Isaya
48 Wuwinj lembuni, Ee ot pa Yakobo,
Wun ma wulwong’uru ku ying’ Israel
Man ma wuwok kud i pii pa* Yuda,
Wun ma wukwong’uru ku nying’ Yehova
Man wulwong’o nying’ Mungu mir Israel,
Kadok i lemandha man i bedopwe ngo de.
2 Kum gibelwong’iri gin gigi ku nying adhura ma leng’
Man gibeyenyo kony i bang’ Mungu mir Israel,
Ma nyinge Yehova mir udul.
3 “Alar ayero iwu lembe ma kwong’a yang’ con.
Giwok kud i dhoga,
Man aketho ging’eyiri.
Atimo lembene rek, man gitimiri.
4 Ang’eyo maram itie ko jathwon,
Nia ng’uti utie ler mi cuma man ter weng’i tie mola.
5 Alar ayero iri yang’ con.
Ma fodi lembene utimere ngo, aketho iwinjo pire,
Kara kud iyer nia, ‘ayi gin m’acwiya para re m’utimo lembuni;
Ayi gin m’acwiya para m’ang’ika man ayi gin m’acwiya para mi cuma* re m’ung’olo lembuni.’
6 Iwinjo man ineno lembuni zoo.
Nyo ibitwong’o ngo pigi?
Niai kawoni abenyutho iri pi lembe ma nyen,
Lembamung’a ma jugwoko ma nwang’u ing’eyo ngo.
7 Kawoni re ma jubecwiyogi, ento yang’ con ungo;
Nitundo tin nwang’u fodi iwinjo ngo pi lembene nyanok de,
Kara kud iwac kumae: ‘Nen! alar ang’eyogi.’
8 Ungo, iwinjo ngo, ing’eyo de ngo,
Man naka nwang’u fodi ithi uyabere ngo.
Kum ang’eyo nia itie won abombi ma rac dit,
Man niai i nyoliri peri ci julwong’i peri jadubo.
9 Ento pi nyinga, abicero ng’eicwiny para;
Kum pi yung para abicerara,
Man abinyothi ngo.
10 Nen! Adwoki leng’ ku mac, ento i ayi pa mola ma tar ungo.
Amulo ii* i uka mi masendi.
11 Kum pira gira, eyo, pira gira abitimo lembe,
Kum acopo wekara nenedi nia jucida?
Abimiyo ngo dwong’ para ni ng’atu moko acel de.*
12 Winja, Ee Yakobo, man Israel, ma ng’atu m’alwong’o.
An a Ng’atu ma rom, a ma kwong’a man bende a ma tokcen.
13 Cinga gira re m’uketho kathere mi ng’om,
Man cinga mir acwic re m’upedho polo.
Saa ma kan alwong’ogi, giai karacelo.
14 Wucokuru karacelo kewu ceke, man wuwinji.
Ng’a m’i kindgi m’unyutho lembe maeno?
Ng’atu ma an a Yehova amaru
Bitimo lembe ma nyayu anyong’a i iya i kum Babeli,
Man bote bibino i kum Jukaldayo.
15 An gira adaru weco man alwong’e.
Akele man yo pare bibedo miero.
16 Wucor ceng’ini i vuta, man wuwinj lembe maeni.
Kum niai i acaki aweco ngo i amung’.
Niai i nindo ma lembene utimere abino nuti keca.”
Man kawoni Rwoth Ubimo ma Malu Ngbir Yehova uora, karacelo ku tipo pare.
17 Yehova ma Jawarni, Ng’atu ma Leng’ mir Israel uwacu kumae:
“An a Yehova, a Mungu peri,
Ng’atu m’ubeponji pi bero peri giri,
Ng’atu m’ubetelo wii i yo m’ubekwayu iwoth i iye.
18 Ka nwang’u ndhu iketho wii i kum cik para!
E nwang’u kwiyocwiny peri ubedo tap calu kulo
Man bedopwe peri calu mujanga mi nam.
19 Nwang’u kodhi peri wendgi nyay calu kwiyo
Man nyikweyi calu nying’ kwiyone.
Nwang’u nying’gi ukabere ngo kadi uweyere de ngo kud i wang’a.”
20 Wuwok kud i Babeli!
Wuring kud i bang’ Jukaldayo!
Wukog lembene ku muzira! Wutwong’e!
Wuketh lembene ung’eyere cil i tung’ ng’om.
Wuwac kumae: “Yehova udaru waru jatic pare ma Yakobo.
21 Saa m’ebetelo wigi kud i die ng’om ngele, rieu pii unegogi ngo.
Eketho pii umol igi kud i cana;
Eng’enyo i cana man eketho pii uthwogere.”
22 “Kwiyocwiny umbe ni jutimrac,” Yehova wacu.