Isaya
46 Bel ukulo kore, Nebo ke ugung’.
Jupangu ayi gin m’acwiya migi iwi leya, iwi yedi ma yeyo ter,
Calu ter m’ubenuro leya m’uol.
2 Gigung’ man gikulo korgi karacelo;
Gicopo laru ngo ter.*
Man gin gigi* gibecidho i ng’eca.
3 “Wuwinja, Ee ot pa Yakobo, man wun ceke ma wudong’ i ot pa Israel,
Wun m’acungo i kumwu niai i nyoliri man m’ayeyowu niai i ic.
4 Abibedo rom cil i tiyo mwu;
Cil ma lwar bicorere i wiwu abimedara niyeyowu.
Calu m’atimo, abiting’owu, abiyeyowu man abilaruwu.
5 Wubiketho ayina uromb ku ng’a kunoke wubidwoka rom ku ng’a kadike wubipora ku ng’a,
Kara nia ayina uromb kude?
6 Jumoko tie ma wodho mola ma kwar bik kud i usau migi;
Gipimo mola ma tar iwi kilo.
Giculo jathiedh cuma, man eyike edoko ni mungu.
I ng’eye gipodho arieba wang’gi, eyo, giwore.*
7 Giting’e gikethe iwi gokgi;
Giyeye man gicidh gikethe kakare, e ebedo de keca.
Eai ungo ku kakarene.
Gigoyo nduru i bang’e, ento edwoko ngo;
Ecopo laru ngo ng’atu moko kud i can.
8 Wupoy pi lembuni man cwinywu ubed tek.
Wugwoke i adundewu, wu judubo.
9 Wupoy pi lembe ma yang’ con,*
Nia an a Mungu, mange mbe.
An a Mungu, man mange mbe ma calu an.
10 Niai i acaki, alar ayero lembe ma bitimere i ajiki,
Man niai yang’ con lembe ma fodi utimere ngo.
Ayero kumae: ‘Lembang’ola* para bicungo kakare,
Man abitimo gin moko ci ma iya yenyo.’
11 Abelwong’o acuth niai ku kaka ma ceng’ wok i iye,*
Ng’atu ma bipong’o lembang’ola* para niai kud i ng’om ma bor.
Adaru weco man abitimo lembene.
Adaru keco lembene man abipong’e bende.
12 Wuwinja, wu ju m’adundewu nwang’,
Wu ju ma wu ni bor ku bedopwe.
13 Akelo bedopwe para ceng’ini;
Eni bor ungo,
Man both para bigalu ngo.
Abikelo both i Sayuni, man leng’o para ni Israel.”