15 БАЖАЛЫК
Кудайга кандый бажырыш јарап јат?
1. Кудайга кандый бажырыш јарап турганын кем айдып берер аргалу?
КУДАЙ ЈАҤДАРДЫҤ кӧп сабазы Кудай керегинде чынды ӱредедис деп айдат. Је мынайып болор аргазы јок, нениҥ учун дезе кажы ла кудай јаҥныҥ ӱредӱзи башка болот. Айдарда, Кудай керегинде чынды ла ого кандый бажырыш јарап турганын кайдаҥ билип аларга јараар? Мыныҥ каруузын јӱк ле Иегова Кудай бойы берер аргалу.
2. Кудайга кандый бажырыш јарап турганын кайдаҥ билип аларга јараар?
2 Кудай биске, ого кандый бажырыш јарап турганын билип алзын деп, Агару Бичик берген. Оныҥ учун оны оноҥ ло ары шиҥдеер керек. Кудай слерге Агару Бичиктеги ӱредӱлерди оҥдоорго болужар, не дезе, слерди сӱӱп јат ла слердиҥ јӱрӱмеер јакшы болзын деп кӱӱнзеп јат (Исаия 48:17).
3. Кудай бисти нени этсин деп кӱӱнзейт?
3 Кезик улус Кудай ончо кудай јаҥдарды јарадып турган деп айдыжат. Је Иисус Христос мынайып сананбаган. Ол айткан: «„Кайракан! Кайракан!“ — деп айдып турган кандый ла кижи Теҥери Каандыгына кирер эмес, Теҥеридеги Адамныҥ табын бӱдӱрип јӱргени кирер». Оныҥ учун биске Кудайдыҥ табы неде болгонын билип алала, оны бӱдӱрер керек. Бу јаан учурлу сурак, не дезе, Кудайдыҥ табын бӱдӱрбей тургандарды Иисус «јаман кылынып јӱргендер» ол эмезе каршулу керек эдип тургандар деп айткан (Матфей 7:21—23).
4. Иисус Кудайдыҥ табын бӱдӱрери керегинде нени айткан?
4 Иисус, Кудайдыҥ табын бӱдӱрерге јеҥил болбос деп, айдып салган: «Тапчы эжиктеҥ киригер, нениҥ учун дезе ӧлӱмге кийдирер эжик кеҥ, јолы элбек; кӧп улус ол јолло барат. Јӱрӱмге кирер эжик тапчы, јолы чичке; оны табары ас» (Матфей 7:13, 14). Чичке јол, ӧскӧртӧ айтса Кудайга чын бажырар јол, ӱргӱлји јӱрӱмге апарат, а элбек јол, ӧскӧртӧ айтса Кудайга јастыра бажырар јол, ӧлӱмге апарат. Је Иегова бистердиҥ кемибисти де ӧлӱп калзын деп кӱӱнзебей јат. Оныҥ учун бистиҥ кажыбыска ла ол керегинде билип алар арга берет (2 Петр 3:9).
КУДАЙГА ЈАРАП ТУРГАН БАЖЫРЫШ
5. Кудайга чын бажырып тургандарды канайып танып ийерге јараар?
5 Иисус, Кудайга чын бажырып тургандарды олордыҥ керектеринеҥ ле ӱредӱлеринеҥ танып ийерге јараар деп айткан. «Олорды бӱткен јиилегинеҥ таныырыгар» — деп айдып,— «Јакшы агаштаҥ јакшы јиилек бӱдетен» — деп кожуп айткан (Матфей 7:16, 17). Иисустыҥ сӧстӧри Кудайга бажырып тургандар качан да јастырбас деп темдектебей јат. Је олор Кудайдыҥ сӧзиле јӱрерге албаданат. Кудайга чын бажырып тургандарды канайып танып ийерин кӧрӱп ийектер.
6, 7. Кудайга бажырары нениҥ учун Агару Бичикке тӧзӧлӧнӧр учурлу? Иисустыҥ теми бисти неге ӱредет?
6 Олордыҥ ӱредӱлери Агару Бичикке тӧзӧлӧнӧт. Агару Бичикте айдылат: «Ончо Агару Бичик Кудайдыҥ Тыныла берилген. Ол улусты ӱредерге, кинчекти илезине чыгарарга, јӱрӱмди тӱзедерге, акту эдип таскадарга тузалу. Кандый ла быйанду керекти эдерге јепселген болзын деп, Кудайдыҥ кижизи белен болзын» (2 Тимофейге 3:16, 17). Элчи Павел христиандарга бичиген: «Бистеҥ Кудайдыҥ сӧзин угала, јараткан эдигер; оны кижиниҥ сӧзин чилеп эмес, је Кудайдыҥ сӧзин чилеп јараттыгар» (1 Фессалоникадагыларга 2:13). Кудайга бажырары улустыҥ санаа-шӱӱлтезине, чӱм-јаҥдарына эмезе база та неге де эмес, је јӱк ле Кудайдыҥ Сӧзине, Агару Бичикке, тӧзӧлӧнӧр учурлу.
7 Иисустыҥ ончо ӱредӱлери Кудайдыҥ Сӧзине тӧзӧлӧнгӧн. (Иоанн 17:17 кычырыгар.) Ол ӱредип турарда, јаантайын Агару Бичимелдиҥ шӱӱлтелерин тузаланып туратан (Матфей 4:4, 7, 10). Оныҥ учун Кудайдыҥ чындык ишчилери Иисустаҥ тем алып, јӱк ле Агару Бичикке тӧзӧлӧнип ӱредет.
8. Кудайга бажырары јанынаҥ Иисус неге ӱреткен?
8 Олор сок јаҥыс чындык Иегова Кудайга бажырат. Сарын 83:18-те айдылат: «Сен, адыҥ сениҥ Иегова, јердиҥ ӱстинде јаҥыс сен Эҥ Бийик Кудай» (Сарын 83:18). Иисус Христос улусты сок јаҥыс чын Кудайды билзин деп, олорго оныҥ адын ачкан. (Иоанн 17:6 кычырыгар.) Иисус айткан: «Сениҥ [Иегова, ЈТ] Кудайыҥа, бажыр, јаҥыс Ого јалчы бол» (Матфей 4:10). Оныҥ учун Кудайдыҥ ишчилери Иисус ла чылап јӱк ле Иеговага бажырат ла Кудайга адыла баштанат. Олор Кудайдыҥ ады керегинде куучындап, келер ӧйдӧ Кудай улуска нени эдерине ајару эдет.
9, 10. Кудайдыҥ ишчилери бой-бойын канайып сӱӱп јат?
9 Олор бой-бойын чыннаҥ ла сӱӱп јат. Иисус бойыныҥ ӱренчиктерин бой-бойын сӱӱрине ӱреткен. (Иоанн 13:35 кычырыгар.) Оныҥ учун Кудайдыҥ ишчилери ака-эјелериниҥ чыккан-ӧскӧнине, культуразына, байы-јоктузына кӧрбӧй јат. Олор бой-бойлорын ака-карындаштый, эје-сыйындый сӱӱп јадылар (Колоссыдагыларга 3:14). Оныҥ да учун олор јуу-согушка барбай јат ла кижи ӧлтӱрбей јат. Агару Бичикте мынайып айдылат: «Кудайдыҥ балдары ла кӧрмӧстиҥ балдары мынайда танылып јат: чынды этпей, карындажын сӱӱбей турган не ле кижи Кудайдаҥ эмес». Анайда ок: «Бис бой-бойыбысты сӱӱр учурлу. Јаманга баштадып, бойыныҥ карындажын ӧлтӱрген Каиндий болбогор» — деп айдылат (1 Иоанн 3:10—12; 4:20, 21, ЈК 2003).
10 Кудайдыҥ чындык ишчилери бойы-бойына болужарга, ийде-кӱчин ле акча-манадын кородорго белен (Еврейлерге 10:24, 25). Олор ончо улуска болужып јат (Галаттарга 6:10).
11. Аргаданыш нениҥ учун јӱк ле Иисус Христос ажыра болор деп бӱдер керек?
11 Олор Иисус Христоско сӧсуккур болот, не дезе, аргаданыш јӱк ле ол ажыра болор. Агару Бичикте айдылат: «Ӧскӧ кем де аргадап болбос, нениҥ учун дезе улуска берилген, бис аргаданар ӧскӧ ат-јол теҥери алдында јок» (Апостолдордыҥ ижи 4:12, ЈК 2003). Бу бичиктиҥ 5-чи бажалыгынаҥ Иегова Иисусты јердӧӧн аткарган деп билип алганыс. Анайып Иисус бойыныҥ јӱрӱмин Кудайга сӧсуккур улус учун толынты эдип берген (Матфей 20:28). Анайда ок Иегова Иисусты јерле башкарзын деп кӧстӧгӧн. Оныҥ учун бис ӱргӱлјиге јӱрерге турган болзоос, Иисуска багынар учурлу. (Иоанн 3:36 кычырыгар.)
12. Кудайдыҥ ишчилери нениҥ учун политикага киришпей јат?
12 Олор политикага киришпей јат. Иисус Христос политикага киришпеген. Ол јаргы тужында, Римниҥ башкараачызына, Пилатка, мынайып айткан: «Мениҥ Каандыгым бу телекейдеҥ эмес». (Иоанн 18:36 кычырыгар.) Анайып ла Кудайдыҥ ишчилери, Христос чылап, Кудайдыҥ Каандыгына чындык артат. Оныҥ учун олор кайда да јадып турза, политикага киришпей јат. Је олор бойыныҥ орооныныҥ јасагына багынат, не дезе, Агару Бичикте «јаҥдарга», ол эмезе башкаруларга, багынар керек деп айдылат (Римдегилерге 13:1, ЈК 2003). Јаҥдардыҥ кандый бир јасагы Кудайдыҥ јасагына буудак болуп турза, Кудайдыҥ ишчилери элчилер чилеп, «Кудайга улустаҥ артык багар керек» дегенин бӱдӱрет (Апостолдордыҥ ижи 5:29; Марк 12:17).
13. Кудайдыҥ чындык ишчилери не керегинде јарлап јат?
13 Олор улустыҥ бастыра кӱчтериниҥ аайына јӱк ле Кудайдыҥ Каандыгы чыгар деп бӱдӱп јат. Иисус бастыра телекейде «Каандык керегинде Сӱӱнчилӱ Јар» јарлалар деп айткан. (Матфей 24:14 кычырыгар.) Кудайдыҥ Каандыгыныҥ берерге турган алкыштарын, кандый да башкару берип болбос (Сарын 146:3). Иисус бу Каандык керегинде мынайып мӱргӱзин деп јакарган: «Каандыгыҥ Сениҥ келзин. Канайып теҥериде, анайып јерде де табыҥ Сениҥ болзын» (Матфей 6:10). Агару Бичикте, Кудайдыҥ Каандыгы бастыра башкаруларды јоголтып, «бойы ӱргӱлјиге турар» деп судурлалып калган (Даниил 2:44).
14. Слердиҥ санаагарла, кемдер Кудайга чын бажырып јат?
14 Айдарда, кемдерди Кудайга чын бажырып турган деп айдарга јараар: кемниҥ ӱредӱлери Агару Бичикке тӧзӧлӧнип јат? Кудайдыҥ ады керегинде улуска кемдер куучындап јат? Кемдер бой-бойын чыннаҥ ла сӱӱп јат? Аргаданыш јӱк ле Иисус Христос ажыра болор деп, кемдер бӱдӱп јат? Политикага кемдер киришпей јат? Улустыҥ бастыра кӱчтериниҥ аайына јӱк ле Кудайдыҥ Каандыгы чыгар деп, кемдер јарлап јат? Иегованыҥ Керечилери (Исаия 43:10—12).
СЛЕР НЕНИ ЭДЕРИГЕР?
15. Кудайга бистиҥ бажырыш јарап турзын деп, нени эдер керек?
15 Кудай бар деп бӱткениле болорзынбас керек. Кӧрмӧстӧр дӧ Кудай бар деп бӱдӱп јат, је олор Кудайдыҥ сӧзин укпай јат (Иаков 2:19). Кудайга бистиҥ бажырыш јарап турзын деп, ол бар деп јӱк ле бӱдер керек эмес, је оныҥ сӧзин бӱдӱрер керек.
16. Бисте нениҥ учун тӧгӱн кудай јаҥла кандый да колбу болбос учурлу?
16 Кудай бистиҥ бажырып турганысты јаратсын деп турган болзоос, бисте тӧгӱн кудай јаҥдарла кандый да колбу болбос учурлу. Судурчы Исаия бичиген: «Анаҥ чыгыгар... бойыгарды ару тудыгар» (Исаия 52:11; 2 Коринфтегилерге 6:17). Оныҥ учун тӧгӱн кудай јаҥла колбулу ончо не-неменеҥ айрылар керек.
17, 18. «Улу Вавилон» ол не? Нениҥ учун оноҥ тӱрген чыгар керек?
17 Кандый кудай јаҥды тӧгӱн деп айдарга јараар? Ӱредӱзи Кудайдыҥ Сӧзине тӧзӧлӧнбӧй турган кудай јаҥды. Агару Бичик бастыра тӧгӱн кудай јаҥдарды «Улу Вавилон» деп адап јат (Ачылта 17:5). Нениҥ учун? Чайыктыҥ кийнинде Вавилон калада коркышту кӧп јастыра ӱредӱлер табылып, бастыра јердиҥ ӱстине таркап, тӧгӱн кудай јаҥдардыҥ ӱредӱлери болуп калган. Темдектезе, Вавилондо јаткан улус ӱч кудайдаҥ турган кудайларга бажырган. Бӱгӱнги кӱнде кӧп кудай јаҥдар Кудайды — Ӱчӱлик деп бӱткилейт. Је Агару Бичикте јӱк ле бир Кудай бар деп јарт айдылат — ол Иегова. Иисус Христос дезе — оныҥ Уулы болот (Иоанн 17:3). Анайда ок Вавилонныҥ улузы кижиде сӱне бар деп бӱткен. Олордыҥ санаазыла болзо, кижи божозо, оныҥ сӱнези оноҥ ары јӱрӱп, кийнинде таамыга (ад) барардаҥ айабас. Је бу тӧгӱн ӱредӱ. (14, 17 Кожултаны кӧрӱгер.)
18 Кудай бастыра тӧгӱн кудай јаҥдар удабас јоголтылар деп сӧзин берген (Ачылта 18:8). Оныҥ учун тӧгӱн кудай јаҥнаҥ тӱрген чыгар керек. Иегова слерди эмди ле, ӧй бар тушта, чыксын деп кӱӱнзеп јат (Ачылта 18:4).
Иеговага иштеп баштазаар, слер нак ла јаан билениҥ тоозына киреригер
19. Иеговага бажырарга сананып алзаар, ол слерге кандый алкыштар берер?
19 Слер тӧгӱн кудай јаҥнаҥ чыгып, Иеговага бажырарга сананып алзагар, нӧкӧрлӧрӧӧрдиҥ эмезе јуук улузыгардыҥ та кемизи де слерди оҥдобой, керек дезе слерге удурлажып баштаардаҥ айабас. Је Иегова слерди таштабас. Кудайга иштеп баштазаар, слер бой-бойын сӱӱп турган јӱзӱн-башка укту миллиондор тоолу ака-эјелердеҥ турган билеге киреригер. Анайда ок слерде Кудай берерге турган јаҥы телекейде ӱргӱлјиге јӱретен ижемји болор (Марк 10:28—30). Иеговага иштеерге слерге озо баштап удурлашкан јуук улузаардыҥ бир-бирӱзи, соондо Агару Бичикти ӱренерге кӱӱнзеер болор.
20. Иеговага нениҥ учун эмди ле иштеп баштаар керек?
20 Кудай удабас ла бастыра јаманды јоголтып салза, оныҥ Каандыгы бастыра јерле башкарып баштаар (2 Петр 3:9, 13). Бис бу ӧйди энчикпей сакып јадыс, не дезе, ол тушта бастыра улус Иеговага оныҥ табы аайынча бажырар. Иеговага эмди ле иштеп баштагар.