Lembrieko
21 Adunde ubimo tie calu kulo i cing’ Yehova.
Etelo wiye kaka moko ci m’emaru.
2 Yo pa ng’atini ceke nen nia tie atira i wang’e,
Ento Yehova ng’iyo i adunde.*
3 Nitimo lembe m’atira man ma pwe
Nyayu mutoro lee i Yehova nisagu lam.
4 Wang’ mi ting’iri man adunde mi kuhaya
Gitie thala ma telo wi jutimrac, ento gitie dubo.
5 Andhandha pangulembe pa ng’atu ma timo tic kud amora ketho lembe wotho ire miero,*
Ento andhandha dhanu ceke ma gitimo lembe nyapio pio gicidho i can.
6 Ninwang’u lonyo ku leb mi ndra
Tie calu lietho ma duny, etie uwic ma negojo.*
7 Rop mi jutimrac bikabugi cen,
Kum gikwero nitimo lembe ku bedopwe.
8 Yo pa ng’atu ma lembe n’i wiye ugondere,
Ento timo pa ng’atu ma leng’ tie atira.
9 E ber nibedo i gund wi ot
Kakare nibedo i ot ma rom ku dhaku ma jatiti.*
10 Jatimrac* ketho cwinye i kum gin ma rac;
Etimo ngo bero nyanok de ni jadhugola pare.
11 Kinde ma jumiyo matira ni jacac, ng’atu m’ung’eyo lembe akeca ngo doko riek,
Man kinde ma ng’atu ma riek ubeponjo lembe lee, enwang’u ng’eyong’ec.*
12 Ng’atu ma pwe neno ot pa jatimrac;
Ebayu jutimrac i nyoth.
13 Ng’atu ma culo ithe kara kud ewinj wak pa ng’atu ma ka kite mbe,
En bende jubidwoko ngo ire lembe kinde m’ebilwong’o.
14 Giramiya ma jumiyo i amung’ kwiyo wi ng’eicwiny,
Man kanyaka ma jumiyo i aponda,* kwiyo lak kwinyo.
15 Etie mutoro ni won bedopwe nitimo lembe ku bedopwe,
Ento ju ma gitimo lembe ma reco gidagu nitimo lembe ku bedopwe.
16 Ng’atu m’ukier kud i yo mi rieko
Biyom karacelo ku ju ma tego migi thum i tho.
17 Ng’atu m’umaru nambu* bidoko jacan;
Man ng’atu m’umaru pigulok man mo bilony ungo.
18 Jatimrac tie jamgony ni won bedopwe,
Man jubiting’o ng’atu ma cibojo kaka ng’atu m’atira.
19 E ber nibedo i langa
Kakare nibedo ku dhaku ma jatiti* man ma nyayu ng’eicwiny i ijo.
20 Lonyo ma pire tek man mo n’i ot pa ng’atu ma riek
Ento jakasegu binyotho* piny m’etie ko.
21 Ng’atu m’uberiemo tok bedopwe man mer ma lokere ngo
Binwang’u kwo, bedopwe, man dwong’.
22 Ng’atu ma riek romo piey kud iwi gang’ mir* adhura mi jurukara
Man enyotho tego ma giketho genogen migi i wiye cen.
23 Ng’atu m’ubegwoko dhoge man lebe
Nwang’u egwokere gire* ni peko.
24 Won rikini, jadoro, man ng’atu ma ting’ere
Kumeno re ma jubilwong’o ng’atu m’ubetimo lembe ku kuhaya m’umbe nidieng’ i kum gin m’ebetimo.
25 Gin ma janyap uketho cwinye i kume bitere i tho,
Kum cinge kwero nitimo tic.
26 Eketho cwinye kud abamba i kum piny dieceng’ duu,
Ento won bedopwe miyo m’umbe niweko dong piny moko.
27 Lam pa jatimrac tie gin ma judagu.
Etie gin ma judagu magwei kinde m’ebethiere ku pidoic ma rac!*
28 Jamulembe m’ucwayu ndra bitho,
Ento ng’atu ma winjo lembe bimiyo lembatuca pi nja.
29 Jatimrac ronyo wang’ mi tegocwiny,
Ento won bedopwe re ma yo pare tie atira.*
30 Rieko moko mbe, kadi ng’iyo i lembe, kadi juk tek ejai i dhu Yehova.
31 Juketho riuni* ubed ayika pi nindo mi lwiny,
Ento both utie pa Yehova.