Ио́сия јакшы најыларлу болгон

Јаантайын чын керектер эдерге јеҥил бе?~ Кӧп улус јеҥил эмес деп сананат. Чын керектер эдерге, анчада ла Иосия деген уулчакка, јеҥил эмес болгоны керегинде Агару Бичикте айдылып јат. Је ондо, ого болужып туратан јакшы најылар болгон. Эмди, Иосия ла оныҥ најыларыла јууктада таныжып алак.

Оныҥ адазы Амо́н — иудей јериниҥ кааны болгон, ол коркышту јаман керектер эдип, чалуларга бажырган. Амон божоп каларда, каан болуп, оныҥ ордына Иосия отурды. Ол тушта ого јӱк ле сегис јаш болгон! Иосия адазы чылап јаман кижи болуп калды ба? Сен канайып сананып туруҥ?~ Јок, андый эмес!

Иосия кичинек те тужында Иеговага уккур болорго јаантайын албаданган. Оныҥ учун ол најыларды јӱк ле Иегованы сӱӱп турган улустаҥ талдаган. Олор Иосияга чын керектер эдерге болушкан. Оныҥ најылары кемдер?

Најыларыныҥ бирӱзи — Софо́ния. Ол судурчы болгон. Ол Иу́даныҥ албатызына, чалуларга бажыратан болзо, олорды тӱбек табарар деп, озолодо айдып турган. Иосия Софонияны угуп, чалуларга бажырбай, Иеговага бажыратан.

Анайда ок Иосия Иеремияла најылашкан. Олордыҥ јаштары кура болгон ло олор бала тужында бой-бойынаҥ ыраак эмес јаткан. Олор сӱреен јуук најылажып јӱретен. Кийнинде Иосия божоп каларда Иеремия ого кожоҥ чӱмдеди. Ол кожоҥдо Иеремия оны тыҥ јоктоп кунукканы керегинде айдылган. Иеремия ла Иосия чын керектер эдерге ле Иеговага уккур болорго бой-бойына болушкан.

Бис Иосияныҥ теминеҥ неге ӱренер аргалу?~ Иосия кичинек бала да тужында јаантайын чын керектер эдерге албаданатан. Ол, јӱк ле Иегованы сӱӱп турган улусла најылажары јаан учурлу деп, билер болгон. Сен база, најыларды Иегованы сӱӱп турган улустаҥ талдаарга албадан. Олор сеге јаантайын чын керектер эдерге болужын јетирер!