«Агару Бичик неге ӱредет?» Кычыратан ӱлгерлер

1 БАЖАЛЫК

КУДАЙ ОЛ КЕМ АНДЫЙ?

(Иов 34:10—12) Айдарда, ойгор јӱректӱ улус, мени угугар. Кӱчтӱдеҥ Кӱчтӱ чындык Кудайдыҥ јаман неме эдер аргазы јок!» ¹¹ Нениҥ учун дезе Кудай кижини эткен керектери ле јӱрген јолдоры учун эмезе кайралдаар, эмезе каруузына тургузар. ¹² Чынынча, Кудайдыҥ јаман эдер аргазы јок. Кӱчтӱдеҥ Кӱчтӱ Кудай јастыра јаргы чыгарбай јат.

(Сарын 37:9—11) Нениҥ учун дезе јаман керектер эдип турган улус јоголтылар. Је Иеговага иженип турган улус јерди энчиленер. ¹⁰ База бир эмештеҥ ле кинчектӱлер јоголып калар; јерине кӧрӱп, олорды таппай каларыҥ. ¹¹ Јобоштор дезе, јерди энчиленип, арбынду амырла јакшызынар.

(1 Петр 5:7) Не де керегинде санааркабагар, Ого иженигер, нениҥ учун дезе Ол слерди кичееп кӧрӱп јӱрӱ.

(Апостолдордыҥ ижи 17:11) Мындагы улус Фессалониканыҥ улузынаҥ керсӱ болгон. Олор Павелдиҥ јарлыктаганын кичеенип угуп тургандар. Ол сӧс чын ба деп билерге, Агару Бичикти шиҥжӱлеп тургандар.

2 БАЖАЛЫК

АГАРУ БИЧИК — КУДАЙДАҤ БЕРИЛГЕН БИЧИК

(2 Тимофейге 3:16) Ончо Агару Бичик Кудайдыҥ Тыныла берилген. Ол улусты ӱредерге, кинчекти илезине чыгарарга, јӱрӱмди тӱзедерге, акту эдип таскадарга тузалу.

(Ачылта 1:3) Бу судур сӧстӧрди кычырып турганы ла угуп тургандары, анда бичилгенин чеберлеп тургандары кежиктӱ, нениҥ учун дезе ӧй јууктап келди.

(Исаия 44:27—45:2) Тӱби јок сууга айдадым: „Соолып кал, мен сениҥ ончо агын сууларыҥды кургадып саларым“, ²⁸ Кир керегинде айдадым: „Ол мениҥ кӱдӱчим, ол мениҥ табымды бӱдӱрип салар, ол тоодо Иерусалим керегинде мениҥ айткан сӧстӧримди: „Ол тудулып калар — анайда ок ӧргӧӧ керегинде: „Сениҥ тӧзӧлгӧҥ салынып калар“».

45 Иегова ончо албатыларды Кирдиҥ алдына бактырып, каандардыҥ курчанып алган курларын уштып саларга, оныҥ алдына эки јаакту эжиктерди ачып, олор јабылбазын деп, оныҥ оҥ колынаҥ тудуп алган. Иегова Кирге, бойыныҥ майлатканына, айдат: ² «Мен сениҥ алдыҥда бойым барып, кырларды тӱзедип саларым, јес темирдеҥ эдилген эжиктерди темир јылдырмаларыла оодып саларым.

(Титке 1:2) Анайда јаҥыс ӱргӱлји јӱрӱмге иженип бӱдӱп јадылар. Ӱргӱлји јӱрӱмди чактар башталардаҥ озо тӧгӱндебес Кудай биске берер болгон.

(Еврейлерге 4:12) Кудайдыҥ сӧзи јӱрӱп, бойыныҥ ижин эдет ине, ол кандый да эки мистӱ кылыштаҥ курч: ӧзӧк-буурга кирип, јуланы ла тынды, ӱйе-сӧӧктӧрди ле јиликти бӧлип, јӱректиҥ кӱӱнин ле умзаныжын јаргылайт.

3 БАЖАЛЫК

КУДАЙ УЛУСКА НЕНИ ЭДЕРГЕ КӰӰНЗЕЙТ?

(Иаков 1:13—15) Ченедип турган улустыҥ кемизи де: «Мени Кудай ченеп јат» — дебезин, нениҥ учун дезе Кудайды кем де јаманла ченеп болбос, Ол Бойы да кемди де ченебейт. ¹⁴ Је кажы ла кижи акту бойыныҥ кычазына јилбиркедип ле мекеледип ченелет. ¹⁵ Кыча дезе, табынала, кинчек чыгарып алат, эдилген кинчек — ӧлӱм экелет.

(Башталганы 3:1—5) Кудай Кайракан јайаган ончо аҥдардыҥ эҥ сӱмелӱзи јылан болгон. Ол ӱй кижинеҥ сураган: «Садтагы агаштардыҥ бирӱзиниҥ де јиилегин Кудай слерге јидиртпей турганы чын эмеш пе?» ² Ӱй кижи каруузын јандырган: «Биске агаштардыҥ јиилегин јиирге јараар, ³ је Кудай айткан: „Садтыҥ ортозындагы агаштыҥ јиилектерин јаҥыс јибегер, олорго тийбегер де, оноҥ башка ӧлӱп каларыгар“». ⁴ Јылан: «Ӧлбӧзигер — деген.— ⁵ Кудай билер: слер олорды јизегер, кӧстӧригер ачылып, јакшыны ла јаманды билер кудайлардый боло береригер».

(Римдегилерге 5:12) Кинчек телекейге бир кижи ажыра келген, кинчек ажыра ӧлӱм келген. Анайып ончо улус ӧлӱмдӱ боло берген, нениҥ учун дезе ончозы кинчек эткен.

(Укаа сӧстӧр 27:11) Уулым, ойгор бол, јӱрегимди сӱӱндир. Ол тушта мени јамандаганга каруу берер аргалу болорым.

(Даниил 2:44) Теҥеридеги Кудай ол каандардыҥ кӱндеринде јажын-чакка јоголбойтон каандык тургузар. Бу каандык ӧскӧ албатыга берилбес. Ол бастыра каандыктарды јоголтып, бойы ӱргӱлјиге турар.

(Иоанн 3:16) Ого бӱткен кажы ла кижи ӧлбӧй, ӱргӱлји јӱрӱмдӱ болзын деп, Кудай бу телекейдиҥ улузына карузыган учун сок јаҥыс Уулын берген.

(Иоанн 17:3) Ӱргӱлји јӱрӱм дезе — ол јаҥыс чын Кудай Бойыҥды, Сен ийген Иисус Христосты билери.

(Исаия 32:18) Мениҥ албатым амыр јурттарда, бек тураларда, тымык јерлерде јадар.

(Михей 4:4) Кажы ла кижи бойыныҥ виноградыныҥ ла смоква агажыныҥ алдында отурар, олорды кем де коркытпас, нениҥ учун дезе мыны јуучыл Иегова айдат.

(Исаия 65:21—24) Улус туралар тудуп јадар, виноград ӧскӱрип јиир. ²² Тураны ӧскӧ кижи јатсын деп тутпас, виноградты ӧскӧ кижи јизин деп отургыспас. Мениҥ албатымныҥ кӱндери агаштыҥ кӱндериндий болор, мениҥ талдап алгандарым бойлорыныҥ колыла эткен эдимдериле узакка тузаланар. ²³ Калас тегин иштенгилебес ле ачу-коронго балдар чыгаргылабас, нениҥ учун дезе олор Иегова Кудайдыҥ алкап салган калдыгы, олорло кожо олордыҥ бала-барказы. ²⁴ Олор мени кычыргалакта, мен каруу берерим. Олор айдып божотколокто, мен угуп ийерим.

(Ачылта 11:18) Калыктар чугулданган, Сениҥ де чугулыҥ келди. Ӧлгӧндӧрди јаргылаар, кулдарыҥды, јарлыкчыларыҥды, агаруларды, Сенеҥ айагандарды, кичӱлерди ле улуларды кайралдаар, јерди кырып тургандарды кырар ӧй келди.

(Исаия 11:6—9) Кезикте бӧрӱ ле кураан кожо јӱрер, ирбис ле уулак кожо јадар. Семирте азыралган мал бозула, јаш карагулала кожо болор, олорды кичинек уулчак јединип јӱрер. ⁷ Айу ла уй кожо отоп јӱрер, олордыҥ балдары кожо јадар. Карагула бука чылап салам јиир. ⁸ Эмчек эмер бала јыланныҥ уйазыныҥ ӱстинде ойноор, эмчектеҥ айрылган бала коронду јыланныҥ уйазына колын сунар. ⁹ Мениҥ бастыра агару кырымда кем де каршу этпес ле нени де буспас, нениҥ учун дезе, јер, талайды толтырган суудый ок, Иегова керегинде билгирле толор.

(Исаия 65:25) Бӧрӱ ле кураан кожо јӱрер, карагула бука чылап салам јиир, а јылан тоозын јип азыранар. Ончо мениҥ агару туумда јаман эткилебес» — деп, Иегова айдат.

(Иоанн 5:28, 29) Мыны кайкабагар, нениҥ учун дезе сӧӧк салар јерде јаткандардыҥ ончозы Кудайдыҥ Уулыныҥ ӱнин угар ӧй једип келедири. ²⁹ Јакшы эдип јӱргендери јӱрӱм јӱрерге тирилер; јаман эдип јӱргендери буруладарга тирилер.

4 БАЖАЛЫК

ИИСУС ХРИСТОС — ОЛ КЕМ?

(Иоанн 3:13) Теҥериде јӱрген, теҥеридеҥ тӱшкен Кижи Уулынаҥ башка, теҥериге кем де чыкпаган.

(Иоанн 6:38) Бойымныҥ табымла эдип јӱрейин деп, теҥеридеҥ тӱшкен эмезим, Мени ийген Аданыҥ табыла эдип јӱрейин деп, теҥеридеҥ тӱшкем.

(Иоанн 6:62) Кижи Уулыныҥ озогы јерине чыгып баратканын кӧрзӧгӧр, не болор?

(Иоанн 17:4, 5) Сени јерде мактаттым, Меге этсин деп јакып салганыҥды бӱдӱрдим. ⁵ Ада! Телекей бӱдердеҥ озо Мен Сениле јӱреримде, Менде болгон макла эмди Мени Сен макта.

(Иоанн 14:28) «Слердеҥ барарым, слерге келерим» деп, Мениҥ слерге айтканымды укканыгар. Слер Мени сӱӱген болзогор, Адага барып јатканыма сӱӱнер эдигер, Ада Менеҥ јаан ине.

(Матфей 9:35, 36) Иисус ончо калаларды ла јурттарды эбирип, синагогаларда ӱредип јӱрди. Ол Каандык керегинде Сӱӱнчилӱ Јар јарлап, улустыҥ кандый ла оорузын, кандый ла јоболын јазып турды. ³⁶ Кӧп улусты кӧрӧлӧ, олорго ичи ачыды: олор кӱдӱчизи јок койлордый тӱймеп, тозуп калгандар.

(Филиппыдагыларга 2:8) Ӧлӧргӧ, керӱ агашта да ӧлӧргӧ јетире уккур болуп, јобожыдынган.

5 БАЖАЛЫК

ТОЛЫНТЫ — КУДАЙДЫҤ БААЛУ СЫЙЫ

(Матфей 20:28) Анайып ок Кижи Уулы улусты Ого јалчы болзын деп эмес, улуска јалчы болойын деп, кӧп улус учун Бойыныҥ јӱрӱмин берейин деп келген».

(Римдегилерге 5:19) Бир кижиниҥ уккур эмези кӧп улусты кинчектӱ эткени чилеп, бир Кижиниҥ уккур болгоны кӧп улусты акту эдер.

(Римдегилерге 3:23, 24) нениҥ учун дезе, ончо улус кинчек эдип, Кудайдыҥ магын керексинип јадылар. ²⁴ Ончозы Кудайдыҥ јакшылыгыла тегинге акталадылар, нениҥ учун дезе олорды Иисус Христос јайымга садып алган.

(Лука 22:19) Калаш алып, алкыш јетирди, сындырала, олорго берип, айтты: «Бу — слер учун берилип јаткан Мениҥ эди-каным. Мени эске алынып, анайда эдип јӱригер».

6 БАЖАЛЫК

БОЖОП КАЛГАН КИЖИЛЕ НЕ БОЛУП ЈАТ?

(Јарлыкчы 9:5, 6) Тирӱ улус божоп каларын билер, божогон улус дезе нени де билбес, олорго кандый да кайрал берилбей јат, нениҥ учун дезе олор ундылып калат. ⁶ Олор сӱӱбей де јат, јаман кӧрбӧй дӧ јат, кӱнӱркебей де јат, олорго бу ак-јарыкта чактыҥ-чакка кандый да ӱлӱ јок.

(Јарлыкчы 9:10) Колыҥ туткадый ончо ижиҥди бастыра ийде-кӱчиҥле эт, нениҥ учун дезе сӧӧк салар јерде иш те, амадулар да, билгир де, ойгор до јок.

(Башталганы 3:19) кара терге тӱжӱп, калажыҥа јединериҥ. Оноҥ туулган јериҥе бурыларыҥ: тоозыннаҥ бӱткен бойыҥ ойто тоозын болуп каларыҥ».

(1 Иоанн 4:8) Сӱӱбей турганы, Кудайды билип албаган, нениҥ учун дезе Кудай — ол сӱӱш.

7 БАЖАЛЫК

АГАРУ БИЧИК ТИРИЛИШ КЕРЕГИНДЕ НЕНИ АЙДАТ?

(2 Коринфтегилерге 1:3, 4) Кудайга, Иисус Христос Кайраканыстыҥ Адазына, баш болзын! Ол буурзак Ада, кандый ла коот [токунал] береечи Кудай. ⁴ Ол бисти ончо уур-кӱчтеристе кооттоп јат. Анайып бис те, уур-кӱчтерде јӱрген улусты Ол бисти кооттоп турган коотло кооттоор аргабыс бар.

(Иоанн 11:41, 42) Ташты алып ийдилер. Иисус саҥ ӧрӧ кӧрӱп, айтты: «Ада, Мени укканыҥ учун Сеге алкыш јетирип турум. ⁴² Мени качан да болзо угарыҥды билгем, Мени ийгени Сен болгоныҥа бӱтсин деп, мынайда бу турган улуска болуп айттым».

(Исаия 40:26) Бажыгарды кӧдӱрип, теҥериге кӧрӱгер. Мыныҥ ончозын кем јайаган? Ол јылдыстардыҥ тоозын билер, олорды кажызын ла адыла адайт. Оныҥ сӱреен јаан ийде-кӱчиниҥ учы-кыйузы јок болгонынаҥ улам, олордыҥ кажызы ла бойыныҥ јеринде турат.

(Апостолдордыҥ ижи 24:15) Мен олор чылап ок, актулар да, акту эместер де тирилерине бӱдӱп, Кудайга иженедим.

(Ачылта 21:4) Олордыҥ кӧзинеҥ ончо јашты арчыыр. Ӧлӱм де, ачу-корон до, сыгыт та, јобол до база болбос, нениҥ учун дезе башкызы јӱре берген.

8 БАЖАЛЫК

КУДАЙДЫҤ КААНДЫГЫ ОЛ НЕ?

(Матфей 6:9—13) Мынайып мӱргигер: «Теҥеридеги Адабыс! Адыҥ Сениҥ агарулалзын, ¹⁰ Каандыгыҥ Сениҥ келзин. Канайып теҥериде, анайып јерде де табыҥ Сениҥ болзын. ¹¹ Кӱнӱҥ сайынгы калажысты бӱгӱн биске бер. ¹² Биске тӧлӱлӱ улустаҥ канайып некебейдис, бистиҥ де тӧлӱлеристи некебе. ¹³ Ченелтеге бисти кийдирбе, је јаманнаҥ бисти корула. Каандык, кӱч, мак дезе, ӱргӱлјиге Сенийи. Аминь».

(Ачылта 14:1, ЈК 2003) Кӧрзӧм, Сион кырда Кураан туру, Оныла кожо 144 муҥ кижи. Маҥдайларында Оныҥ ады-јолы ла Адазыныҥ ады-јолы бичилген.

(Ачылта 14:4, ЈК 2003) Бойлорын ӱй улусла быјарсытпаган улус бу, нениҥ учун дезе олор ару бойлоры артып калгандар. Кураан кайдаар ла барганда, Оны ээчип турган улус бу. Олор баштапкы кат-јиилектер чилеп, Кудайга ла Кураанга улустаҥ садылып алган.

(Ачылта 12:7—10) Теҥериде јуу башталган: Михаил ле оныҥ ангелдери јелбегенге удура јуулашкан. Јелбеген ле оныҥ ангелдери олорго удура јуулашкан. ⁸ Је јелбеген баштагандар јеҥдирткен, олорго теҥериде јер табылбаган. ⁹ Кӧрмӧс лӧ сатана деп адалаачы, бастыра телекейди мекелеечи јаан јелбеген, јебрен јылан, тӧмӧн ташталган. Ол јерге ташталган, ангелдери кожо ташталгандар. ¹⁰ Теҥериде айткан тыҥ ӱнди угуп ийгем: «Эмди Кудайыстыҥ аргадажы, кӱчи ле каандыгы, Оныҥ Христозыныҥ јаҥы једип келди, нениҥ учун дезе карындаштарысты коптоочы, олорды Кудайыс алдында тӱни-тӱжи коптоочы ташталган.

(Сарын 37:10) База бир эмештеҥ ле кинчектӱлер јоголып калар; јерине кӧрӱп, олорды таппай каларыҥ.

9 БАЖАЛЫК

БУ ТЕЛЕКЕЙЛЕ НЕ БОЛОР?

(Еврейлерге 10:24, 25) Сӱӱрге ле јакшы керектер эдерге кӧкӱдижип, бой-бойыбыска ајарыҥкай бололы. ²⁵ Јуундарыстаҥ туура артпайлыктар, кезик улуста андый темигӱ бар. Оныҥ ордына Кайраканныҥ кӱни јууктап келеткенин кӧрӱп, бой-бойыбысты мынаҥ артык сергидектер.

10 БАЖАЛЫК

АНГЕЛДЕР ЛЕ КӦРМӦСТӦР КЕРЕГИНДЕ ЧЫНДЫК

(Башталганы 6:2) Кудайдыҥ уулдары улустыҥ кыстары јараш болгонын кӧрӱп, санаа-кӱӱни јеткениле биригип турган.

(2 Коринфтегилерге 2:11) Бис оныҥ умзаныштарын билер эмейис.

(Јаҥды такыганы 18:10, 11) Слердиҥ ортогордо кем де бойыныҥ уулын эмезе кызын отко салбас, белгелебес, тармалабас, байланбас, ¹¹ улусты тармала бириктирбес, неме билер улуска ла кам-јарлыкка баштанбас эмезе ӧлгӧндӧрдӧҥ нени де сурабас учурлу.

(Укаа сӧстӧр 18:10) Иегованыҥ ады — бек бакана, акту кижи ары качып, кору алат.

(Иаков 4:7, 8) Анайдарда, Кудайга багыгар. Кӧрмӧскӧ удура турыгар, ол слердеҥ кача берер. ⁸ Кудайга јууктагар, Ол слерге јууктаар. Колдорыгарды јуныгар, кинчектӱлер, јӱректеригерди арутагар, экиленген санаалу улус.

11 БАЖАЛЫК

КЫЙЫН-ШЫРА ЈЕРДИҤ ӰСТИНДЕ НЕНИҤ УЧУН АНДЫЙ КӦП?

(2 Петр 3:9, 10) Кайракан Бойыныҥ берген сӧзин бӱдӱрерге табыланбайт; кезик улус оны табыланыш деп бодойт. Је Ол биске узак чыдажат, нениҥ учун дезе кем де ӧлӱп калбазын, карын, ончо улус кинчегин алынып, Кудайга баштанзын деп кӱӱнзейт. ¹⁰ Кайраканныҥ кӱни тӱнде уурчы чылап келер, ол тушта теҥери табыштанып јоголор, телекейдиҥ тӧзӧлгӧзи дезе кӱйӱп јайрадылар, јер ле ондогы ончо керектер кӱйӱп калар.

(1 Коринфтегилерге 10:13) Слерге улусла болуп турган ченелте тӱшкен. Кудай чындык, Ол кӱчигер јетпес ченелтелерди болдыртпас, је ченелте тужында оны ӧдӱп чыгар арга берер.

12 БАЖАЛЫК

КУДАЙДЫҤ НАЈЫЗЫ БОЛОРГО НЕНИ ЭДЕР КЕРЕК?

(1 Петр 3:12) Кайракан актуларга кӧрӱп јат, олордыҥ јайнуузын угуп јат, је Кайракан јаман эдеечи улуска удура олорды јер ӱстинеҥ јоголторго».

(Сарын 15:1—5) О-о Иегова, Сениҥ байканыҥда кем айылчы болор? Сениҥ агару тууҥда кем јадар? ² Јек јок, чындык јӱрген ле јӱрегинде чынды айдып турган кижи. ³ Ол бойыныҥ јуугына јаман эдип, тилиле јабарлабай јат. Најызын јамандагандарга бирикпей јат. ⁴ Кара санаалу кижини ол кыйа кӧрӧт, је Иегованаҥ айап тургандарды ол тооп јат. Бойына каршу да болотон болзо, айткан сӧзин буспай јат. ⁵ Акчазын процентке бербей јат, буру јок кижини бурулаарга, сый албай јат. Мынайып эдип турган кижи бӱдӱрилбей, чактарга бек турар.

13 БАЖАЛЫК

ЈӰРӰМДИ БААЛАГАР

(Сарын 36:9) Јӱрӱмниҥ башталганы сенде.

(1 Иоанн 3:15) Бойыныҥ карындажын јаман кӧрӧӧчи кандый ла кижи,— кижи ӧлтӱреечи. Кандый да ӧлтӱреечиде ондо јӱретен ӱргӱлји јӱрӱм јок деп, слер билеригер.

(Чыгыш 21:22, 23) Эр улус согужып јадала, барлу ӱй кижиге кол кӧдӱрип ийзе, ӱй кижи ӧйи јеткелекте балазын таап алза, је ӧлӱм болбозо, бу ӱй кижиниҥ ӧбӧӧни канчаны тӧлӧзин деер, бурулу кижи ончоны јаргычылар ажыра тӧлӧп берер учурлу. ²³ Је кем-кем божоп калза, сен јӱрӱм учун јӱрӱмди берер учурлу.

(Апостолдордыҥ ижи 15:28, 29) Агару Тын ла бис мындый некелтедеҥ башка, слерди неле де јоботпос деп шӱӱдис: ²⁹ чалуга тайганныҥ эдин, канын, бууп ӧлтӱргенниҥ эдин јибегер, балыр јӱрӱм јӱрбегер. Бойыгарга этпейин дегенди ӧскӧ улуска этпегер. Бойыгарды мынаҥ чеберлеп, јакшы эдеригер. Су-кадык јӱригер».

14 БАЖАЛЫК

БИЛЕ ЫРЫСТУ БОЛЗЫН ДЕП, НЕНИ ЭДЕР КЕРЕК?

(Ефестегилерге 5:25—29) Эрлер, Христос Серкпени сӱӱгени чилеп, слер де ӱйлеригерди сӱӱгер. Оны Кудайдыҥ сӧзиле јунуп, арутап, Ого учурлайын деп, Ол Серкпе учун Бойын берген. ^26—27 Бойыныҥ алдында мактулу Серкпе боло берзин, ондо эмеш те кир, једикпес, бого тӱҥей ӧскӧ дӧ немелер јок болзын, је ол агару ла јек јок болзын деп, Ол кӱӱнзеген. ²⁸ Анайып, акту бойлорыныҥ эди-канын чылап, ӧбӧгӧндӧри де ӱйлерин сӱӱр учурлу. Ӱйин сӱӱгени, бойын бойы сӱӱгени ол. ²⁹ Кем де качан да бойыныҥ эди-канын јаман кӧрбӧгӧн. Карын, оны азырайт, кичеейт, Кайракан Серкпени чилеп,

(Титке 2:4, 5) јиит келиндерди ӧбӧгӧндӧрин сӱӱрге, балдарды сӱӱрге ӱретсин, ⁵ кӧгӱстӱ болорго, ару болорго, айыл-јуртын кичеерге, јалакай болорго, ӧбӧгӧндӧрине сӧсуккур болорго ӱретсин. Ол тушта Кудайдыҥ сӧзи јамандалбас.

15 БАЖАЛЫК

КУДАЙГА КАНДЫЙ БАЖЫРЫШ ЈАРАП ЈАТ?

(Иоанн 17:17) Олорды чындыкла агарулап сал: Сениҥ сӧзиҥ — чындыктыҥ бойы.

(Иоанн 17:6) Сениҥ Меге телекейдеҥ алып берген улузыҥа адыҥды ачтым. Олор Сенийи болгон эди, олорды Меге Сен бергеҥ; олор сӧзиҥнеҥ чыкпай јӱрген эди.

(Иоанн 13:35) Ортогордо сӱӱш болзо, слерди Мениҥ ӱренчиктерим деп, ончозы танып ийер.

(Иоанн 3:36) Уулына бӱткени, ӱргӱлји јӱрӱмдӱ, Уулына бакпаганы, јӱрӱм кӧрбӧс: оныҥ ӱстинде Кудайдыҥ чугулы јӱрет.

(Иоанн 18:36) Иисус айтты: «Мениҥ Каандыгым бу телекейдеҥ эмес. Каандыгым бу телекейдеҥ болгон болзо, Мени иудейлерге берилбезин деп, Мениҥ јалчыларым Мен учун тартыжар эди. Је эмди Мениҥ Каандыгым мынаҥ эмес».

(Матфей 24:14) Ончо калыктарга кере болзын деп, Каандык керегинде Сӱӱнчилӱ Јар јер-ӱстине јарлалар. Ол тушта чак тӱгенер.

16 БАЖАЛЫК

КУДАЙГА ЈАРААР ЭДИП БАЖЫРЫГАР

(Чыгыш 20:4, 5) Ӧрӧги турган теҥеридеги, тӧмӧнги турган јердеги эмезе јердеҥ јабыс суудагы немелердиҥ сӱрлерин ойып јазаба. ⁵ Олорго бажырба да, иштебе де, нениҥ учун дезе мен јӱк меге чындык болорын некеп турган сениҥ Иегова Кудайыҥ. Мени јаман кӧргӧн адалардыҥ кинчеги учун, уулдарын ӱчинчи ле тӧртинчи ӱйезине јетире каруузына тургузадым.

(2 Коринфтегилерге 6:17) «Оныҥ учун олордыҥ ортозынаҥ чыгып, олордоҥ бӧлӱнигер,— деп, Кайракан айдат,— ару эмеске тийбегер, Мен слерди јуудып аларым».

(Матфей 7:12) Оныҥ учун, слерге улус кандый болзын дезегер, бойыгар да олорго андый ок болыгар. Ол керегинде Јасак ла јарлыктар айдат ине.

17 БАЖАЛЫК

КУДАЙГА КАНАЙЫП МӰРГӰӰР КЕРЕК?

(Филиппыдагыларга 4:6, 7) Не де керегинде санааркабагар, је јаантайын мӱргип ле сурап, алкыш айдып, Кудайдыҥ алдында керексигенеерди ачыгар. ⁷ Ол тушта Кудайдыҥ не ле сагыштаҥ бийик амыры јӱректеригерди ле сагыжыгарды Христос Иисустыҥ Бойында чеберлеер.

(Иаков 2:26) Эт-кан тын јокко јӱрӱм јок. Анайып бӱдӱмји де эдилген керектер јокко јӱрӱм јок.

(Ачылта 14:6) Теҥериде учуп бараткан ӧскӧ ангелди кӧрӱп ийгем. Јерде јуртаган улуска, кандый ла укка, ӱйеге, тилге ле калыкка јарлаарга, ол мӧҥкӱлик Јакшылыкту Јарлу болгон.

(2 Коринфтегилерге 4:7) Је бис јӱк андый эрјине чеберлелип турган той балкаш јыракылар эдибис. Оныҥ учун бу артыкташкан кӱч бистийи эмес, Кудайдыйы болгоны јарт.

18 БАЖАЛЫК

КУДАЙГА УЧУРЛАНАРЫ ЛА ЧӦҤӰРИЛЕРИ НЕНИ ТЕМДЕКТЕЙТ?

(Иоанн 17:3) Ӱргӱлји јӱрӱм дезе — ол јаҥыс чын Кудай Бойыҥды, Сен ийген Иисус Христосты билери.

(1 Петр 4:2) Јердеги јӱрӱминиҥ арткан ӧйин кижиниҥ кычаларына башкартпай, је Кудайдыҥ табыла ӧткӱрерге, оныҥ анайда эдип турганы ол.

(Матфей 28:19) Анайдарда, барыгар, ончо калыктарды ӱредигер. Олорды Аданыҥ, Уулыныҥ ла Агару Тынныҥ адыла кресте[гер],

19 БАЖАЛЫК

ИЕГОВАЛА НАЈЫЛЫГАРДЫ БААЛАГАР

(Матфей 22:37) Иисус ого айтты: «Кайраканды, сениҥ Кудайыҥды, бастыра јӱрегиҥле, бастыра јулаҥла [бойыҥла], бастыра санааҥла сӱӱп јӱр».

(1 Иоанн 5:3) Кудайдыҥ јакылталарын бӱдӱрип јӱрзебис — Оны сӱӱп јадыбыс. Оныҥ јакылталары уур эмес,

(1 Фессалоникадагыларга 5:17) Туркаары мӱргигер.

(1 Коринфтегилерге 15:58) Анайдарда, сӱӱген карындаштарым, кӧп иштеп јӱргенигер Кайракан алдында калас эмезин билип, турумкай болыгар, јана баспагар, Кайраканга иштеерине бастыра бойыгарды беригер.

(Ефестегилерге 4:32) Је бой-бойыгарга быйанзак, буурзак болыгар. Кудай Христостыҥ Бойында јаманыгарды таштаганы чылап, слер де бой-бойыгардыҥ јаманыгарды таштагар.