Ака-эјелерге сӱӱжигер сооп калбазын

1, 2. а) Апостол Павел бӱдӱмји, ижемји ле сӱӱш керегинде айдып тура, олордыҥ эҥ јааны сӱӱш деп нениҥ учун айткан? б) Бис кандый сурактар шӱӱжерис?

АПОСТОЛ Павел бӱдӱмји, ижемји ле сӱӱш керегинде куучындап тура, мынайда айткан: «Олордыҥ эҥ јааны — сӱӱш» (1 Кор. 13:13). Ол нениҥ учун анайып айткан? Келер ӧйдӧ јердиҥ ӱстинде рай болор деп иженгенис бӱдӱп калар. Оныҥ учун рай болор деп бӱдетени керек јок болор. Је Кудайды ла улусты оноҥ ло ары сӱӱрис. Нениҥ учун дезе сӱӱш јажын-чакка улалар.

² Биске сӱӱш јаантайын керек болордо, ӱч сурак шӱӱжип ийектер. Баштапкызы, биске бой-бойыбысты нениҥ учун сӱӱр керек? Экинчизи, ака-эјелеристи сӱӱп турганысты канайып кӧргӱзерис? Ӱчинчизи, бой-бойыбыска сӱӱжис сооп калбазын деп нени эдер керек?

БОЙ-БОЙЫБЫСТЫ НЕНИҤ УЧУН СӰӰР КЕРЕК?

3. Бисте бой-бойыбысты сӱӱйтен кандый шылтактар бар?

³ Нениҥ учун бой-бойысты сӱӱр керек? Шылтактардыҥ бирӱзи: чындык христиандардыҥ аҥылу кылык-јаҥы — ол сӱӱш. Иисус апостолдорына мынайып айткан: «Ортогордо сӱӱш болзо, слерди Мениҥ ӱренчиктерим деп, ончозы танып ийер» (Иоанн 13:35). Анайда ок сӱӱш бирликке экелет. Апостол Павел бичиген: «Сӱӱш... бириктирет» (Кол. 3:14). Је бой-бойын сӱӱйтениниҥ база бир шылтагы бар. Апостол Иоанн бойыныҥ ака-эјелерине мынайып бичиген: «Кудайды сӱӱп јӱргени, бойыныҥ карындажын да сӱӱп јӱрзин» (1 Иоанн 4:21). Бис бой-бойысты сӱӱп турзаас, Кудайды сӱӱп турганыс деп кӧргӱзип јадыс.

4, 5. Кудайды ла ака-эјелерди сӱӱгени бой-бойыла колбулу деп, кандый темнеҥ кӧрӱнет?

⁴ Кудайды ла ака-эјелерди сӱӱгени бой-бойыла колбулу деп, нениҥ учун айдарга јараар? Сананып ийзеер де, јӱрек эт-канныҥ ӧскӧ ӱйелериле кандый колбулу болот. Врач, кижиниҥ јӱреги канайып иштеп турганын билип аларга, пульсты тудуп кӧрӧт. Бу темде ле бистиҥ шӱӱжип јаткан темагыста кандый колбу бар?

⁵ Врач пульстыҥ болужыла кижиниҥ су-кадыгын билип алат. Анайып ла улуска канайып баштанып турганыстаҥ Кудайды канча кире сӱӱп турганыс кӧрӱне берер. Ака-эјелериске сӱӱжис астай берген деп ајарып ийген болзоос, Кудайга да сӱӱжис уйадай берген болор. Ака-эјелерге сӱӱжисти керектерисле кӧргӱзип турзаас, мынаҥ Кудайыска сӱӱжис бек болгоны кӧрӱнет.

6. Ака-эјелерге сӱӱжис сооп јаткан болзо, бу нени кӧргӱзет? (1 Иоанн 4:7—9, 11).

⁶ Бистиҥ сӱӱжис бой-бойыска сооп јаткан болзо, оны ајару јок артыргыспас керек. Нениҥ учун? Нениҥ учун дезе бис кӧгӱс јанынаҥ јеткерлӱ айалгада болуп каладыс! Апостол Иоанн мынайып бичиген: «Кӧрӱп турган карындажын сӱӱбей турган кижи, кӧрбӧй турган Кудайды сӱӱп болбос» (1 Иоанн 4:20, ЈТ). Биске мынаҥ кандый ӱредӱ? Бис Кудайдыҥ јарадузын, јӱк ле бой-бойысты сӱӱп турган болзоос, аларыс. (1 Иоанн 4:7—9, 11 кычырыгар.)

АКА-ЭЈЕЛЕРГЕ СӰӰЖИСТИ КАНАЙЫП КӦРГӰЗЕРИС?

7, 8. Бис ака-эјелерди сӱӱп турганысты канайып кӧргӱзер аргалу?

⁷ Кудайдыҥ Сӧзи бисти бой-бойыбысты сӱӱп турзын деп, кӧп катап кычырат (Иоанн 15:12, 17; Рим. 13:8; 1 Фес. 4:9; 1 Пётр 1:22; 1 Иоанн 4:11). Је сӱӱштиҥ јӱректе барын кем де кӧрӱп болбос. Андый болордо, ака-эјелер бистиҥ сӱӱжисти канайып кӧрӱп ийер? Бис сӱӱжисти сӧстӧрисле, керектерисле кӧргӱзер аргалу.

⁸ Аргалардыҥ кезиги: «Бой-бойыгарды тӧгӱндебегер» (Зах. 8:16). «Ортогордо амыр-энчӱ болзын» (Марк 9:50). «Улуска тоомјыгарды озо бойоор кӧргӱзигер» (Рим. 12:10, ЈТ). «Бой-бойыгарды акту-кӱӱнигердеҥ јуудып турыгар» (Рим. 15:7, ЈТ). «Акту јӱректеҥ јаманын таштагар» (Кол. 3:13, ЈТ). «Бой-бойыгардыҥ јӱктеригерди апарыжыгар» (Гал. 6:2). «Бой-бойыгарды токунадып туругар» (1 Фес. 4:18, ЈТ). «Бой-бойыгарды тыҥыдыгар» (1 Фес. 5:11). «Бой-бойыгар учун мӱргӱгер» (Иак. 5:16, ЈТ).

9. Нениҥ учун улусты токунадары сӱӱжисти кӧргӱзетен јакшы арга болот? (Јурукты база кӧрӱгер.)

⁹ Ака-эјелериске сӱӱжисти кӧргӱзетен аргалардыҥ бирӱзин кӧрӱп ийектер. Павел айткан: «Бой-бойыгарды токунадып туругар». Нениҥ учун токунадары — сӱӱжисти кӧргӱзетен сӱреен јакшы арга болот? Бир библиялык справочникте айдылганыла болзо, «токунадары» деп кӧчӱрилген сӧс, тӱбекке тӱшкен кижиниҥ јанында болорын темдектейт. Айдарда, кӱч айалгага туштаган кижини токунадып турзаас, оныҥ кӱӱнин кӧдӱредис ле Кудайга чындык артарга болужадыс. Санааркап јӱрген ака-эјелеристи кажы ла катап токунадып турзаас, олорго сӱӱжисти кӧргӱзедис (2 Кор. 7:6, 7, 13).

10. Килемји ле токунал кандый колбулу?

¹⁰ Килемји ле токунал бой-бойыла јуук колбулу болот. Ачу-коронго тӱшкен кижини бис килеп, токунадарга албаданадыс. Ӧскӧртӧ айтса, озо килеп јадыс, оноҥ токунададыс. Эмди «буурзак Аданыҥ» — Иегованыҥ темин кӧрӱп ийектер. «Учебный Библияда»: «Кудай килемјиниҥ Адазы, нениҥ учун дезе килемјини Иегова берип јат» — деп айдылат. Суузап јӱрген кижи тоҥмок суунаҥ суу ичип ийзе, сергидӱ алат. Анайып Кудай шыралап јӱрген улусты сергидип, токунадып јат. Оныҥ учун ол Агару Бичикте «кандый ла токунал береечи Кудай» деп адалат (2 Кор. 1:3, 4, ЈТ). Бис канайып Кудайга тӱҥейлежер аргалу? Улусты килеп, токунадып турар керек. Оныҥ учун килеерге ле токунадарга болужатан кылык-јаҥдарга ӱренер керек. Ол кандый кылык-јаҥдар?

11. Улусты токунадар кӱӱнис тыҥ болзын деп, биске база кандый кылык-јаҥдар керек? (Колоссыдагыларга 3:12; 1 Пётр 3:8).

¹¹ Бой-бойысты кажы ла кӱӱн токунадып турарга, биске јалакай ла килемкей болор керек. (Колоссыдагыларга 3:12; 1 Пётр 3:8 кычырыгар.) Улуска канча ла кире јалакай ла килемкей болзоос, кӱч айалгада болгон улусты токунадар кӱӱнис ончо ло кире тыҥ болор. Иисус мынайда айткан: «Кижиниҥ јӱреги неле толо, оозынаҥ чыгары ол ине. Јакшы кижи бойында јакшыны чеберлейт, оноҥ јакшы чыгат» (ЈТ) (Матф. 12:34, 35). Тӱбекке тӱшкен ака-эјелеристи токунадып турзаас, олор бистиҥ сӱӱжисти сезер.

БОЙ-БОЙЫБЫСКА СӰӰЖИС СООП КАЛБАЗЫН ДЕП НЕНИ ЭДЕР?

12. а) Биске нениҥ учун ајарыҥкай болор керек? б) Оноҥ ары нени шӱӱжерис?

¹² Бис ончобыс бой-бойыбысты сӱӱрге кӱӱнзейдис (1 Иоанн 4:7). Је биске Иисустыҥ «кӧп улустыҥ сӱӱжи соор» деп айткан сӧстӧрин ундыбас керек (Матф. 24:12). «Кӧп улустыҥ» деп айдарда, Иисус бойыныҥ ӱренчиктерин айтпаган. Је андый да болзо, бу телекейдиҥ јаҥыс ла бойын сананып турган соок кӱӱни бисте болуп калбазын деп, ајарыҥкай болор керек. Ӧрӧги айдылганын ајаруга алып, бистиҥ ака-эјелериске сӱӱжис канча кире тыҥ болгонын билип аларга јараар ба? Мыны шӱӱжип ийектер.

13. Ака-эјелерди канча кире тыҥ сӱӱп турганысты канайып шиҥдеп кӧрӧр?

¹³ Сӱӱжисти шиҥдеп кӧрӧтӧн аргалардыҥ бирӱзи — јӱрӱмниҥ башка-башка айалгаларында бойысты канайып тудунып турарын кӧрӧри (2 Кор. 8:8). Темдектезе, апостол Пётр бичиген: «Элдеҥ озо бой-бойыгарды тыҥ сӱӱп јӱригер, нениҥ учун дезе сӱӱш кӧп кинчектерди таштаттырып јат» (ЈТ) (1 Пётр 4:8). Ака-эјелер јастырып, ол эмезе бисти ачындырып турза, бойысты канайып тудунып турганыстаҥ олорды канча кире тыҥ сӱӱп турганыс кӧрӱнет.

14. 1 Пётр 4:8-ле болзо, ака-эјелерди канайып сӱӱр керек? Тем куучындап беригер.

¹⁴ Пётрдыҥ бу сӧстӧрин тереҥжиде шиҥдеп ийектер. 8-чи ӱлгердиҥ бажында бис бой-бойыбысты «тыҥ» сӱӱр учурлу деп айдылат. «Тыҥ» деп кӧчӱрилген сӧс «чӧйӧрин» темдектейт. Ӱлгердиҥ экинчи бӧлӱгинде андый сӱӱш неге экелип турганы бичилет,— ол ака-эјелердиҥ јаманын таштайт. Мындый неме сананып ийзеер де, слер сӱӱжеерди эки колоорло алып, оны чӧйилип турган бӧс чилеп там ла там јаанада чӧйӧ тартып јадаар. Слер оны бир-эки эмес, је кӧп кинчектер бӧктӧлгӧнчӧ, чӧйӧ тартып јадаар. Бӧслӧ кандый бир кирлӱ јерди бӧктӧп саларга јараар, анайып ла сӱӱш ӧскӧ улустыҥ јастыраларын эмезе једикпестерин бӧктӧп салат.

15. Тыҥ сӱӱш бисти неге кӱӱнзедет? (Колоссыдагыларга 3:13).

¹⁵ Тыҥ сӱӱш ака-эјелердиҥ јастыраларын, јеҥил эмес те болзо, таштаарга болужат. (Колоссыдагыларга 3:13 кычырыгар.) Бис улустыҥ јаманын таштап турган болзоос, сӱӱжистиҥ бек болгонын кӧргӱзедис. Анайып Иегованы сӱӱндирип јадыс. Је ака-эјелердиҥ јастыраларына кыртыштанбаска биске база не болужар?

16, 17. Слерге улустыҥ кичинек јастыраларына ајару этпеске не болужар? Тем куучындап беригер. (Јурукты база кӧрӱгер.)

¹⁶ Ака-эјелердиҥ јастыразын эмес, је јакшы јанын кӧрӧргӧ албаданаар. Тӱҥдештирӱ эдип ийектер. Слер најылараарла кожо јуулыжала, сӱӱнчилӱ ӧй ӧткӱредеер, оноҥ учында ончогор селфи эдип јадаар. Слер ӱч фото эдедеер, нениҥ учун дезе кандый бир фото јаман чыгардаҥ айабас. Оноҥ чын ла, баштапкы фотодо ака јаман чыгып калтыр. Слер оны јоголтып јадаар, нениҥ учун дезе ол арткан эки фотодо ончолоры, ол тоодо ака да, јакшы чыгып калган.

¹⁷ Мындый фотолорды јӱрӱмисте болгон учуралдарла тӱҥдештирерге јараар. Биске кӧп сабада ака-эјелерле ӧй ӧткӱрерге јарап јат. Је олордыҥ та кемизи де биске јарабай турган та нени де айдып эмезе эдип ийзе, бис канайдарыс? Ол фотоны јоголтконы чылап, јаман учуралдарды сагыштаҥ не јоголтып салбас? (Укаа 19:11; Эф. 4:32). Биске ака-эјелердиҥ бир кичинек јастыраларын сананардыҥ ордына, олорло болгон јакшы учуралдарды сананза торт эмес пе? Андый учуралдарды бис баалаарга кӱӱнзейдис!

НЕНИҤ УЧУН БӰГӰНГИ КӰНДЕ СӰӰШ СӰРЕЕН КЕРЕКТӰ БОЛОТ?

18. Бу јӧрмӧлдӧҥ сӱӱш керегинде бис нени билип алдыс?

¹⁸ Биске бой-бойысты нениҥ учун сӱӱр керек? Бу јӧрмӧлдӧ шӱӱшкенисле болзо, ака-эјелерди сӱӱп турганыстаҥ Иегованы сӱӱп турганыс кӧрӱнет. Сӱӱжисти керектерисле канайып кӧргӱзерис? Аргалардыҥ бирӱзи — ака-эјелерди токунадары. Бистиҥ јӱрегисте килемји болзо, бис бой-бойысты токунадар аргалу болодыс. Је бистиҥ сӱӱжис сооп калбазын деп нени эдер керек? Ӧскӧ улустыҥ јастыраларын, јеҥил эмес те болзо, таштап турар керек.

19. Нениҥ учун бӱгӱнги кӱнде биске бой-бойысты сӱӱр керек?

¹⁹ Бӱгӱнги кӱнде бой-бойын сӱӱри нениҥ учун сӱреен керектӱ болот? Пётр мынайып айткан: «Ончозыныҥ учы јуук». Оныҥ учун ол христиандарды: «Бой-бойыгарды тыҥ сӱӱп јӱригер» (ЈТ) — деп кӱӱнзеткен (1 Пётр 4:7, 8). Бис бу калју телекейдиҥ учында јададыс. Оныҥ учун нени сакыырыс? Иисус озолондыра айдып салган: «Слерди Мениҥ адым учун ончо калыктар јаман кӧрӧр» (Матф. 24:9). Мыны ӱзе чыдажып ӧдӧргӧ, биске бирлик болгоныс болужар. Ол тушта Сатана ака-эјелердиҥ ортозына блааш-тартыш, ӧӧн-бӧкӧн эдип болбос. Нениҥ учун дезе бисти сӱӱш бириктирип јат (Кол. 3:14, сноска; Флп. 2:1, 2).