Кычыраачылардыҥ сурактары

Экклезиаст 5:8-теги сӧстӧр јӱк ле улустаҥ турган башкараачылар керегинде айдат па эмезе Иеговага база келижет пе?

Бу ӱлгерде айдылат: «Сен кандый бир ороондо јокту-јойуны базынып, чын јаргы ла чындык бузылып турганын кӧрӱп ийзеҥ, кайкаба: бийик јаҥда турганды оноҥ бийик јаҥдузы кӧрӱп јат. Кажызыныҥ ла ӱстинде оноҥ бийик јаҥдузы бар» (Эккл. 5:8).

Кудайды сананбай турган кижи бу ӱлгерде јӱк ле јаҥда отурган улус керегинде айдылат деп бодоор. Је јазап сананып ийзе, бу ӱлгер Иегова Кудай керегинде јаан учурлу чындыкты ачып јат, мындый чындык биске токунал ла ийде-кӱч берет.

Экклезиаст 5:8-те јокту улусты базынып, чын јаргыны бузып турган башкараачы керегинде айдылат. Је ундыбас керек бу башкараачыны оноҥ јаан јаҥду башкараачы кӧрӱп јат, анайда ок оноҥ до бийик јаҥдузы бар болор. Ачынчылу немези дезе кандый ла јаҥда отурган башкараачылар акчага садынып ийердеҥ айабас ла олордыҥ баш билинип тургандарынаҥ улам тегин албаты шыралап јат.

Айалга кандый да кӱч болзо, бийик јаҥда отурган башкараачыларды Иегова кӧрӱп јат, бу шӱӱлте бисти токунадып јат. Бис Кудайдаҥ болуш сурап, бастыра кӱчтеристи ого айдар аргалу (Сар. 55:22; Флп. 4:6, 7). Бис алаҥзыбайдыс: «Иегованыҥ кӧзи бастыра јӱрегиле Кудайга беринген кижиге ийдезин берерге, бастыра јерди ајыктап кӧрӧт» (2 Лет. 16:9).

Айдарда, Экклезиаст 5:8-теги сӧстӧр чыннаҥ ла болуп турган айалганы кӧргӱзет: улустыҥ башкарузында јаантайын бийик јаҥдузы болуп јат. Је эҥ учурлузы бу ӱлгер Иегова эҥ бийик јаҥду деп, эске алындырат. Эмди ол теҥеридеги Каандык ажыра башкарат. Бу Каандыктыҥ башкараачызы эдип, ол бойыныҥ Уулын, Иисус Христосты, кӧстӧгӧн. Кажы ла кижини кӧрӱп турган Кӱчтӱдеҥ Кӱчтӱ Кудай чындык јокты кӧрӧр кӱӱни јок, оныҥ Уулы керегинде база мынайып ла айдарга јараар.