Бис нениҥ учун курултайлар ӧткӱредис?

Бу јуруктагы улустыҥ јӱзи нениҥ учун сӱӱнчилӱ? Нениҥ учун дезе олор бистиҥ курултайда јуулышкан. Озогы ӧйлӧрдӧ Кудайдыҥ ишчилери бир јылдыҥ туркунына ӱч катап кожо јуулыжып турар учурлу болгон (Јаҥды такыганы 16:16). Бис бӱгӱнги кӱнде база кӧп улус јуулыжар арганы сакыйдыс. Бистерде кажы ла јыл јаан учурлу ӱч туштажу болуп јат: бир кӱн болуп турган эки аймак курултай ла ӱч кӱнниҥ туркунына болотон регионныҥ курултайы. Бис бу туштажуларды нениҥ учун баалап јадыбыс?

Курултайлар бистиҥ христиан карындаштыкты тыҥыдат. Јебрен израиль калык «кӧп улусту јуундарда» Иегова Кудайды сӱӱнип мактап туратан, анайып ла бӱгӱнги кӱнде Кудайга кожо бажырарга, аҥылу учуралдарда база јуулыжып јадыбыс (Сарын 26:12; 111:1). Мындый туштажуларда бисте ӧскӧ јуундардыҥ керек дезе ӧскӧ ороондордыҥ Керечилериле таныжып алар арга бар. Тыштанар ӧйдӧ айылдарыстӧӧн јанып барбай, улусла кожо чайлап куучындажарга артадыс. Мынаҥ улам бистиҥ ич-кӧгӱс байрамдарыста најылык амыр болот (Апостолдордыҥ ижи 2:42). Бистиҥ курултайларда бастыра телекейлик карындаштыкты бириктирип турган сӱӱшти бойыстыҥ кӧзисле кӧрӧдис (Петрдыҥ 1-кы самаразы 2:17).

Курултайлар бистиҥ ич-кӧгӱс ӧзӱмиске болужат. Израиль калык Кудайдыҥ јасактарыныҥ јартамалын угарга, кожо јуулыжатан болгон (Неемия 8:8, 12). Бис туштажуларыстаҥ алып турган библиялык таскадуны база баалап јадыбыс. Кажы ла курултайдыҥ темазы Агару Бичикке тӧзӧлӧнгӧн. Јилбилӱ куучын-эрмектер ле кӧргӱзӱлер, бисти Агару Бичиктиҥ принциптерин јӱрӱмисте тузаланарга ӱредет. Бу кӱч ӧйлӧрдӧ христиан јӱрӱмде болуп турган кӱчтерди ӧдӱп турган улустыҥ теми бистиҥ кӱӱнисти кӧдӱрет. Регионныҥ курултайында болуп турган театрализованный тургузулар бистерге библиялык учуралдарды јарт эске алынып кӧрӧргӧ лӧ ӱредӱ аларга болужат. Кажы ла курултайда Иегова Кудайга учурлангандар сууга чӧҥӱрилип јат.

• Курултайлар нениҥ учун јаан сӱӱнчи экелет?

• Слер курултайдаҥ кандый туза аларар?