Lembrieko

15 Dwoko lembe ma yoo* kwiyo lak kwinyo,

Ento wec ma timojo rac* nyayu ng’eicwiny.

 2 Leb ju ma riek tiyo cuu ku ng’eyong’ec,

Ento dhu jukusegu dhwolo kasegu.

 3 Wang’ Yehova ni kakare ceke,

M’ebeneno ko lembe ma rac ku ma ber.

 4 Leb ma yoo* en e yen mi kwo,

Ento wec mi ndra ketho jubayu genogen.*

 5 Jakasegu cayu twiny pa won,

Ento ng’atu ma tie ku riekowang’ jolo juk.

 6 I ot pa won bedopwe lonyo pong’ bik,

Ento adwogi mi tic pa jatimrac kelo peko i wiye.

 7 Dend dhu ju ma riek mewo ng’eyong’ec,

Ento adunde jukusegu re timo kumeno ngo.

 8 Yehova udagu lam mi jutimrac,

Ento rwo pa ng’atu m’atira nyayu anyong’a i iye.

 9 Yehova udagu yo pa jatimrac,

Ento emaru ng’atu ma riemo tok bedopwe.

10 Twiny nen rac* ni ng’atu m’uweko yo m’atira,

Ento ng’atu m’udagu juk bitho.

13 Adunde mi mutoro nyayu anyong’a i wang’,

Ento can turo cwinyjo.

14 Adunde ma nyang’ i lembe yenyo ng’eyong’ec,

Ento dhu jakasegu tungere ku* lemkasegu.

15 Nindo pa ng’atu ma can n’i iye* ceke rac,

Ento ng’atu m’adundene tie ku mutoro* bedo ku foc thiri thiri.

16 E ber nibedo ku piny nyanok ma re julworo Yehova

Kakare nibedo ku lonyo lee karacelo kud adieng’acwiny.*

17 E ber nicamu dek ma col kaka ma mer n’i iye

Kakare nicamu thwon dhiang’ ma miyo kaka m’adegi n’i iye.

18 Ng’atu ma won ng’eicwiny nyayu dhaw,

Ento ng’atu ma yoo ni ng’eicwiny kwiyo wi ali.

19 Yo pa janyap tie calu gang’ mir ukudho,

Ento gengi pa ng’atu m’atira tie calu ndaki ma kpee.

20 Wod ma riek nyayu anyong’a i won,

Ento ng’atu ma jakasegu cayu min.

21 Lemkasegu en anyong’a ni ng’atu m’ukoso rieko,*

Ento ng’atu ma won ng’iyo i lembe cidho atira i wang’e.

22 Lembe ma jupangu podho kaka ma jupenjo ngo paru i iye,*

Ento erombo nikum jumii juk dupa.

23 Anyong’a nego ng’atini kinde m’emiyo dwokowang’ lembe ma tap,*

Man lembe ma juyero tap i saane tie ber mire maa!

24 Yo mi kwo dodo ng’atu ma riek malu,

Pi nigwoke kara kud elor piny i Liel.*

25 Yehova birwombo ot pa jakuhaya cen,

Ento ebigwoko wang’ kieu pa dhatho.

26 Yehova udagu gamba ma jatimrac camu,

Ento wec ma mit tie leng’ ire.

27 Ng’atu m’ubenwang’u piny i ayi m’atira ngo kelo peko* iwi ot pare gire,

Ento ng’atu m’udagu kanyaka bimedere nikwo.

28 Adunde ng’atu ma pwe nyamu i lembe i wang’ nidwoko lembe,*

Ento dhu jukusegu thwogo lembe ma reco.

29 Yehova ni bor ku jutimrac,

Ento ewinjo rwo mi weg bedopwe.

30 Wang’ ma tie ku mutoro* nyayu anyong’a i adunde;

Rwonglembe ma ber miyo tego ni cogo.*

31 Ng’atu ma winjo juk ma miyo kwo

Kakare n’i kind ju ma riek.

32 Ng’atu moko ci ma kwero twiny, nwang’u ebecayu kwo* pare,

Ento ng’atu ma winjo juk nwang’u nyang’ i lembe.*

33 Lworo Yehova ponjojo ku rieko,

Man i wang’ dwong’, jwigiri lar bedo nuti.