Zaburi
Pa Daudi.
103 Wek ng’eyong’ec para upak Yehova;
Wek gin moko ci ma n’i iya upak nyinge ma leng’.
2 Wek ng’eyong’ec para upak Yehova;
Wiya kud uwil ki i kum lembe ceke m’etimo.
3 Eweko kosa peri ceke,
Man ekeyo remo peri ceke;
4 Ewaru kwo peri kud i vur*
Man eronyo mer pare ma lokere ngo man kisa i wii calu jamker mi wic.
5 Eyeng’i ku gin ma ber i nindo peri ceke,
Kara tego* peri udok nyen calu p’acur.
6 Yehova timo ku bedopwe man ku pokolembe m’atira
Ni dhanu ceke ma jubesendo.
7 Eketho Musa ung’eyo yo pare
Man nyithindho mir Israel ging’eyo tic pare.
9 Ebiyenyo ngo kosa saa ceke,
Kadi ebikayu ngo lembe pi rondo ku rondo.
10 Etimo ngo iwa lembe nimakere ku dubo mwa,
Kadi eculo ngo iwa gin ma waromo ko pi kier mwa.
11 Kum calu ma polo ni malu ma sagu ng’om,
Mer pare ma lokere ngo de tie dit kumeno ni ju ma gibelwore.
12 Calu ma yo nyangu bedo bor ku yo reto,
Kumeno bende ecoro kier mwa bor kud i kumwa.
13 Calu ma kisa nego wego i kum wote,
Kumeno bende kisa nego Yehova i kum ju m’ubelwore.
14 Kum eng’eyo cuu kite ma wacwiyara ko,
Epoy nia wan utur.
15 Ento dhanu ma tho, nindo pare calu nindo pa lum;
Ethiwo calu thiwe mi lum.
16 Ento kinde ma yamu ukoto, embe,
Edok ebedo ve ebino mbe kakeca.*
17 Ento mer ma lokere ngo pa Yehova tie pi rondo ku rondo*
Ni dhanu ma gibelwore,
Man bedopwe pare ni awiya mir awiya migi,
18 Ni ju ma giworo lembariba pare,
Man ni ju ma giworo ng’ol pare cuu mandha.
19 Yehova uketho komker pare ucungo nging’ nging’ i polo;
Man ker pare ubebimo wi piny ceke.
20 Wupak Yehova wu malaika pare ceke, ma wutek akeca,
Ma wubetimo lembe pare, man wubeworo dwande.*
21 Wupak Yehova, wun udul pare ceke,
Wu jutic pare ma wubetimo yeny pare.
22 Wupak Yehova wu tic pare ceke,
I kabedo ceke m’ebebimo i iye.*
Wek apak Yehova kud adundena* ceke.