Lembrieko
29 Ng’atu ma dwoko ng’ute tek* i ng’ey ma jujuke wang’ dupa
Jubirunge rek ma dong’ ecopo key ungo.
2 Ka weg bedopwe gi dupa, anyong’a nego dhanu,
Ento tek jatimrac ubebimo en, dhanu cur acura.
3 Ng’atu m’umaru rieko nyayu anyong’a i won,
Ento ng’atu m’ubemedere nidikere ku weg asara nyotho lonyo pare.
4 Jabim ketho ng’om cungo nikum pokolembe ma pwe,
Ento ng’atu ma yenyo kanyaka nyothe anyotha.
5 Ng’atu ma wondo wang’ jadhugola pare
Ciko voi ni tiende.
6 Kier pa ng’atu ma rac make calu uwic,
Ento won bedopwe kok kud anyong’a man anyong’a nege.
7 Won bedopwe dieng’ pi twero mi jucan,
Ento ng’atu ma rac dieng’ ungo i kume.
8 Jukulula ginyayu yakini i* adhura,
Ento ju ma riek giloko kwinyo cen.
9 Tek ng’atu ma riek ubeloko dhoge ku jakasegu,
Ebinwang’u ngo matoke ma ber, ento yakini ku cac re ma bibedo nuti.
11 Ng’atu ma jakasegu thwogo ng’eicwiny* pare ceke,
Ento ng’atu ma riek kwiyo kume man ebimo wigi.
12 Ka jabim uciko ithe i kum ndra,
Jutic pare ceke bidoko ni dhanu ma reco.
13 Jacan ku ng’atu ma jubesendo gitie ku lembe ma rom ma e:*
Yehova re ma miyo der ni wang’gi gin ario ceke.*
14 Ka jabim ubepoko lembe mi jucan atira,
Komker pare bicungo ma tek saa ceke.
15 Uluth* man juk miyo rieko,
Ento nyathin ma juweko jangala nyayu lewic iwi min.
16 Kinde ma jutimrac ubemediri, kier de medere,
Ento weg bedopwe bineno kite ma gibipodho ko.
17 Twiny wodi, e ebimiyo iri yom;
Man ebinyayu anyong’a lee i ii.*
18 Kaka ma gin ma wok i wang’* umbe i iye, dhanu doko jangala,
Ento jumutoro gi ju ma gibeworo cik.
19 Jatic weko ngo jutwinye ku wec kende,
Kum kadok ebenyang’ de, eworo ngo.
20 Nyo ineno ng’atu moko ma weco vur vur?
Genogen utie lee ni jakasegu nisagu ire.
21 Ka juthing’o jatic ku piny niai i aradu pare,
I ng’eye ebidoko ng’atu ma foyo piny ungo.
22 Ng’atu ma jang’eicwiny nyayu dhaw;
Ng’atu moko ci ma kwinyo make pio timo kier dupa.
23 Kuhaya pa ng’atini bijwige,
Ento ng’atu ma mol binwang’u dwong’.
24 Ng’atu ma tie jawodh jakwo nwang’u edagere gire.*
Eromo winjo jubesayu sadeni,* ento eyero ngo lembe moko.
26 Dhanu dupa giyenyo giwec ku* jabim,
Ento ng’atini nwang’u pokolembe ma pwe niai i bang’ Yehova.
27 Won bedopwe udagu ng’atu m’atira ngo,
Ento jatimrac udagu ng’atu ma yo pare atira.