Lembrieko
3 Woda, wii kud uwil i kum ponji* para,
Man wor lembang’ola para kud adundeni ceke,
2 Kum gibimedo iri nindo dupa
Man oro mi kwo ku kwiyocwiny de lee.
3 Kud iwek mer ma lokere ngo man gwoko bedoleng’* uweki
Twiigi i ng’uti;
Kiewgi iwi ban mir adundeni;
4 E ibinwang’u bero man piri bing’eyere nia i riek
I wang’ Mungu kud i wang’ dhanu.
5 Gen Yehova kud adundeni ceke,
Man kud ijengiri iwi rieko peri giri.
6 Dieng’ pire i lembe ceke m’ibetimo,
E ebiketho yo peri bicungo atira.
7 Kud idok riek i weng’i giri.
Lwor Yehova man lokiri cen kud i kum lembe ma rac.
8 Ebibedo calu keyokum ni kumi*
Man tego ni cogoni.
9 Yung Yehova ku piny peri ma pigi tek,
Ku landu wi mwoka* mi piny ceke m’ucek* iri;
10 E dero peri bipong’ bik
Man vur* peri bipong’ haw ku pigulok ma nyen.
11 Woda, kud ikwer twiny pa Yehova
Man kud idag juk pare,
12 Kum Yehova twinyo ju m’emaru
Tap calu ma wego twinyo ko wode m’emaru lee.
13 Jamutoro tie ng’atu m’unwang’u rieko
Man ng’atu m’unwang’u ng’iyo i lembe;
14 Ninwang’e tie ber nisagu nwang’u mola ma tar,
Man nibedo kude miyo bero nisagu nibedo ku mola ma kwar.
15 Pire tek lee nisagu korai;*
Gin moko ci m’imaru ma jucopo poro kude mbe.
16 Nindo m’ung’adu n’i cinge ma yor acwic;
Lonyo ku dwong’ n’i cinge ma yor acam.
17 Yo pare nyayu mutoro,
Man gengi pare ceke gi mi kwiyocwiny.
18 En e yen mi kwo ni ju m’umake kii,
Man ju ma gimediri nimoko i kume kii jubilwong’ogi jumutoro.
19 Yehova uketho kathere mi ng’om ku rieko.
Eketho polo ucungo nging’ nging’ ku ng’iyo i lembe.
20 Nikum ng’eyong’ec pare, epoko i pii ma thuc bwa
Man thoi ubeton kud i afuru m’upangere i kor polo.
21 Woda, kud ilok weng’i kud i kumgi.*
Gwok rieko man copo mi paru i lembe;
22 Gibimiyo iri* kwo
Man gibibedo ni jamruko ni ng’uti;
23 E ibiwotho i yo peri museme,
Man tiendi bikier ki ngo.*
24 Kinde m’ivuto, ibilworo ngo gin moko;
Ibivuto man nindo peri bibedo mit.
25 Ibilworo ngo lembe ma wok rek ma nyayu lworo
Kadi avuvu* m’ubebino iwi jutimrac.
26 Kum Yehova bibedo acaki mi genogen peri
Ebigwoko tiendi kara kud umok i uwic.
28 Kud iwac ni jadhugola peri kumae: “Cidhi, dwog i ng’eye! Abimiyo iri urwo,”
Kan icopo miye kawoni.
29 Kud ipang nitimo lembe ma rac ni jadhugola peri
Kinde m’ebekwo karacelo kudi ku bedomoth.
30 Kud idhaw ku ng’atu moko mananu
Tek etimo ngo iri gin moko ma rac.
31 Kumira kud unegi i kum ng’atu ma jarop
Kadi kud ilub yo pare moko acel de.
32 Kum Yehova udagu won gondiri
Ento ebedo ku mer ma ceng’ini ku dhanu m’atira.
33 Kwong’ pa Yehova n’i wi ot pa jatimrac,
Ento epoko mugisa iwi udi mi weg bedopwe.
34 Kum ecayu ju ma gi jucac,
Ento enyutho bero ni ju ma mol.
35 Ju ma riek gibinwang’u yung,
Ento jukusegu giyungo gin ma kelo lewic.