Улу ӱредӱчибистеҥ јаантайын ӱренедис

АДА-ЭНЕМНИҤ ТЕМИ

1950 јылдардыҥ учында ада-энем Италиянаҥ Канаданыҥ Ки́ндерсли деп калага (Саска́чеван деп провинция) кӧчӱп барган. Јаан удабай олор чындыкты уккан. Бу ӧйдӧҥ ала бис кӧгӱс керектерди баштапкы јерге тургусканыс. Кезикте бис ончобыс кере тӱжине јарлап туратаныс, оныҥ учун 8 јаштуда мен подсобный пионер болуп иштегем деп кокырлап туратам.

Мениҥ ада-энем арга-чакту болбогон. Је олор биске Иеговага иштееринде јакшы тем болгон. 1963 јылда ада-энем Пасаде́ну деп калада (Калифорния деп штат, США) ӧткӱрилген телекейлик курултайга барарга кӧп јӧӧжӧзин садып ийген. 1972 јылда итальянский јуунга болужарга, бис 1000 километр ыраагында турган Канаданыҥ Трейл деп калазына кӧчӱп келгенис (Британский Колумбия деген провинция). Адам магазин арутап иштеген. Ого јакшы иш келижип турза да, кӧгӱс керектерди баштапкы јерге тургузарга, ол андый ишке јӧпсинбейтен болгон.

Мен ада-энемге сӱреен јаан быйанду! Олордыҥ болужыла мен јаштаҥ ала мындый неме оҥдоп алгам: Кудайдыҥ Башкарузын баштапкы јерге тургуссам, Иегова мени кичеер (Матф. 6:33). Бу сӧстӧр чын деп, бастыра јӱрӱмимниҥ туркунына кӧргӧм.

ӦЙИСТИ ТОЛО БЕРИП ИШТЕП БАШТАЙДЫС

1980 јылда мен Де́бби деп кӧгӱс амадуларлу, јараш сыйынды алгам. Бис ӧйисти толо берип иштеерге кӱӱнзегенис. Оныҥ учун тойдыҥ кийнинеҥ ӱч ай ӧдӧ берерде, Де́бби пионердиҥ ижин баштаган. А бир јылдаҥ болуш керек кичинек јуунга кӧчӱп келеле, мен де пионердиҥ ижин баштагам.

Је бир канча ӧйдӧҥ биске мында јарабай барарда, мынаҥ јӱрер деп шӱӱп алдыс. Карын озо баштап аймак кӧрӧӧчиле куучындажып ийгенис. Ол јалакай эдип, јартын айтты: «Слер айалгагарда јӱк ле јаманын кӧрӱп јадаар. Је јакшызын кӧрӧргӧ албаданзаар, јакшы неме табыла ла берер». Оныҥ јӧби бисти санандырып ийген (Сар. 141:5). Бу јӧпти капшай ла тузаланып, јаан удабай ла ака чын айткан деп оҥдоп ийгенис. Јуунда Иеговага кӧпти эдерге турган улус кӧп деп ајарып ийгенис, ол тоодо балдар ла ӧбӧӧндӧри Кудайга бӱтпей турган эје-сыйындар болгон. Бу учурал биске јаан ӱредӱ болды. Биске јакшы немеге ајару эдип, Иегова бу кӱч айалгага чыкканча, сакыыр керек деп оҥдоп алганыс (Мих. 7:7). Јакшыны ајаруга алып, бис ойто сӱӱнип баштаганыс. Айалга да оҥдоло берген.

Пионерлердиҥ сургалында баштапкы катап ӱренип турарыста, бисти ӱреткен акалар ӧскӧ ороондордо јарлаган болгон. Олор биске слайдтар кӧргӱзип, кандый кӱчтер, кандый алкыштар болгон деп куучындап туратан. Олордыҥ мынайып эткени бисти миссионерлер болорго кӱӱнзетти. Оныҥ учун бис бойыска јаҥы амаду тургузып алдыс.

Бис амадубыска јединерге, 1984 јылда французский тилдӱ Квебе́к деп провинция дӧӧн кӧчкӧнис. Бу Британский Колумбиянаҥ 4000 километр ыраагында болгон. Анда биске јаҥы тилге, јаҥы культурага ӱренерге келишкен. Бого коштой биске акчабыс јетпей туратан. Кандый да ӧйдӧ бистиҥ јип турган курсагыс јӱк ле картошко болгон. Оны бис таныш фермердеҥ јараду сурайла, оныҥ јеринеҥ јууп алатан болгоныс. Дебби картошконоҥ ден кандый курсак белетебеди! Кӱчтерге кӧрбӧй, бис сӱӱнчилӱ артканыс, нениҥ учун дезе Иегова бисти кичееп турган деп јаантайын кӧргӧнис (Сар. 64:10).

Бир кӱн биске кенете телефон соккон — бисти Канадада Бет-Элге кычыргандар. Мынаҥ озо бис Галаад сургалга заявление бичигенис, оныҥ учун эмди канайдар деп билбей турдыс. Је шӱӱп сананала, Бет-Эл бардыс. Ары једип барала, филиалдыҥ комитединде иштеп турган Ке́ннет Ли́ттл акала куучындаштыс. Бисти Галаад сургалга кычырза, канайдарыс деп сураарыста, ол: «Кычырза, ол тушта кӧргӧйис» — деп айтты.

Бир неделе ӧдӧ берерде, Дебби ле мени Галаад сургалга кычырды. Нени эдер деп, ойто ло сананар керек болгон. Литтл ака биске айтты: «Нени де талдап алзаар, кийнинде ӧскӧ неме талдаар керек болгон деп санаалар тӱҥей ле болор. Мынызы онызынаҥ јакшы деп айдып болбозыҥ. Слер нени де талдап алзаар, Иегова алкыжын берер». Бис Галаад сургалды талдап, кийнинде Литтл аканыҥ ойгор сӧстӧрин эске алатаныс. Анайда ок бого тӱҥей айалгада болгон ака-эјелерге мыны куучындап туратаныс.

МИССИОНЕРЛЕР БОЛУП ИШТЕЙДИС

Галаад сургалда 83-чи класстыҥ 24 ӱренчигиле болорго, сӱреен сӱӱнчилӱ болды. Ӱредӱ Бруклинде (Нью-Йорк) 1987 јылда кандык айдаҥ ала башталган. Бисти Ю́лиссис Гласс ла Джек Ре́дфорд деп акалар ӱреткен. Беш айдыҥ ӧткӧнин билбей де калдыс! 1987 јылда сыгын айдыҥ 6-чы кӱнинде бистиҥ выпуск болгон. Бисти Жо́н ло Мари́ Гудтарла кожо Гаити дӧӧн аткарып ийдилер.

Галаадты божоткон ака-эјелерди 1962 јылдаҥ бери Гаити дӧӧн аткарбайтан болгон. Ол јылда калганчы миссионерлерди Гаитидаҥ чыгаргылап ийген. Ӱредӱниҥ кийнинеҥ ӱч неделе ӧдӧ берерде, Гаитиге кырларлу јерлерге 35 јарчылу кичинек јуунга једип келдис. Бис јиит, ченемел јок болгоныс, миссионерлердиҥ туразында јатканыс. Гаитиниҥ улузы коркышту јокту јаткылаган. Кӧп сабазы кычырып билбес болгон. Миссионер ижистиҥ баштапкы јылдарында бис ден нени кӧрбӧдис! Улустыҥ тӱймеен кӧдӱргенин, ороондо јаҥдар солынганын, кӱйӱп турган баррикадалар, коркышту тыҥ јоткондор.

Бис Гаитиде турумкай ла сӱӱнчилӱ ака-эјелердеҥ кӧп немеге ӱренип алганыс. Олордыҥ јӱрӱми јеҥил эмес те болгон болзо, олор Иегованы ла јарлаар ишти сӱӱген. Бир јаан јашту эје кычырып билбес болгон. Је Агару Бичиктеҥ 150 кире ӱлгерлерди ол сананып алган. Айландыра болуп турган немени кӧрӱп, мыныҥ аайына јӱк ле Кудайдыҥ Башкарузы чыгар деп оҥдоп турган болгоныс. Оныҥ учун бу керегинде бис улуска куучындаарга тыҥ кӱӱнзегенис. Ол ӧйдӧ Агару Бичикти ӱренген улузысты сананып ийзеес, јӱрегиске јылу боло берет. Кийнинде олордыҥ кезиги текши пионерлер, специальный пионерлер ле аксагалдар болуп калган.

Гаитиде мен мормон кудай јаҥныҥ Тре́вор деп јиит миссионериле танышкам. Бис оныла тоолу катап Агару Бичик керегинде куучындашканыс. Кӧп јылдар ӧткӧн кийнинеҥ меге Тре́вордоҥ самара келген. Ол бичиген: «Келер курултайда сууга чӧҥӱрилерге јадым! Мен Гаитиде та качан да мормон миссионер болуп иштеген јерлерде эмди специальный пионер болуп иштеерге кӱӱнзейдим». Тре́вордыҥ санаазы бӱдӱп калды: ол ӱйиле кожо канча јылдарга Гаитиде јарлап јӱрген.

ОЗО ЕВРОПА, ОНОҤ АФРИКА

Бисти Европада качан да токтодуда болгон Бет-Элге аткарып ийди. 1992 јылда бис Любля́на (Словения) деген калага једип келдис. Мынаҥ ыраак јок јерлерде мениҥ ада-энем чыдап ӧскӧн. Бу ӧйдӧ Югославия болгон јерлерде эмдигенче јуу болуп турган болгон. Бу јерлерде јарлаар иш учун Венадагы австрийский филиал, анайда ок За́гребте (Хорватия) ла Белгра́дта (Сербия) офистер каруулу болгон. Эмди кажы ла башка республикада бойыныҥ Бет-Элин ачарга турган болгон.

Айдарда, биске ойто ло јаҥы тилге, јаҥы культурага ӱренер керек болгон. Андагы улус биске: «Е́зик е те́жик» деп айдатан болгон. Бу дезе «Бистиҥ тилис кӱч» дегени. Эйе, ӱренерге кӱч болгон. Је ака-эјелердиҥ бӱткени бисти тыҥ кайкаткан. Олор организацияныҥ солынталарына јӧмӧжӧргӧ белен болгон. Оноҥ Иегова олордыҥ мындый кӧрӱм-санаазын канайып алкаганын кӧргӧнис. Бис база ла катап бӱдӱмјиленгенис: Иегова бойыныҥ ӧйинде ӱзе немени сӱӱжиле тӱзедип салар. Словенияда иштеген јылдар биске јакшы ӱредӱ болгон. Анайда ок алдында неге ӱренип алганыс биске мындагы кӱчтерди ӧдӧргӧ болушкан.

Је мынаҥ ары бисти ӧскӧ солынталар сакыган. 2000 јылда бисти Кӱнбадыш Африкада Кот-д’Ивуа́р деп ороонго аткарды. Оноҥ 2002 јылда кӱчӱрген айда гражданский јуу башталганынаҥ улам бисти Сье́рра-Лео́на дӧӧн эвакуировать этти. Сье́рра-Лео́нада 11 јылдыҥ туркунына улалган гражданский јуу јаҥы ла токтогон болгон. Мынайып Кот-д’Ивуа́рдаҥ кенете јӱрерге јеҥил эмес болгон. Је канча јылдарга ӱренип алганыс биске сӱӱнчибисти јылыйтпаска болушкан.

Сьерра-Леонада Агару Бичикти ӱренерге турган улус кӧп болгон. Оныҥ учун бис бого ајару эдерге албаданганыс. Анайда ок јуу ӧйлӧрди турумкай ӧткӧн ака-эјелердиҥ сӱӱжи бисти кайкаткан. Олор јокту јаткан, је тӱҥей ле не барыла ӱлежип туратан. Бир эје Деббиге кийим сыйлаарга сананган. Дебби албаска сананарда, эје мынайып айтты: «Јууныҥ ӧйинде ӧскӧ ороондордыҥ ака-эјелери биске тыҥ болушкан. Эмди бис болужарга кӱӱнзейдис». Бис Деббиле олордыҥ мындый кӧрӱм-санаазынаҥ ӱренер деп амаду тургустыс.

Кандый да ӧйдӧҥ бис Кот-д’Ивуар дӧӧн кайра келдис. Је ороондо айалга ойто ло катулана берген. Оныҥ учун 2004 јылда кӱчӱрген айда бисти вертолётту база ла эвакуировать этти. Бистиҥ кажыбыс ла јӱк ле 10 килограмм багаж алар аргалу болгон. Бис французский военный базада јерге уйуктаганыс. Оноҥ эртезинде ле бисти Швейцария аткарып ийди. Тӱн ортозында Бет-Элге једип барарыста, бисти филиалдыҥ комитединиҥ акалары, ШУС-та ӱредип турган акалар ла оныҥ ӱйлери јылу уткыды. Олордыҥ тыҥ кучактаганы, изӱ курсакла азыраганы ла толтыра швейцарский шоколад болгоны санаабыска јакшы артып калган. Олордыҥ сӱӱжи бистиҥ јӱрегисти тыҥ томулткан.

Бисти кыска ӧйгӧ Ганага аткарган, оноҥ Кот-д’Ивуарда айалга кем јок боло берерде, бисти ойто ары аткарды. Кенетийин бир јердеҥ, база бир јерге барар керек болгонынаҥ улам ла эвакуациянаҥ улам санааркаштарды ӧдӧргӧ ака-эјелердиҥ сӱӱжи болушкан. Иегованыҥ организациязында карындаштык сӱӱш болор јаҥду да болзо, је бис Деббиле кожо мыны баалап јӱрерис деп шӱӱп алганыс. Бу тӱймеендӱ, шакпыртту ӧйдӧ дӧ кӧп немеге ӱренип алганыс.

БЛИЖНИЙ ВОСТОКТО ИШТЕЙДИС

2006 јылда тӧс башкарунаҥ бис эмди Ближний Востокто иштеерис деп самара алганыс. Бисти ойто ло јаҥы тил ле культура, јаҥы учуралдар ла кӱчтер сакыган. Биске политика ла кудай јаҥ јанынаҥ кату јерде кӧпкӧ ӱренерге келишкен. Анайда ок башка-башка культуралу ака-эјелердиҥ бирлиги бисти сӱреен тыҥ кайкаткан. Олордыҥ ончозы Иегованыҥ организациязыныҥ башкартуларын бӱдӱрген, оныҥ учун олор бирлик болгон. Бис ол ака-эјелерле тыҥ оморкойдыс, не дезе олор тӧрӧӧндӧриниҥ, кожо ӱренип турган балдардыҥ, кожо иштеп турган улустыҥ ла айылдаштарыныҥ удурлажуларын турумкай ӧткӧн.

2012 јылда бис Тель-Ави́вте (Израиль) специальный курултайда болгоныс. Бу јерде Кудайдыҥ албатызы б.э. 33 јылда Беженинчи кӱннеҥ бери андый кӧп бир де јуулышпаган. Мындый кайкамчылу байрамды качан да ундып болбозыҥ!

Бир кӱн бис экӱни ижис токтодуда болгон ороонго аткарган. Бис тоолу бичиктер алала, андагы ака-эјелерле јарлаганыс, анайда ок јаан эмес курултайларда болгоныс. Кайда ла блокпосттор, мылтык-јепселдӱ солдаттар болгон. Је бис бойысты коруда деп сескенис, не дезе бистиҥ јаныста јаантайын ака-эјелер болгон. Анайда ок кӧскӧ илинбеске бис ајарыҥкай болгоныс.

АФРИКАГА КАЙРА КЕЛГЕНИС

2013 јылда бис Кинша́саныҥ (Конго деп Демократический Республика) Бет-Элинде иштейтен јаҥы јакылта алганыс. Конго јараш ар-бӱткендӱ јаан ороон, је албатызы јоксыраштаҥ ла јуу-чактаҥ улам тыҥ шыралап калган болгон. Баштап ла: «Африкада бис болгоныс, оныҥ учун ары барарга белен» — деп санандыс. Је биске база да кӧп немеге ӱренер керек болгон! Темдектезе, јолы јок, кӱри јок јерге канайып једетенине ӱренгенис. Андагы ака-эјелер биске сӱреен јакшы тем болды. Олор экономикалык кӱчтерге кӧрбӧй, сӱӱнчилӱ артып, турумкай болгон, јарлаар ишти сӱӱген, јуундарга ла курултайларга барарга, кӧп ийде-кӱчин бергилеген. Чындыкты угарга ла Кудайга иштеерге турган улустыҥ да тоозы там ла там кӧптӧгӧн. Мынаҥ ӱзе бис Иегованыҥ алкыжын ла болужын јарт кӧргӧнис. Конгодо иштеген ӧйлӧр бистиҥ ченемелисти сӱреен тыҥыткан, анайда ок кару, јуук најылар сыйлаган.

2017 јылдыҥ учында бис ойто ло кӧчтис. Бу тушта Тӱштӱк Африканыҥ Бет-Элине. Ол мынаҥ озо иштеген Бет-Элдердеҥ канча киреге јаан болгон. Мында биске јаҥы иш берилген. Бу ишти бис качан да этпегенис, оныҥ учун биске ойто ло ӱренер керек болгон. Је канча јылдарга неге ӱренгенис бу да јакылтаны бӱдӱрерге болушкан. ЮАР-да бис Иеговага 20, 30, 40, оноҥ до кӧп јылдар иштеген ака-эјелерле танышканыс. Бис олорго тыҥ карузып јадыс. Бистиҥ Бет-Элде андый јакшы, башка-башка укту, культуралу улус Иеговага бирлик, нак иштегилеп јат! Эйе, Иегова олордыҥ библиялык принциптерле јӱрерге турганын ла јакшы кылык-јаҥдарын ӧскӱрерге турганын алкап јат.

Бис Деббиле канча јылдардыҥ туркунына кожо иштеп, кӧп јилбилӱ јакылталар алганыс, башка-башка культурага ӱренишкенис, јаҥы тилдер ӱренгенис. Кезикте бу јеҥил болбогон. Је бис организацияныҥ ла ака-эјелердиҥ болужы ажыра Иегова бисти тыҥ сӱӱп турган деп јаантайын сезип туратаныс. (Сар. 144:2). Канча јылдардыҥ туркунына ӱренгенистеҥ улам Иегова бисти оноҥ кӧп тузаланар аргалу болот деп алаҥзыбай јадыс.

Ада-энем мени јакшы таскадып салганына јаан быйанду болодым. Анайда ок кару Дебби ӱйимниҥ болужын тыҥ баалап јадым. Башка-башка ороондордо јадып турган ака-эјелердиҥ темдери учун база јаан быйанду болодым. Бис Деббиле экӱ келер ӧйдӧ Улу ӱредӱчибистиҥ јаҥы ӱредӱлерин энчикпей сакыйдыс!