Zaburi
104 Wek apak Yehova kud adundena* ceke.
E Yehova Mungu para, i dwong’ dit.
Ironyiri ku dito man ku leng’o.
2 Iumiri ku der calu ku bongu;
Ipedho polo calu bongu mi hema.
3 Eketho riu mi kusika pare ma malu iwi pii ma malu,*
Eketho afuru ubed ni magali pare,
Eringo iwi vomb yamu.
4 Eketho jumalaika pare gidoko ni tipo,
Man jutic pare ni lebmac ma wang’u piny ruk.
5 Eketho ng’om ucungo wi kathere;
Ebikabere ngo ku kakare* pi rondo ku rondo.
6 Iume ku pii ma thuc calu ku bongu.
Pii ukadhu wi gudi.
7 Kinde m’ijukogi, giringo;
Kinde ma giwinjo dwand lukoth peri, giringo ma kumgi ubemiel,
8 Gudi ugam udongo man poga utong’ere,
Kaka m’iketho pigi.
9 Iketho igi kieu kara kud gikadhe,
Kara kud gium ng’om kendo.
10 Eoro kulo i poga;*
Gimol kud i kind gudi.
11 Yedi ceke mi lum gimadhu pii m’i igi;
Kana mi lum madhe pi nidaru rieu migi.
12 Winyo mi kor polo giero odgi malu i wigi;
Giwer kud i kind ith yen m’ujiyo.
13 Ecoro pii iwi gudi niai kud i kusika pare ma malu.
Iyeng’o ng’om kud adwogi mi tic peri.
14 Eketho lum loth ni lim,
Man uboko kara dhanu utii kudo,
Pi niketho cam ucek i ng’om
15 Man pigulok ma nyayu anyong’a i adunde dhanu,
Mo ma rienyo wang’ dhanu,
Man cam* ma miyo tego ni adunde dhanu ma tho.
16 Yen pa Yehova de pii uromogi ma ber,
Yend tido mi Lebanon m’epidho.
17 Kaka ma winyo gigiero odgi i iye.
Od nunda n’iwi yend jenevriye.*
18 Gudi ma dongo utie pi diegi mi gudi;
Cana utie kapondo mir uduka.
19 Ecwiyo dwi pi ninyutho saa ma juketho;
Ceng’ ung’eyo cuu saa m’emwony i iye.
20 Ikelo mudho man piny nyutho,
Kinde ma yedi ceke mi luli gicaku woth.
21 Nyithindh umvor* giwak kinde ma gidwaru cam migi,
Man giyenyo cam ma Mungu miyo igi.
22 Kinde ma ceng’ ubewok,
Giloko man givuto i odigi.
23 Dhanu cidho i kum tic pare,
Man esendere ku tic nitundo uthieno.
24 Tic peri gi dupa mire maa, E Yehova!
Itimogi ceke ku rieko.
Ng’om upong’ ku piny m’icwiyo.
25 Maeni nam ma dit man ma lac,
Epong’ ku piny ma kwo ma kwaniri ngo, ma thindho ku ma dongo.
26 Meli giwotho kuca,
Man Leviathan* m’icwiyo pi nituko i iye.
27 Gin ceke gikuro in,
Kara imii igi cam migi i saane.
28 Gin m’imiyo igi, gicoke.
Kinde m’iyabu cingi, giyeng’ ku piny ma beco.
29 Kinde m’ipanu weng’i, wigi nyothere.
Kan ikabu tipogi, githo man gidoko ni utur.
30 Kan ioro tipo peri, gicwiyiri,
Man idwoko ng’om doko nyen.
31 Dwong’ pa Yehova bibedo rondo ku rondo.
Anyong’a binego Yehova i kum tic pare.
32 Eneno ng’om, e ng’ombe yengere;
Emulo kum gudi, e giwodho yiro.
33 Abiwer ni Yehova i kwo para ceke;
Abiwero wer mi pak* ni Mungu para i nindo ceke m’akwo i iye.
34 Dong’ anyong’a unege i kum pidoic para.*
Anyong’a binega i ii Yehova.
35 Judubo gibithum kud i ng’om,
Man jutimrac gibibedo nuti kendo ngo.