Балдараар чыдап келеле, Кудайга иштеер бе?

1. Кандый јӧп эҥ ойгор болот?

АДА-ЭНЕЛЕРДИҤ чыгарган јӧбинеҥ балдарыныҥ јӱрӱми камаанду болуп јат. Олор јастыра јӧп чыгарза, балдарында уур-кӱчтер болот. А ойгор јӧптӧр чыгарза, балдарыныҥ јӱрӱми ырысту болуп јат. Је балдар бойлоры да ойгор јӧптӧр чыгарар учурлу. А кажы ла кижиниҥ чыгарган эҥ ойгор јӧби — теҥеридеги сӱӱштӱ Иегова Адабыска иштеери болуп јат (Сар. 73:28).

2. Иисус ла оныҥ ада-энези кандый јӧптӧр чыгарган?

² Иосиф ле Мария Иисуска ла арткан балдарына Иеговага иштезин деп болужарга тыҥ кӱӱнзеген. Олордыҥ чыгарган јӧптӧринеҥ Иеговага иштеерин олор баалаган деп кӧрӱнет (Лука 2:40, 41, 52). Иисус та ойгор јӧптӧр чыгарган, бу јӧптӧр ого Иегованыҥ берген јакылтазын бӱдӱрерге болушкан (Матф. 4:1—10). Анайып ол јалакай, јалтанбас ла Кудайга чындык кижи болуп чыдаган. Иегованы сӱӱп турган бастыра ада-энелер андый уулына сӱӱнер ле оморкоор эди.

3. Бис бу јӧрмӧлдӧ кандый сурактарды шӱӱжип кӧрӧрис?

³ Бис бу јӧрмӧлдӧ мындый сурактарды шӱӱп сананарыс: Иегова Иисус јанынаҥ кандый јӧптӧр чыгарган? Христиан ада-энелер Иосифтиҥ ле Марияныҥ теминеҥ неге ӱренер аргалу? Јиит христиандар Иисустыҥ теминеҥ неге ӱренер аргалу?

ИЕГОВАНАҤ ӰРЕНИГЕР

4. Иегова Уулы јанынаҥ кандый учурлу јӧп чыгарган?

⁴ Иегова Иисуска сӱреен јакшы ада-эне талдаган (Матф. 1:18—23; Лука 1:26—38). Мария Кудайды ла оныҥ Сӧзин тыҥ сӱӱген. Бис оны Агару Бичиктеҥ оныҥ акту јӱрегинеҥ бичилген сӧстӧринеҥ кӧрӧдис (Лука 1:46—55). Иосифтиҥ Кудайга сӱӱжин ле ого сӧсуккурын Иегованыҥ јакарузын канайып бӱдӱргенинеҥ кӧрӧдис (Матф. 1:24).

5, 6. Иисустыҥ јӱрӱминде кандый кӱчтер болгон?

⁵ Иегованыҥ Иисуска талдаган ада-энези аргалу-чакту улус болбогон. Мыны бис Иисус чыгарда, Иосифтиҥ ле Марияныҥ ӧргӧӧгӧ экелген тайылгазынаҥ билип аладыс (Лука 2:24). Назаретте, Иосифтиҥ айылыныҥ јанында, узанатан бир кичинек тура болгон болор. Олордо, байла, кӧп акча-јӧӧжӧ болбогон, нениҥ учун дезе олордыҥ билезинде јети бала болгон (Матф. 13:55, 56).

⁶ Иегова Иисусты јеткердеҥ корулап туратан. Је кӱчтер ондо тӱҥей ле болгон (Матф. 2:13—15). Темдектезе, јууктары оны Мессия деп бӱтпеген. Мынаҥ улам Иисуска јаман болгон болор (Марк 3:21; Иоанн 7:5). Анайда ок ол ӧй адазыныҥ, Иосифтиҥ, божогонын кӧргӧн. Иисуска билениҥ јаан уулы болуп, Адазыныҥ эткен ижин улалтарга келишкен (Марк 6:3). Ол биледеги улузын кичеерге, кӧп иштеген, оныҥ учун тыҥ арып туратан.

7. а) Ада-энелерге балдарды таскадарга бойлорына кандый сурактар берер керек? б) Укаа сӧстӧр 2:1—6-ла болзо, ада-энелерге балдарын неге ӱредер керек?

⁷ Слер эш-нӧкӧрӧӧрлӧ балалу болорго турган болзоор, бойыгардаҥ сурагар: «Иегова бисти баланы кичеер јобош ло кӧгӱс кӧрӱмдӱ улус деп кӧрӧт пӧ?» (Сар. 127:3, 4). А балдарлу болзоор, мындый сурактар беригер: «Балдарымды ишке ӱредедим бе? Олорды Сатананыҥ телекейиндеги јеткердеҥ јакшы корулайдым ба?» (Эккл. 3:12, 13; Укаа 22:3). Слер балдараарды јӱрӱминде болотон бастыра кӱчтердеҥ корулап болбозоор. Је андый да болзо, слер олорды Кудайдыҥ Сӧзиндеги јӧптӧрди тузаланарга ӱредип, јӱрӱмниҥ кӱчтерине белетеп салар аргалу. (Укаа сӧстӧр 2:1—6 кычырыгарb.) Темдектезе, тӧрӧӧнӧр чындыкты артыргызып салган болзо, балагарга Кудайдыҥ Сӧзин тузаланып, Кудайга нениҥ учун оноҥ ло ары чындык артар керек деп јартап беригер (Сар. 31:23). Эмезе јууктарыгардаҥ кем-кем божогон болзо, тыҥ санааркабаска Агару Бичик канайып болужарын кӧргӱзип береер (2 Кор. 1:3, 4; 2 Тим. 3:16).

ИОСИФТЕҤ ЛЕ МАРИЯНАҤ ӰРЕНИГЕР

8. Јаҥды такыганы 6:6, 7-ле болзо, Иосифке ле Марияга нени эдер керек болгон?

⁸ Иисус Иегованыҥ јарадузына тургадый кижи болуп чыдаган. Нениҥ учун дезе Иосиф ле Мария оны Иегованыҥ јакарузы аайынча таскаткан. (Јаҥды такыганы 6:6, 7 кычырыгарc.) Олор Иегованы тыҥ сӱӱген, анайда ок балдары да теҥеридеги Адазын тыҥ сӱӱзин деп, кӱӱнзегендер.

9. Иосиф ле Мария билезиниҥ кӧгӱзи бек болзын деп нени эткен?

⁹ Иосиф ле Мария балдарыла кожо Иеговага бажырарыла колбулу керектерди јаантайын эдетен. Олор кажы ла неделеде Назареттеги синагогага ла јылда бир катап Иерусалимдӧӧн Пасханы байрамдаарга барар болгон (Лука 2:41; 4:16). Иерусалимдӧӧн барып јадала, Агару Бичимелде айдылган јерлерди ӧдӱп, балдарына Иегованыҥ албатызыныҥ тӱӱкизин куучындаган болор. Балдар чыдаган сайын кӧгӱс керектерге ӧй табарга јеҥил эмес болгон. Је олордыҥ албаданганы калас болбогон. Иеговага бажырарын баштапкы јерге тургусканынаҥ улам, билези кӧгӱс јанынаҥ бек арткан.

10. Христиан ада-энелер Иосифтеҥ ле Мариянаҥ неге ӱренер аргалу?

¹⁰ Христиан ада-энелер Иосифтеҥ ле Мариянаҥ неге ӱренер аргалу? Озо баштап, Иегованы тыҥ сӱӱп турганаарды балдараарга эдип турган керектереерле, айдып турган сӧстӧрӧӧрлӧ кӧргӱзигер. Балдараарга Иегованы сӱӱрге болужары эҥ ле баалу сый болуп јат. Слердиҥ болужаардаҥ улам, балдараар кӧгӱс керектерди, темдектезе: Агару Бичик ӱренерин, мӱргӱӱрин, јуунныҥ туштажуларына јӱрерин ле јарлаарын баалап турарга ӱренип алар (1 Тим. 6:6). Анайда ок слерге балдараарды азыраар ла кийиндирер керек (1 Тим. 5:8). Је ундыбагар: олорго калју телекейдиҥ јоголтыларын ӧдӧргӧ лӧ јаҥы телекейде јадарга акча-јӧӧжӧ эмес, је Кудайла јуук колбулары болужар (Иез. 7:19; 1 Тим. 4:8)d.

11. а) 1 Тимофейге 6:17—19-гы сӧстӧр ада-энелерге ойгор јӧптӧр чыгарарга канайып болужат? б) Слердиҥ билегер кандый амадулар тургузар аргалу ла бу учун слерге кандый алкыштар берилер? («Кандый амадулар тургузарга јараар?» деген рамканы кӧрӱгер.)

¹¹ Христиан јуундарда ойгор јӧптӧр чыгарып, балдарына Иеговала колбуларын тыҥыдарга болужып турган кӧп ада-энелер барына тыҥ сӱӱнип јадыс. Бу билелер Иеговага јаантайын кожо иштеп јадылар. Олор јуунныҥ туштажуларына ла курултайларга јӱрет, Каандык керегинде јарлап јат, кезиктери дезе ас јарлалып турган јерлерде јарлап јадылар. Кезикте олор Бет-Элге барат ла теократиялык туралар тударында туружат. Мындый керектерле колбой акча керек болуп јат эмезе база ӧскӧ кӱчтер болот. Је бу учун Иегова андый билелерге јаан алкыжын јетирет. (1 Тимофейге 6:17—19 кычырыгар.) Андый билелердиҥ балдары чыдап келеле, кӧгӱс керектерди оноҥ ло ары эдип, ада-энелери олорды анайып чыдадып салганына сӱӱнип јӱрет! (Укаа 10:22)e.

ИИСУСТАҤ ӰРЕНИГЕР

12. Иисуска чыдап келеле, нени эдер керек болгон?

¹² Иегованыҥ, анайда ок Иосифтиҥ ле Марияныҥ чыгарган ойгор јӧптӧри Иисуска туза јетирген. Је чыдап келеле, Иисуска талдашты бойына эдер керек болгон (Гал. 6:5). Биске ле чилеп, Иегова ого јайым кӱӱн берип салган. Иисус јӱк бойын сананып јӱрер аргалу болгон, је ол Иегованыҥ табын бӱдӱрер деп јӧп чыгарган (Иоанн 8:29). Оныҥ теминеҥ јиит христиандар неге ӱренер аргалу?

13. Иисус јиит тужында кандый јӧптӧр чыгарган?

¹³ Иисус јердеги ада-энезине сӧсуккур болгон. Ол ада-энезине кӧрӧ, кӧпти билер ле олордо оны ӱредетен јаҥ јок деп, бир де сананбаган. Агару Бичикте Иисус «олорго сӧсуккур јӱрди» деп айдылат (Лука 2:51). Иисус биледе балдардыҥ јааны болуп, бойыныҥ молјуларын јакшы бӱдӱрген деп, бис алаҥзыбай јадыс. Ол билезин јеткилдеерге, ӧй адазыныҥ узанар ижине албаданып ӱренген болор.

14. Иисус Кудайдыҥ Сӧзин јазап шиҥдеген деп, бис кайдаҥ билерис?

¹⁴ Иосиф ле Мария Иисуска оныҥ чыкканы ла Кудайдыҥ судурчылары ол керегинде нени айтканын куучындаган (Лука 2:8—19, 25—38). Иисус олордыҥ куучынын уккан, анайда ок Бичимелдерди бойы да јазап шиҥдеген. Иисус Кудайдыҥ Сӧзин јазап шиҥдеген деп, бис кайдаҥ билерис? Качан ого 12 јаш болордо, Иерусалимдеги ӱредӱчилер «оныҥ керсӱзин ле карууларын кайка[шкан]» (Лука 2:46, 47). Шак ла бу тушта Иисус Бичимелдиҥ болужыла оныҥ адазы — Иегова деп, билип алган (Лука 2:42, 43, 49).

15. Јӱрӱминде баштапкы јерде Кудайдыҥ табын бӱдӱрери болгон деп, Иисус канайып кӧргӱскен?

¹⁵ Иисус Иегованаҥ ого кандый јакару берилгенин оҥдоп, оны тургуза ла бӱдӱрип баштаган (Иоанн 6:38). Кӧп улус оны бу учун јаман кӧрӧр деп билген де болзо, ол Адазына јаантайын сӧсуккур болуп арткан. Б. э. 29-чы јылында сууга чӧҥӱрилген кийнинде Иисуска баштапкы јерде Кудайдыҥ табын бӱдӱрери болгон (Евр. 10:5—7). Керек дезе, керӱ агашта божоп то јадарда, Кудайдыҥ табын бӱдӱрери эҥ учурлу деп ол билген (Иоанн 19:30).

16. Јиит христиандар Иисустаҥ неге ӱренер аргалу?

¹⁶ Ада-энелереерге сӧсуккур болугар. Слердиҥ ада-энелереер Иосиф ле Мария чылап, толо кемдӱ эмес. Иегова олорго слерди корулазын ла ӱретсин деп јакару берген. Слер олордыҥ берген јӧптӧрин баалап, олорды тооп турзагар, ырысту болорыгар (Еф. 6:1—4).

17. Јииттерге Иисус Навин 24:15-ле болзо, кандый јӧп чыгарар керек?

¹⁷ Кемге иштереер деп, талдап алыгар. Иеговага иштеерин талдаары кажы ла кижиниҥ јӱрӱминде чыгарган эҥ учурлу јӧби болуп јат (Иисус Навин 24:15 кычырыгарf; Эккл. 12:1). Бу јӧпти чыгарарга, слерге Иегованы јакшы билип алар керек, оныҥ келер ӧйгӧ амадузын оҥдоп турар керек ле слер оныҥ табын бӱдӱрип болороор бо деп, шӱӱп сананар керек (Рим. 12:2). Агару Бичикти слер јаантайын кычырып, шиҥдеп турган болзогор, Иеговага сӱӱжигер ле бӱдӱмјигер там тыҥыыр.

18. Јииттерге баштапкы јерге нени тургузар керек ле бу олорго кандый туза берер?

¹⁸ Иеговага иштеерин баштапкы јерге тургузыгар. Сатананыҥ телекейиндеги улустыҥ санаазыла болзо, бистер јайалталарысты бойыска тузалу болзын деп тузаланып турзаас, ырысту болорыс. Је чынынча болзо, баштапкы јерге акча-јӧӧжӧлӱ болорын тургузып турган улус «кӧп кыйын-шырага» алдырат деп билерис (1 Тим. 6:9, 10). Качан слер Иегованы угуп, ого иштезеер, ырысту болороор ло эткен керектереер де ойгор болор (Иис. Н. 1:8).

СЛЕР КАНДЫЙ ЈӦП ЧЫГАРААР?

19. Ада-энелерге нени ундыбас керек?

¹⁹ Ада-энелер, балдарыгар Иегованыҥ ишчилери болуп калзын деп, бастыра ийде-кӱчеерди салыгар. Кудайга иженигер, ол слерге ойгор јӧптӧр чыгарарга болужар (Укаа 3:5, 6). Ундыбагар: балдараар слердиҥ айткан сӧстӧрӧӧрди эмес, је эдип турган керектереерди кӧрӧт. Оныҥ учун слердиҥ чыгарып турган јӧптӧрӧӧр балдарыгарга Иегованыҥ јарадузын аларга болушсын.

20. Иеговага иштеер деп јӧп чыгарган јииттерде кандый алкыштар болор?

²⁰ Јииттер, ада-энелереер слерге ойгор јӧптӧр чыгарарга болужар. Је Иегованыҥ јарадузын слер алараар ба, јок по јӱк слердеҥ бойыгардаҥ камаанду. Оныҥ учун Иисустаҥ тем алып, теҥеридеги Иегова Адагарга иштеерин талдап алыгар. Ол тушта слердиҥ эмди де, келер де јӱрӱмигер ырысту ла Кудайдыҥ алкыштарыла толо болор! (1 Тим. 4:16).