Lembrieko

2 Woda, tek ijolo lembe para

Man igwoko lembang’ola para cuu,

 2 M’ibeciko ithi pi niwinjo rieko

Man ibeketho adundeni i kum ng’iyo i lembe;

 3 M’umedo maeno, tek ibewak pi ninwang’u nyang’ i lembe

Man ibeting’o dwendi malu pi ninwang’u ng’iyo i lembe;

 4 Tek ibemediri nisayu kakare calu mola ma tar

Man ibemediri niyenye calu lonyo m’upondo;

 5 E ibinyang’ i lworo pa Yehova,

Man ibinwang’u ng’eyong’ec pa Mungu.

 6 Kum Yehova en gire emiyo rieko;

Ng’eyong’ec man ng’iyo i lembe wok kud i dhoge.

 7 Egwoko rieko ni ju m’atira,

Etie ban ni ju ma giwotho i bedocu.

 8 Eneno wi yo mi weg bedopwe,

Man egwoko yo mi ju ma gibegwoko bedoleng’ migi ire.

 9 E ibinyang’ i lembe m’atira, ma pwe man ma tap,

Ibinyang’ i kum yo mandha m’ukwayu iwoth i iye.

10 Kinde ma rieko umondo i adundeni

Man ng’eyong’ec udoko ber iri,*

11 Copo mi paru i lembe bikuro wii,

Man ng’iyo i lembe bigwoki,

12 Pi nibodhi kud i yo ma rac

Kud i cing’ ng’atu m’ubeyero lembe ma reco,

13 Kud i cing’ ju ma giweko yo ma pwe

Pi niwotho i yo mi mudho,

14 Kud i cing’ ju m’anyong’a negogi nitimo gin ma rac,

Ju ma mutoro negogi i kum lemandha ngo man ma reco,

15 Ju ma yo migi ugom,

Man ma kwo migi zoo tie ngo atira.

16 Ebibodhi ni dhaku ma wang’e tar,*

Ni wec ma mit* pa dhaku ma won asara,

17 Ma weko jawodhe* ma ceng’ini mir aradu pare

Man ma wiye wil i kum lembariba pa Mungu pare;

18 Kum ot pare loro piny i tho,

Man yo pare terojo i bang’ ju ma tego migi thum i tho.

19 Ng’atu moko mbe m’i kind ju m’uribiri kude* ma bidwogo,

Kadi gibidwogo de ngo i gengi mi kwo.

20 Dong’ lub yo mi dhanu ma beco

Man bed i yo mi weg bedopwe,

21 Kum ju m’atira kendgi re ma gibibedo i ng’om,

Man ju ma lembe mbe i wigi* re ma gibidong’ i iye.

22 Ento jubikabu jutimrac cen kud i ng’om,

Man jubimugo ju ma cibojo cen kud i iye.