Zaburi
Ni jatel wi wer. Wer pa Daudi m’ewero kinde ma jabila Nathan umondo i bang’e i ng’ey m’etimo ribiri ku Bath-ceba.
51 Nyuth ira bero, E Mungu, calku mer peri ma lokere ngo.
Ruc kier para nikum kisa peri ma dit.
2 Lwok kosa para ceke kud i kuma,
Man dwoka leng’ kud i dubo para.
3 Kum ang’eyo kier para cuu mandha,
Man dubo para n’i wang’a saa ceke.*
4 Adubo iri, ku kwong’a zoo, iri in;*
Atimo gin ma rac i weng’i.
Pieno itie pwe kinde m’ibeweco
Man itie atira i pokolembe peri.
5 Nen! junyola m’atie jakosa,
Man maa gamu iye m’enyola ko i dubo.*
6 Nen! anyong’a negi i kum lemandha ma n’i adunde;
Ponja abed ku rieko mandha i pidoic para m’upondo.
7 Lwok dubo para cen kud i kuma kud hizop,* kara adok leng’;
Lwoka, e abidoko tar calu pei.
8 Wek awinj dwal mi mutoro man mir anyong’a,
Kara anyong’a neg cogo m’irungo.
10 Cwii adunde ma leng’ i iya, E Mungu,
Man keth tipo ma nyen i iya, man ma nging’ nging’.
11 Kud iriema kud i vuti;
Man kud imaya ku tipo ma leng’ peri.
12 Dwok ira anyong’a mi both peri;
Cew ava mi wori* i iya.
13 Abiponjo yo peri ni ju ma gikier,
Kara judubo gidwog i beng’i.
14 Bodha kud i dubo mi nek, E Mungu, Mungu mi both para,
Kara leba utwong’ pi bedopwe peri kud anyong’a.
15 E Yehova, yab dend dhoga,
Kara dhoga upeki.
16 Kum imito ngo lam, ka nwang’u ungo nwang’u amiye iri;
Anyong’a negi ngo i kum lam m’awang’a ma boo.
17 Lam ma nyayu anyong’a i Mungu tie cwiny ma can umondo i iye;
Adunde m’utur man m’urungere, E Mungu, ibikwero ngo.*
18 I berocwiny peri, tim gin ma ber ni Sayuni;
Gier gang’kidi mi Yeruzalem.
19 E anyong’a binegi i kum lam mi bedopwe,
I kum lam m’awang’a man girathiera ma boo;
E jubithiero thwoni dhieng’ iwi pemlam peri.