Буурзаш. Бу кылык-јаҥга канайып ӱренип алар?

КАЖЫ ла кижи улустыҥ кӧзинде јакшы ла буурзак болорго албаданат. Је бӱгӱнги кӱнде буурзак болорго јеҥил эмес. Нениҥ учун дезе бис буурзак болорын јаратпай турган улустыҥ ортозында јададыс (2 Тим. 3:3). Олор «јакшыны јаман, јаманды јакшы» деп айдып, јакшыныҥ ла јаманныҥ нормаларын бойлоры тургузат (Иса. 5:20). Анайда ок биске алдындагы јӱрӱмис ле толо кемдӱ эмезис јаман салтарын јетирет. Оныҥ учун Иеговага канча јылдардыҥ туркунына иштеп турган Эннa эјениҥ сезимдерин оҥдоп турган болорыс. Ол айдат: «Мен јакшы кижи болуп каларым деп бӱдерге де кӱч».

Је буурзак болорына ӱренип аларга јараар. Бу кылык-јаҥ Кудайдыҥ агару тыныныҥ тӱжӱмине кирет, оныҥ болужыла кандый ла кӱчтерди ӧдӧтӧн арга бар. Темдектезе, телекейдиҥ ле улустыҥ јаман салтарына кирбезис, керек дезе бойыстыҥ толо кемдӱ эмезиске бастырбазыс. Айдарда, буурзак болоры керегинде тереҥжиде шӱӱжип, ого оноҥ јакшы ӱренип аларга нени эдерин билип алактар.

БУУРЗАК КИЖИ КАНДЫЙ БОЛОТ?

Буурзак кижи — јакшыны эдерге ле ак-чек јӱрерге албаданат. Андый кылык-јаҥда бир де јаман јок. Буурзак кижи јаантайын улуска јакшыны эдерге ле кандый бир аргала болужып ийерге албаданып јат.

Улус јакшыны бойыныҥ јууктарына ла најыларына кӱӱнзеп эдет деп кӧргӧн болороор. Је јакшыны јӱк јууктарына ла најыларына эдип турган кижи Кудайдыҥ кӧзинде чыннаҥ ла буурзак кижи болбой јат. Бистиҥ кемибисте де толо кеминде буурзак болор арга јок, не дезе, Агару Бичикте айдылганыла, «јердиҥ ӱстинде јакшыны эдип тура, кинчек этпей турган чындык кижи јок» (Јарл. 7:20). Элчи Павел де мыны оҥдоп: «Мен билерим, менде, мениҥ бойымда јакшы јӱрбей јат» — деп айткан (Рим. 7:18). Оныҥ учун биске буурзак Иегова Кудайдыҥ болужы керек.

«ИЕГОВА ЈАЛАКАЙ»

Буурзак болорыныҥ эҥ ле јакшы темин Иегова кӧргӱзет. Бу керегинде Агару Бичик мынайда айдат: «Сен јалакай болуп, јакшыны эдедиҥ. Мени бойыҥныҥ јакаруларыҥа ӱрет» (Сар. 119:68). Бу ӱлгерде айдылган Иегованыҥ буурзагыныҥ эки јанын кӧрӱп ийектер.

Иегова јалакай. Иегованыҥ буурзак болбос аргазы јок. Иегова Моисейге: «Мен сеге буурзагымды кӧргӱзерим» — деп айдарда не болгонын эске алып ийектер. Иегова Моисейге магын, ол тоодо буурзагын кӧргӱзип, мынайып айткан: «Иегова, Иегова, килеҥкей ле буурзак Кудай. Ол чугулданарга меҥдебей јат, сӱӱштӱ јалакайла, чындыкла толо. Ол муҥдар тоолу улуска сӱӱштӱ јалакайын эмди де кӧргӱзип јат, јасак јогын, јаман керекти ле кинчекти таштап салат, је кату каруузына тургузарынаҥ јайымдабай јат» (Чыг. 33:19; 34:6, 7). Кудайдыҥ буурзагы оныҥ кажы ла кылык-јаҥынаҥ кӧрӱнет. Јердиҥ ӱстинде Иисус эҥ ле буурзак кижи болгон до болзо: «Кем де быйанду [јалакай, ЈТ] эмес, јаҥыс Кудай быйанду» — деп айткан (Лука 18:19).

Иегова јакшыны эдет. Агару Бичикте мынайып бичилет: «Иегова ончо улуска јалакай. Оныҥ буурзагы оныҥ ончо керектеринеҥ кӧрӱнет» (Сар. 145:9). Ол кемди де ылгабай, ончо улуска јӱрӱм сыйлап, јӱрӱмге керектӱ немелердиҥ ончозын берип, олорго буурзап јат (Ап. ижи 14:17). Анайда ок буурзагын бистиҥ јаманысты таштап турганыла кӧргӱзет. Анайып ок сарнаачы да: «О Иегова, сен јалакай ла јаманды таштаарга белен» — деп айткан (Сар. 86:5). Оныҥ учун «Иегова ак-чек јӱрген улуска јакшыны эдер» деп алаҥзыбаска јараар (Сар. 84:11).

«ЈАКШЫНЫ ЭДЕРГЕ ӰРЕНИП АЛЫГАР»

Бис Кудайга кеберлеш эдип јайалганыс, оныҥ учун буурзак болуп, јакшыны эдер аргалу (Баш. 1:27). Андый да болзо, бу кылык-јаҥга ӱренер керек. Агару Бичик: «Јакшыны эдерге ӱренип алыгар» — деп айдат (Иса. 1:17). Је јакшыны эдерине ӱренип аларга нени эдер керек? Ӱч эп-арга кӧрӱп ийектер.

Баштапкызында, буурзак болорго болужып турган агару тын сурагар (Гал. 5:22). Агару тынныҥ болужыла бис јакшыны сӱӱрге ле јаманды јаман кӧрӧргӧ ӱренип аларыс (Рим. 12:9). Агару Бичикте айдылганыла, Иегова биске јакшы керектер эдерге ле јакшы сӧстӧр айдарга болужар аргалу (2 Фес. 2:16, 17).

Экинчизинде, Кудайдыҥ Сӧзин кычырыгар, анайып Иегова бисти «буурзаштыҥ јолына» ӱредип, «кандый ла быйанду керекке» белетеп салар (Укаа 2:9; 2 Тим. 3:17). Бистиҥ јӱректи эрјинелерлӱ кайырчакка тӱҥейлеерге јараар. Агару Бичикти кычырып, шӱӱп сананып турзаас, бис бойыстыҥ кайырчагысты Кудай ла оныҥ амадузы керегинде сӱрекей јакшы шӱӱлтелерле толтырадыс. Бу шӱӱлтелерди керек ле болзо тузаланарга јараар (Лука 6:45; Еф. 5:9).

Ӱчинчизинде, «јакшыга тӱҥейлеш» деген библиялык сӧстӧрлӧ јӱрерге албаданыгар (3 Иоанн 11). Агару Бичикте кӧп јакшы темдер бар. Эҥ ле јакшы темди Иегова ла Иисус кӧргӱзет эмей. Је база кемдер буурзак болгон? Темдектезе, Тавифа ла Варнава деген улус санаагарга келген болор (Ап. ижи 9:36; 11:22—24). Агару Бичиктеҥ олор керегинде кычырып, олордоҥ кӧп немеге ӱренерге јараар. Олордыҥ улуска кандый болуш јетиргенине ајарып ийзеер. Слер јууктарыгарга эмезе јуунныҥ ака-эјелерине канайып болужар эдигер? Анайда ок Кудай Тавифага ла Варнавага јакшы керектери учун кандый алкыш јетиргенин шӱӱп сананыгар. Андый ок алкыштар слерди де сакыйт.

Бӱгӱнги де кӱнде улуска јакшыны эдип турган ака-эјелер бар. Темдектезе, јуунныҥ ижин бӱдӱрип турган буурзак аксагалдар. Анайда ок бойыныҥ темиле «јакшыга ӱре[дип]» турган Кудайга чындык эје-сыйындар (Тит. 1:8; 2:3). Розлин деп эје мынайып куучындайт: «Мениҥ ӱреем јуундагы улуска болужып, олордыҥ кӱӱнин кӧдӱрип јат. Ол бойын олордыҥ ордына тургузып, кичинек сыйлар эдет эмезе кандый бир болуш јетирет. Ол чыннаҥ ла буурзак кижи».

Иегова ишчилерин: «Јакшыны бедирегер» — деп кычырат (Ам. 5:14). Бис јакшыга јӱткӱп турзаас, Кудайдыҥ нормаларын сӱӱп баштаарыс ла јакшыны эдерге кӱӱнзеерис.

Јӱк кандый бир јаан јакшы керек эткен эмезе баалу сыйлар эткен кижини буурзак деп сананбас керек. Темдектезе, јурукчы портретти кистьле бир эки ле катап јурай сокпой јат, је будукты кӧп катап салып јурайт. Анайып ла буурзак кижи јакшы керектерди кӧп катап эдет.

Агару Бичик бисти «кандый ла јакшы керекке белен болзын» деп айдат (Тит. 3:1). Бис кижини јакшы билип алзаас, оны «Кудайга бӱдеринде ӧссин деп, ого јакшыны эдер» аргалу болорыс (Рим. 15:2). Темдектезе, кижиле не барысла ӱлежерге јараар (Укаа 3:27). Ол эмезе кижини айылга кычырарга эмезе кандый бир јакшы неме керегинде куучындажып ийерге јараар. Кижи ооруп калган болзо, ого открытка сыйлаарга, оорып јаткан ӧйинде ого барып келерге эмезе телефон согорго јараар. Эйе, «бӱдерине ӱреде[тен] ле угуп турган улуска јакшылык береечи сӧстӧр» айдатан кӧп аргалар бар (Еф. 4:29).

Бис Иегова чылап ончо улуска јакшыны эдерге кӱӱнзейдис. Оныҥ учун улусты ылгабай јадыс. Анайып эдетен эҥ јакшы аргалардыҥ бирӱзи — ончо улуска Кудайдыҥ Каандыгы керегинде јарлаары. Бис Иисустыҥ јакарганыла јакшыны ончо улуска, керек дезе бисти кӧрӧр кӱӱндери јок то улуска эдерге албаданадыс (Лука 6:27). Кандый ла айалгада јакшыны этсе торт, не дезе, «мыны... јаргылаар Јасак јок» (Гал. 5:22, 23). Кандый ла кӱчтердиҥ ле удурлажулардыҥ ӧйинде де јакшыны эдип турзаас, бис улусты чындыкка экелип, Кудайды мактаарыс (1 Петр 3:16, 17).

БУУРЗАК БОЛГОНЫНЫҤ КАЙРАЛЫ

Укаа сӧстӧр 14:14-тӧ «јалакай кижи бойыныҥ керектеринеҥ кӧп тӱжӱм алар» деп айдылат. Бу нени темдектейт? Бис улуска јалакай баштанып турган болзоос, олор до биске јалакай болордоҥ айабас (Укаа 14:22). Је кезиги јалакай баштанбаза да, бистиҥ јакшы керектерди кӧрӱп, јымжаар болор (Рим. 12:20).

Јакшыны сӱӱп, јаманды этпей барган улустыҥ јӱрӱми јакшы јанындӧӧн солынган. Нэнси эјениҥ темин кӧрӱп ийектер. Ол айдат: «Мен недеҥ де уйалбас, кемге де багынбас, јыргап-сайрап јӱрер кижи болгом. Је качан Кудайдыҥ нормаларын билип алала, јӱрӱмимди солыырымда ырысту болуп калгам ла бойымды тооп баштагам».

Буурзак болорына ӱренип турганыстыҥ эҥ јаан шылтагы — Иегованы сӱӱндирип турганы. Кӧп улус јакшы керектеристи кӧрбӧй дӧ турза, бисти Иегова кӧрӱп јат. Ол бистиҥ кажы ла јакшы керегисти, керек дезе санаабысты да ајаруга алат (Еф. 6:7, 8). Бисти кандый кайрал сакыйт? «Јалакай кижи Иегованыҥ јарадузын алат» — деп, Укаа сӧстӧр 12:2-де айдылган. Иегова «јакшыны эдеечи кажы ла кижиге мак, кӱндӱ ле амыр» берер деп сӧзин берет (Рим. 2:10). Оныҥ учун буурзак болорына оноҥ ло ары ӱренели!