийик Кайракан, Кӱчтӱдеҥ Кӱчтӱ Кудай, јердиҥ ле теҥериниҥ Јайаачызы слерле јилбиркеп турган. Мыны сананып ийзеер, слерде кандый сезимдер болот? Слер Давидтиҥ сӧстӧриле јӧпсинер болороор: «Мени андый јакшы билгениҥе кайкап јадым. Мыны јетире аайлап болбойдым» (Сар. 139:6).

17. Иегова бисти јакшы оҥдоп, сӱӱп турган деп бӱдерге нениҥ учун кӱч болот?

¹⁷ Биске кандый культурада, кандый биледе, кандый кудай јаҥда болгоныстаҥ улам Иегова бисле јилбиркеп, бисти сӱӱп турган Ада деп бӱдерге кӱч болот. Ол эмезе бис алдындагы эткен јастыраларысты эске алып, мынайда сананадыс: «Мен андый јаман кинчектер эткем, Иегова мениҥ најым болорго кӱӱнзебес те болор». Андый санаалар кезикте Давидте де болгон (Сар. 38:18, 21). А та кемге де Кудайды сӱӱндирерге, бойыныҥ јӱрӱмин солыырга коркышту кӱч болот. Андый кижи мынайда сананат: «Бӱдӱп калган бӱдӱмим андый да, Кудай чын ла мени оҥдоп турган болзо, ол мени не солынзын деп, айдат?»

18. Иегова бисти бойыстаҥ јакшы билер деп нениҥ учун алаҥзыбас керек? (Јуруктарды база кӧрӱгер.)

¹⁸ Иегова бисти бойыстаҥ јакшы билер. Бис кезикте бойыстаҥ јакшы немени кӧрбӧй јадыс, а Иегова кӧрӱп јат. Ол бистиҥ јастыраларысты да кӧрӱп, тӱҥей ле сӱӱп јат. Нениҥ учун бисте андый сезимдер болот, недеҥ улам бис анайып эдип турганыс деп ол оҥдоп јат (Рим. 7:15). Бис кандый болуп калар аргалу деп Иегова билер. Мыны ундыбай турзаас, Иеговага иштеерге ийде-кӱч те болор, сӱӱнчисти де јылыйтпазыс.

19. Иегова керегинде бис нени билерис?

¹⁹ Иегова — ол сӱӱш деп бис билерис. Мында алаҥзу да јок (1 Иоанн 4:8). Ол бисти сӱӱп, бисти јакшы јӱрзин деп, та нени де этсин эмезе та нени де этпезин деп сурап јат. Бис билерис: Иегова бисти јажын-чакка јӱрзин деп јат, оныҥ учун ол бис учун Уулын берген. Иисустыҥ бис учун јӱрӱмин бергенинеҥ улам бис кинчектӱ де болзоос, Иегованы сӱӱндирер аргалу болодыс (Рим. 7:24, 25). Анайда ок бис билерис: «Кудай бистиҥ јӱрегистеҥ јаан ла ончоны билер» (1 Иоанн 3:19, 20). Иегова бистиҥ санааларысты ла сезимдеристи јакшы оҥдоп, бис оныҥ табын бӱдӱрип ийер аргалу деп алаҥзыбай јат

20. Та нени де билбес болгоныска тыҥ санааркабаска не болужар?

²⁰ Иегова бойыныҥ ишчилерине чыннаҥ ла керектӱ немени ачып берер. Оныҥ учун биске та нени де билбезис деп санааркабас керек. Оныҥ ордына керектӱ немеге ајару эдер керек. Анайып бис «ончоны билер» Иегова Кудайга иженип турганысты кӧргӱзерис (Иов 36:4). Эм тура та нени де оҥдобой до турган болзоос, бис Иегованаҥ јажын-чакка ӱренерис деп билерис. Бу ӧйди бис энчикпей сакып јадыс, не дезе бис Иегова керегинде јаантайын јаҥы та нени де билип алып турарыс (Эккл. 3:11).