Lembrieko
3 Keth gin moko ci m’itimo* i cing’ Yehova
E lembe m’ipangu birombo.
4 Yehova uketho piny ceke upong’ lembakeca pare,
Kadok jatimrac pi nindo mi can.
5 Yehova udagu ng’atu moko ci ma jakuhaya i adundene.
Ng’ey nia* ebikoso ngo ninwang’u matira.
6 Nikum mer ma lokere ngo man gwoko bedoleng’, juweko kosa,
Man nikum lworo Yehova ng’atini lokere cen kud i kum lembe ma rac.
7 Kan anyong’a unego Yehova i kum yo pa ng’atini,
Eketho kadok judegi pare de gikwo kude ku kwiyocwiny.
8 E ber nibedo ku piny nyanok re i bedopwe
Kakare nibedo ku piny dupa i yo m’atira ngo.
9 Ng’atini copo pangu yo pare i adundene,
Ento Yehova re ma telo wi dagutielo pare.
10 Yub ma tipo uyuyo i wiye* ucikere nibedo i dend dhu ubimo;
Ecikere ngo ninyotho pokolembe m’atira.
11 Jampimo piny man kilo ma tap giai i bang’ Yehova
Pek ceke mi kidi ma n’i usau gitie tic pare.
12 Jubim gidagu timo ma reco,
Kum komker cungo nging’ nging’ nikum lembe m’atira.
13 Wec m’atira nyayu mutoro i jubim.
Gimaru ng’atu ma yero lemandha.
14 Kwinyo p’ubimo tie calu jakwenda mi tho.
Ento ng’atu ma riek kwiyo lake.*
15 Kwo nwang’ere i der m’i wang’ ubimo;
Bero pare tie calu afuru mi koth mi saa mi cir.
16 E ber mire maa ninwang’u rieko kakare ninwang’u mola ma kwar!
Ninwang’u nyang’ i lembe tie ber ma sagu mola ma tar.
17 Ndaki ma dit mi dhanu m’atira uro gin ma rac.
Ng’atu moko ci m’ubegwoko yo pare gwoko kwo* pare.
18 Kuhaya lar wok i wang’ nyoth,
Man tipo mi ting’iri i wang’ kier.
19 E ber nibedo ng’atu ma jwigere i kind ju ma mol
Kakare nipoko jambayeki mi ju ma ting’iri.
20 Lembe birombo* ni ng’atu m’utimo ku rieko i lembe moko,
Man jamutoro tie ng’atu m’ugeno Yehova.
21 Ng’atu ma riek i adunde jubiyero nia etie ku nyang’ i lembe,
Man ng’atu ma weco ma ber* ketho dhanu yiyo lembe.
22 Rieko tie kulo mi kwo ni ju ma gitie kude,
Ento kasegu mi jukusegu re ma twinyogi.
23 Adunde ng’atu ma riek miyo rieko ni dhoge
Man wec pare ketho dhanu yiyo lembe.
24 Wec ma nyang’ujo tie calu pedo kic,
E mit ni ng’eyong’ec* man ekeyo cogo.
25 Yo moko nuti ma nen nia en atira i wang’ ng’atini,
Ento i ajikine eterojo i tho.
27 Ng’atu ma kite mbe golo wi lembe ma rac;
Wec m’i dhoge tie calu mac ma wang’u piny.
28 Janyay yakini* tugo ali,
Man jayernying’ poko kind jurimo ma ceng’ini.
29 Ng’atu ma jarop bidho wang’ jadhugola pare
Man etelo wiye i yo ma rac.
30 Emiyo wang’e jwijwi kinde m’ebepangu nitimo lembe ma rac.
Egoyo dend dhoge kinde m’ebetimo lembe ma rac.
31 Wic ma julwar tie jamker mi wic mi leng’o*
Kinde m’ebenwang’ere i gengi mi bedopwe.
32 Ng’atu ma yoo ni ng’eicwiny tie ber ma sagu ng’atu ma jarukara,
Man ng’atu ma bimo wi ng’eicwiny pare* tie ber ma sagu ng’atu m’umaku adhura.
33 Jubolo gagi i dhu bongu
Ento yub ceke mi gagine ai i bang’ Yehova.