Eklezia
3 Lembe ceke tie ku saane m’ukethere,
Saa unuti pi tic ceke i the polo:
2 Saa mi nyoliri man saa mi tho;
Saa mi pidho man saa mi fudho gin ma jupidho;
3 Saa mi nego nek man saa mi keyo kum;
Saa mi rwombo man saa mi giero;
4 Saa mi wak man saa mi ng’iero;
Saa mi goyo nduru man saa mi miel;*
5 Saa mi lalu kidi cen man saa mi coko dhu kidi karacelo;
Saa mi gwaku man saa mi ceriri nigwaku;
6 Saa mi sayu man saa mi ting’o cwiny iwi gin moko nia dong’ erwinyo;
Saa mi gwoko man saa mi bayu cen;
7 Saa mi yeco man saa mi kwoyo;
Saa mi bedo ling’ man saa mi weco;
8 Saa mi maru man saa mi dagu;
Saa mi lwiny man saa mi kwiyocwiny.
9 Ng’atu m’ubetimo tic copo nwang’u ang’o niai kud i kero ceke m’ebetimo? 10 Aneno tic ma Mungu umiyo ni wot dhanu kara gimediri nitimo. 11 Ecwiyo piny ceke leng’* i saane. Eketho kadok ava mi kwo rondo ku rondo i adundegi;* re asu dhanu binyang’ ungo i tic ma Mungu mandha utimo niai i acaki nitundo i ajiki.
12 Anwang’u nia gin moko mbe ma ber igi m’usagu nia gibed kud anyong’a man gitim gin ma ber i nindo mi kwo migi, 13 bende nia ng’atuman ucam man umadhi man anyong’a nege i tic pare ma tek ceke. Maeni tie giramiya pa Mungu.
14 Atuc ninyang’ nia piny ceke ma Mungu mandha ucwiyo bibedo rondo ku rondo. Gin moko mbe ma jucopo medo i kume man gin moko mbe ma jucopo kabu kud i kume. Mungu mandha ucwiyogi kumeno kara dhanu ulwore.
15 Gin moko ci m’ubetimere ular utimere, man gin ma bibino ular ubedo nuti; ento Mungu mandha yenyo i gin ma judaru yenyo iye.*
16 Aneno bende lembe ma e i the ceng’: I ka lembe m’atira, racu re m’ubedo, man i ka bedopwe, racu re m’ubedo. 17 Pieno awacu i adundena kumae: “Mungu mandha bipoko lembe pa won bedopwe ku pa jatimrac ceke, kum saa nuti pi lembe ceke man pi tic ceke.”
18 Bende ayero pi wot dhanu i adundena nia Mungu mandha bikethogi i amulaic man ebinyutho igi nia gi calu ley, 19 kum gin ma wok i kum dhanu utie bende gin ma wok i kum ley; gin ceke gitie kud ajiki* ma rom. Tap calu m’acel tho, ma kucelo de tho kumeno man gin ceke gitie ku tipo ma rom. Pieno, dhanu usagu ley ungo kum gin ceke iye nanu. 20 Gin ceke gicidho kaka ma rom. Gin ceke giai i utur, man gin ceke gidok i utur. 21 I andha ng’a m’ung’eyo ka nyo tipo dhanu idho malu, man tipo ley loro piny i ng’omi? 22 Man aneno nia gin moko mbe ma ber m’usagu ni dhanu nia anyong’a nege i tic pare, pilembe eno re m’utie sukulia* pare; kum ng’a ma copo ketho eneno gin ma bidok timere yor i ng’eye ma dong’ ecidho?