Isaya
40 “Wujuki, wujuk cwiny dhanu para,” Mungu mwu wacu.
2 “Wuwec i adunde* Yeruzalem,
Man wutwong’ ire nia tic pare mir adici udaru thum,
Nia judaru weko kier pare.
Enwang’u mukero m’uromo* pi dubo pare ceke kud i cing’ Yehova.”
3 Dwand ng’atu moko ubekok i langa kumae:
“Wuyab* yo pa Yehova!
Wuyik gengi ma dit man m’atira i die langa ni Mungu mwa.
4 Poga ceke uidh malu,
Man gudi kud ungulu gudi* ceke udok piny.
Ng’om ma cung’ cung’ ucikere nipoto,
Man ng’om ma kli kli ucikere nidoko pambu.
6 Winji! Ng’atu moko ubeyero kumae: “Koki!”
Ng’atu mange upenjo kumae: “Akog ang’o?”
“Kum* ceke utie lum ma numu.
Gin ceke mer migi ma lokere ngo calu thiwe mi lum.
Andha dhanu tie kende kende lum ma numu.
8 Lum ma numu thwo,
Man thiwe de thwo,
Ento lembe pa Mungu mwa bedo rondo ku rondo.”
9 Idh iwi got ma lir lir,
In m’i dhaku m’ubetero lembanyong’a pi Sayuni.
Kok ku tego,
In m’i dhaku m’ubetero lembanyong’a pi Yeruzalem.
Ting’ dwendi, lworo kud unegi.
Twong’ ni adhura mi Yuda kumae: “Mungu mwu ni e.”
10 Nen! Rwoth Ubimo ma Malu Ngbir Yehova bibino ku tego,
Man bote bibimo pire.
Nen! sukulia pare ni kude,
Man cul m’ebeculo n’i wang’e.
11 Ebigwoko* dwol pare calu jakwac.
Ebicoko dhu nyithi rombe pare ku bote karacelo,
Man ebiting’ogi i kore.
Ebitelo wi ju ma nyithindhgi dhoth yoo yoo.
12 Ng’a m’upimo pii i die cinge
Man ng’a m’upimo polo ku lac cinge?*
Ng’a m’ucoko dhug utur mi ng’om i jampimo piny,
Kadi m’upimo gudi i kilo
Man ungulu gudi i kilo?
13 Ng’a m’upimo* tipo pa Yehova ku jampimo piny,
Man ng’a ma copo bedo jamii juk pare pi niponje?
14 Epenjo paru i bang’ ng’a pi ninwang’u nyang’ i lembe,
Kunoke ng’a ma ponje ku yo mi bedopwe,
Kadi m’uponje ku ng’eyong’ec,
Kunoke m’unyutho ire yo mandha mi nyang’ i lembe?
15 Nen! thek calu pii m’ubeton kud i ndoy,
Man ginen calu ng’ili utur iwi kilo.
Nen! eting’o cula calu ng’ili utur ma yom.
16 Kadok Lebanon de romo ketho ngo mac umedere niliel,*
Man yedi pare mi lum de copo romo ngo pi lam m’awang’a.
17 Thek ceke tie gin m’umbe i wang’e;
Enenogi ni gin moko ngo, calu gin m’andha ngo.
18 Wuromo poro Mungu ku ng’a?
Wuromo poro ayine kud ang’o?
19 Jabodho thiedho ayi gin m’acwiya,*
Jatic mir uka* umo kume ku mola ma kwar,
Man efwodo nyoro mi mola ma tar.
20 Eng’iyo yen ni ajok pare,
Yen ma bitop ungo.
Eyenyo jabodho m’ung’eyo tic cuu
Kara uyik ayi gin m’acwiya m’ang’ika ma bipodho ngo.
21 Nyo wung’eyo ngo?
Nyo wuwinjo ngo?
Nyo jukoro ngo iwu niai i acaki?
Nyo wunyang’ ungo niai i thekiri mi ng’omi?
22 Ng’atu moko tie ma bedo malu iwi twodiri* mi ng’om,
Man ju ma bedo i iye gi calu usene.
Eyaru polo calu bongu ma lere lere,
Man epedhogi calu hema ma jubedo i iye.
23 Ejwigo jutic ma dongo doko ni gin moko ngo
Man eketho jupoklembe* mi ng’om doko ni gin mandha ngo.
24 Fodi jupidhogi apidha ci,
Fodi jucoyogi acoya ci,
Fodi ulaggi de unyang’ ungo i ng’om ci,
E yamu ukoto i wigi man uthwoyogi,
Man yamu uyeyogi ucidho kugi calu soka.
25 “Wubiketho ayina romb ku ng’a pi nidwoka rom kude?” Ng’atu ma leng’ uwacu.
26 “Wung’ay weng’wu i kor polo man wunen.
Ng’a m’ucwiyo piny maenigi?
Tie Ng’atu ma wodho udul migi calku wendgi;
Elwong’o gin ceke ku nying’gi.
Nikum tego pare ma dwong’ m’ubetimo lembe man kero pare ma ng’oyo ndiri,
Acel de mbe m’urem i kingi.
27 Ibeyero nedi, Ee Yakobo, man pirang’o ibewacu kumae, Ee Israel,
‘Yo para pondo ni Yehova,
Man anwang’u ngo pokolembe m’atira i bang’ Mungu?’
28 Nyo ing’eyo ngo? Nyo iwinjo ngo?
Yehova ma Jacwii tung’ ng’om, tie Mungu ma rondo ku rondo.
Eol ungo nyanok de kadi avoca de evoc ungo.
Nyang’ i lembe pare nwang’ere ngo.*
29 Emiyo tego ni ng’atu m’uol
Man kero ma lee ni ju ma tego migi mbe.
30 Awiya ma co biol man bivoc,
Man awobi bikier man bipodho,
31 Ento ju m’ugeno Yehova gibinwang’u tego.
Gibituk ku vombgi calu acur.
Gibiringo man gibivoc ungo;
Gibiwotho man gibiol ungo.”